ދޮގު ހެއްދެވުމުގެ ބައްޔަށް މުއިއްޒު ފަރުވާ ހޯއްދެވުމަށް ދަ ޑެމޮކްރަޓްސް ގެ ރައީސް ގޮވާލައްވައިފި
ހަސަން ލަތީފް ވިދާޅުވީ، މުއިއްޒުގެ ކިބައިން ދޮގު ހެދުން ފެންނަ މިންވަރަށް ނިސްބަތްކޮށް "ގިނަފަހަރަށް އެއީ ނަފްސާނީ ބައްޔެއްގެ އަލާމާތެއް ކަމުގައި ވެދާނެ،" ކަމަށް
ރައީސް މުއިއްޒު - ގިނަގިނައިން އިތުރުފުޅު ހައްދަވާކަން ގިނަ ބަޔަކު ފާހަގަ ކުރޭ
ދޮގު ހެއްދެވުމުގެ ބައްޔަށް ރައީސް މުހައްމަދު މުއިއްޒު ފަރުވާ ހޯއްދެވުމަށް ދަ ޑެމޮކްރަޓެސް ގެ ރައީސް ހަސަން ލަތީފް ގޮވާލައްވައިފިއެވެ.
ހޯމަ ދުވަހު އެކްސްގައި ހަސަން ލަތީފް ކުރެއްވި ޕޯސްޓެއްގައި ވިދާޅުވީ ދޮގުހެދުމުގެ ބައްޔަށް ހަގީގަތުގައި ވެސް މުއިއްޒު "ޕްރޮފެޝަނަލް އެހީތެރިކަން" ހޯއްދަވަން ޖެހޭ ކަމުގައެވެ.
ހަސަން ލަތީފް ވަނީ މުއިއްޒު އަކީ "ޕެތޮލޮޖިކަލް ލަޔަރ" އެއްގެ ގޮތުގައި ސިފަ ކުރައްވާފައެވެ.
ޕެތޮލޮޖިކަލް ލަޔަރ އަކީ ގިނައިން ދޮގު ހެދުމުގެ އިތުރުން ދޮގު ހެދުން އެއީ ކުރަން ޖެހޭ ކަމެއްގެ ގޮތުގައި ދެކި އަމިއްލަ އިޚްތިޔާރުން ބޭރުންވެސް ދޮގު ހަދާ ފަރާތްތަކެވެ.
ހަސަން ލަތީފް ވިދާޅުވީ، މުއިއްޒުގެ ކިބައިން ދޮގު ހެދުން ފެންނަ މިންވަރަށް ނިސްބަތްކޮށް "ގިނަފަހަރަށް އެއީ ނަފްސާނީ ބައްޔެއްގެ އަލާމާތެއް ކަމުގައި ވެދާނެ،" ކަމަށެވެ.
"ސިއްހީ މާހިރުންގެ ބަހުން، މީހަކީ ދޮގުހެދުމުގެ ބަލި ޖެހިފައިވާ މީހެއް ނަމަ، އޭނާއަށް އެކަން ފުރިހަމައަށް އެނގިފައި ނުވުން އެކަށީގެންވެއެވެ." ހަސަން ވިދާޅުވިއެވެ.
ރައީސް މުއިއްޒު ވެރިކަމަށް ގެނައުމަށް މަސައްކަތް ކުރެއްވި، ދަ ޑެމޮކްރަޓްސްގެ ރައީސް ހަސަން ލަތީފް ކުރެއްވި ޕޯސްޓުގައި ދޮގު ހެދުމުގެ ބަލީގެ އަލާމާތްތައް ހިމެނޭ މައުލޫމާތު ޝީޓެއްވެސް ވަނީ އެޓޭޗް ކުރައްވާފައެވެ.
ހަސަން ލަތީފް، މި މޭމުރުމުން ރައީސް މުއިއްޒު އާ ގުޅޭ ގޮތުން ވާހަކަފުޅު ދެއްކެވި އިރު، ސަރުކާރަށް އެއް އަހަރު ފުރިގެން ސޯޝަލް ސެންޓަރުގައި މުއިއްޒު ދެއްކެވި ވާހަކަފުޅުގައި ވަރަށް ގިނަ އިތުރުފުޅުތައް ހައްދަވާފައިވާކަން ފާހަގަ ކޮށް ގިނަ ބަޔަކު އަންނަނީ ހިތްހަމަ ނުޖެހުން ފާޅުކޮށް ފާޑުކިޔަމުންނެވެ.
މުއިއްޒުގެ ސަރުކާރަށް ނޮވެމްބަރު 17 އަށް އެއް އަހަރު ފުރުނު އިރު އެމަނިކުފާނު ކަންކަން މިހާތަަނަށް ކުރައްވާފައިވަނީ ވެސް އިންތިޚާބީ ވައުދުތަކާ ދިމާ އިދިކޮޅަށް ކަން ގިނަ ބަޔަކު އަންނަނީ ބުނަމުންނެވެ.
