ސައުތުވެސްޓް އެއަރލައިންސްގެ ފްލައިޓަކަށް ވަޒަނެއް އަރައިފި
16 ނޮވެމްބަރު 2024 | ހޮނިހިރު 05:48ވަޒަން އަރާފައިވަނީ އިންޑިއަނާޕޮލިސް އަށް ފުރަން ތައްޔާރުވަމުންދިޔަ މަތިންދާބޯޓެއްގެ ކުރިމަތީ ކޮކްޕިޓުގެ ދަށުން ކަނާތްފަރާތަށެވެ.
ސައުތްވެސްޓް އެއަރލައިންސްގެ ފްލައިޓެއް
އެމެރިކާގެ ޓެކްސާސް ސްޓޭޓުގެ ޑަލަސް ލަވް ފީލްޑް އެއަރޕޯޓް ކައިރީގައި ހުކުރު ދުވަހުގެ ރޭ ހިނގި ބަޑިޖެހުމުގެ ހާދިސާއެއްގައި ސައުތުވެސްޓް އެއަރލައިންސްގެ މަތިންދާބޯޓަކަށް ވަޒަން އަރައިފިއެވެ.
ސައުތުވެސްޓް އެއަރލައިންސްގެ ތަރުޖަމާނު ވިދާޅުވި ގޮތުގައި ވަޒަން އަރާފައިވަނީ އިންޑިއަނާޕޮލިސް އަށް ފުރަން ތައްޔާރުވަމުންދިޔަ މަތިންދާބޯޓެއްގެ ކުރިމަތީ ކޮކްޕިޓުގެ ދަށުން ކަނާތްފަރާތަށެވެ. ނަމަވެސް، މި ހާދިސާގައި އެއްވެސް މީހަކަށް އަނިޔާވެފައި ނުވާކަން އޭނާ ވަނީ ފާހަގަކުރައްވާފައެވެ. ސައުތުވެސްޓް އެއަރ ލައިނުން އެ ފްލައިޓުގެ ފަސިންޖަރުންނަށް އެހެން ފްލައިޓަކުން ދަތުރުކުރެވޭނެ އިންތިޒާމު ހަމަޖައްސައިދޭނެ ކަމަށް ވެސް އޭނާ ވިދާޅުވިއެވެ.
"ޤާނޫނު ތަންފީޒުކުރާ ފަރާތްތަކަށް މި މައްސަލައިގެ މައުލޫމާތު ދީފައިވާނެ. އަދި މަތިންދާބޯޓުގެ ޚިދުމަތް ވަނީ ވަގުތީގޮތުން ހުއްޓާލާފަ،" ސައުތުވެސްޓް އެއަރ ލައިންގެ ތަރުޖަމާނު ވިދާޅުވިއެވެ.
މި ހާދިސާއާ ގުޅިގެން އެއްވެސް ފަރާތެއް އަދި ހައްޔަރު ކުރެވިފައި ނުވާ ކަމަށާއި، މައްސަލައިގެ ތަޙްޤީޤު ކުރިއަށްދާ ކަމަށް ސައުތުވެސްޓް އެއަރލައިންސް އިން މައުލޫމާތުދެއެވެ. އަދި މަތިންދާބޯޓުގެ ސަލާމަތާއި ރައްކާތެރިކަމަށް އިސްކަންދޭ ކަމަށާއި، މިފަދަ ހާދިސާތައް ތަކުރާރުވިޔަ ނުދިނުމަށް މަސައްކަތްކުރާނެ ކަމަށްވެސް އެ ކުންފުނިން ބުނެފައިވެއެވެ.
