ސްޕެއިންގެ ޤައުމީ ފުޓުބޯޅަ ޓީމުގައި އޮތް ޒުވާން ޓީމުން ދައްކަމުން އަންނަ ކުޅުމާ މެދު އިންތިހާ އަށް ހިތްހަމަ ޖެހިފައި ހުރި ކަމަށް، އެ ޓީމުގެ ކޯޗު ލުއިސް ޑި ލާ ފުއެންޓޭ ބުނެފި އެވެ.

އޭނާ މިހެން ބުނީ ޔުއެފާ ނޭޝަންސް ލީގުގައި ސްޕެއިން އިން ޑެންމާކާ ދެކޮޅަށް ކުޅުނު މެޗަށްފަހު އެވެ. ޑެންމާކާ ދެކޮޅަށް ކުޅުނު މެޗު ކާމިޔާބުކޮށް، ސްޕެއިން އިން ވަނީ ގުރޫޕުގެ އެއް ވަނަ މަގާމު ކަށަވަރު ކޮށްފަ އެވެ. އެ މެޗާ ކުރިމަތިލީއިރު ވެސް ސްޕެއިން އޮތީ މުބާރާތުގެ ކުއާޓާ ފައިނަލް އިން ފުރުސަތު ހޯދައިފަ އެވެ.

ފުއެންޓޭ ބުނީ މެޗުގައި ސްޕެއިންގެ ކުޅުންތެރިން ދެއްކީ ރަނގަޅު ކުޅުމެއް ކަމަށާއި، މެޗާމެދު އޭނާ ހުރީ ވަރަށް ބޮޑަށް ހިތްހަމަ ޖެހިފައި ކަމަށެވެ. ޚާއްސަކޮށް ސްޕެއިންގައި އޮތް ޒުވާން ޓީމުން މިހާތަނަށް ދައްކަމުން އަންނަނީ ފާހަގަކޮށްލެވޭ ވަރުގެ ކުޅުމެއް ކަމަށާއި، އެ ކުޅުންތެރިންގެ ސަބަބުން ސްޕެއިން އަށް އިތުރު ރޫޙެއް ލިބެމުން އަންނަ ކަމަށް ވެސް ފުއެންޓޭ ބުންޏެވެ.

މުޅި މެޗަށް ބަލާއިރު، ފުއެންޓޭ ބުނީ ޑެންމާކު މެޗަކީ ވަރަށް އުނދަގޫ މެޗެއް ކަމަށާއި، އެ ޓީމާ ދެކޮޅަށް ކުޅެން ޖެހުނީ ވެސް އުނދަގޫ ޙާލަތެއްގައި ކަމަށް ފުއެންޓޭ ބުންޏެވެ. ޚާއްސަކޮށް ޑެންމާކުން ދިޔައީ ސްޕެއިން އަށް އެތައް ޕްރެޝަރެއް ކުރިމަތި ކުރުވަމުން ކަމަށާއި، ސްޕެއިން އިން ކުޅެން ޖެހުނީ އެކަންކަމަށް ވަރަށް ބޮޑަށް ސަމާލުވެގެން ކަމަށް އޭނާ ވަނީ ބުނެފަ އެވެ.

މީގެ އިތުރުން ފުއެންޓޭ ބުނީ ސްޕެއިން އިން ބޭނުންވި މިސްރާބުގައި މެޗު ގެންދިޔުމަށް ދަތިތަކެއް ކުރިމަތިވި ކަމަށެވެ. ޚާއްސަކޮށް ފިޓްނަސްގެ ބައެއް މައްސަލަ ދިމާވިކަން އޭނާ ފާހަގަ ކުރި އެވެ. އެހެން ނަމަވެސް، މެޗުގައި ސްޕެއިން އަށް ލިބެމުން ދިޔަ ފުރުސަތުތަކުގެ ބޭނުން ހިފުމާއި، މެޗު ކޮންޓްރޯލްކޮށްގެން ސްޕެއިން ކުޅުނު ކަމަށް އޭނާ ވަނީ ފާހަގަކޮށްފަ އެވެ. ފުއެންޓޭ ޤަބޫލު ކުރާ ގޮތުގައި ސްޕެއިން އަށް އެ މެޗުން، 3-0ގެ ނަތީޖާ އަކުން ވެސް މޮޅު ވެވޭނެ އެވެ.

ސްޕެއިންގެ ކޯޗުކަމާ ފުއެންޓޭ ހަވާލުވީ ފަހުން އެ ޓީމުން އަންނަނީ ރަނގަޅު ނަތީޖާތަކެއް ނެރެމުންނެވެ. އެގޮތުން އޭނާގެ އިރުޝާދުގެ ދަށުން ސްޕެއިން އިން ވަނީ ޔުއެފާ ނޭޝަންސް ލީގު އަދި ޔޫރޯ ފުޓުބޯޅަ މުބާރާތް ވެސް ކާމިޔާބު ކޮށްފަ އެވެ.