މީޑިއާތަކާއި ނޫސްވެރިންނަށް އަދަބު ދޭން ހަދާ ގާނޫނާއި ގުޅިގެން ހުށަހެޅި ކުއްލި މައްސަލަ ބޭރުކޮށްލައިފި، ސަރުކާރު މެންބަރުން ޖެހީ އަތްތިލަބަޑި
14 ނޮވެމްބަރު 2024 | ބުރާސްފަތި 09:48ނޫސްވެރިންނާއި މީޑިއާތައް ޖުރިމަނާ ކުރުމާއި، ސައިޓްތައް އައު ކޮމިޝަނަށް ބްލޮކް ކުރެވޭ
މަޖިލީހުގެ ގަލޮޅު ދެކުނު ދާއިރާގެ މެމްބަރު މީކާއިލް ނަސީމް
ނޫސްތަކާއި ޓީވީ ތަކާއި، ނޫސްވެރިން ޖޫރިމަނާ ކުރެވޭ ގޮތަށް ގާނޫނެއް ހަދަން ސަރުކާރުގެ ފަރާތުން، ހުށަހެޅި ބިލުގެ މައްސަލައިގައި ކަންބޮޑުވުން އޮތުމާއެކު ހުށަހެޅި ކުއްލި މައްސަލަ އެޖެންޑާކުރަން ދެކޮޅު ހަދައި ބޭރުކޮށްލައިފިއެވެ.
ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމް ހުށަހަޅުއްވަން އުޅުއްވި ކުއްލި މައްސަލައާ މެދު ގޮތެއް ނިންމަވަމުން މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވީ، މަޖިލީހުގެ ގަވައިދުގެ 197 ވަނަ މާއްދާގެ އ އަދި މ ގައިވާ ޝަރުތުތައް ފުރިހަމަ ނުވާ ކަމަށެވެ. ނަމަވެސް ކޮން ޝަރުތެއް ކަމެއް ވިދާޅެއް ނުވެއެވެ. އަދި އެއާއެކު ސަރުކާރު މެންބަރުން ވަނީ އެކަމާއި އުފާކުރައްވާ އަތްތިލަބަޑި ޖަހާފައެވެ.
'މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ގާނޫނު' ގެ ނަމުގައި އާ ގާނޫނެއް އުފައްދަން ހުށަހެޅުއްވީ ސަރުކާރުގެ ފަރާތުން ތުޅާދޫ ދާއިރާގެ މެންބަރު އަބްދުﷲ ހަންނާން އަބޫބަކުރެވެ.
މީކާއިލް ހުށަހެޅުއްވި މައްސަލާގައި ވިދާޅުވެފައިވަނީ ނޫސްވެރިކަން ކުރުމާއި، މުއާސަލާތީ ވަސީލަތްތައް ބޭނުންކޮށްގެން، ހަބަރާއި، މައުލޫމަތާއި، ފެންނަ ގޮތްތަކަކާއި، ހިޔާލުތައް ފާޅުކުރުމާއި، ޝާޢިއުކުރުމާއި، މިނިވަންކަމާއެކު ފިކުރުކުރުމާއި، އިސްލާމްދީނުގެ އަސްލަކާ ހިލާފުނުވާ ގޮތެއްގެ މަތިން އެމީހެއްގެ ބުއްދިއަށް ފެންނަ ގޮތްތަކާއި، ހިޔާލުތައް ދުލާއި ގަލަމުން ފާޅުކުރުމުގެ މިނިވަންކަމަކީ، ގާނޫނު އަސާސީން ކަށަވަރުކޮށްދީފައިވާ އަސާސީ ހައްގުތަކެއް ކަމަށެވެ.
އަދި ސަރުކާރާއި ގުޅިފައިވާ މެންބަރަކު، 13 ނޮވެމްބަރުގައި މަޖިލީހަށް ހުށަހަޅާފައިވާ، މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަންގެ ބިލު ފަރުމާކޮށްފައިވަނީ، ނޫސްވެރިންނާއި މީޑިއާ ހިންގާ ފަރާތްތައް ސަރުކާރުގެ މުށުތެރެއަށްލައި، މީޑިއާތއް ރެގިއުލޭޓްކުރުމުގެ ބާރު، ސަރުކާރުގެ ފުރިހަމަ ކޮންޓްރޯލް އޮންނަ ގޮތަށް އަދި ސީދާ ރައީސް އައްޔަންކުރައްވާ މެންބަރުންގެ މައްޗަށް އެކުލަވާލެވޭ މީޑިއާ ކޮމިޝަނެއް މެދުވެރިކޮށް ސީދާ ގޮތަށް ކަމަށެވެ.
އަދި މި ބިލުގެ ދަށުން، ބޮޑެތި އަދަދުތަކުން ނޫސްވެރިންނާއި މީޑިއާތައް ޖޫރިމަނާކޮށް، ނޫސްތަކާއި މީޑިއާތައް ބަންދުކޮށްލުމުގެ ފުރިހަމަ ބާރު ސަރުކާރަށް ލިބިގެންދާ ގޮތަށެވެ. އަދި މި ބިލުގެ ސަބަބުން، ގާނޫނު އަސާސީން ރައްޔިތުންނަށް ކަށަވަރުކޮށްދޭ މަދަނީ އަދި ސިޔާސީ ހައްގުތައް ހަނިވެ، ރައްޔިތުންގެ މިނިވަންކަމަަށް އުނިކަން ލިބިދާނެ ކަމަށެވެ.
ކުއްލި މައްސަލައިގައި ބުނެފައިވަނީ މި ބިލަކީ ގާނޫނުއަސާސީންނާއި ގާނޫނުތަކުން ރައްޔިތުންނަށް ކަށަވަރުކޮށްދޭ މަދަނީ އަދި ސިޔާސީ ހައްގުތައް ހަނިކޮށް، ރައްޔިތުންގެ މިނިވަންކަން ނަގާލުމުގެ ނިޔަތުގައި ސަރުކާރަށް ލިބިފައިވާ ރައްޔިތުންގެ މަޖިލީހުގެ އަގުލަބިއްޔަތުގެ ނާޖާއިޒް ބޭނުންކޮށްގެން، ހިންގަމުންދާ ޖަރީމާތަކަށް އިތުރުކުރެވޭ ބޮޅެއް ކަމަށެވެ.
އަދި ދައުލަތުގެ ހަރަދުތައް އިންތިހާއަށް އިތުރުވެ، ތަކެތީގެ އަގުތައް އިންތިހާއަށް އުފުލި، މާލީގޮތުން ރައްޔިތުން ހަނާވަމުންދާ ދަނޑިވަޅެއްގައި، ރައްޔިތުންގެ ހާލާމެދު ބެލެހެއްޓުންތެރިކަމެއް ފަރުވާލެއް ބެހެއްޓުމެއްނެތި، ދައުލަތުގެ ހަރަދުތަކާއި، މާލީ ހާލަތާ ގުޅޭ މައުލޫމާތު ސިއްރުކުރަމުންދާތީ، ނޫސްވެރިންނާއި އާންމު ރައްޔިތުންގެ ތެރެއިން ބަޔަކު، މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން މައުލޫމާތު ހޯދުމަށް އެދި ހުށަހެޅި ނަމަވެސް، ސިޔާސީ މަގާމުތަކަށް އައްޔަންކޮށްފައިވާ މީހުންގެ ރަސްމީ އަދަދާއި، ސަރުކާރު ހިއްސާވާ ކުންފުނިތަކުން ހާމަނުކުރުން އެއީ މި ސަރުކާރުގެ އާންމު ސިޔާސަތަކަށް ވެފައިވާ ކަމަށެވެ.
މީގެ އިތުރުން ސަރުކާރުން ހިންގަމުންދާ ނޭއްގާނީ އަމަލުތަކާ ދެކޮލަށް އަޑުއުފުލާ ފަރާތްތައް ހިފައި ހައްޔަރުކޮށް، ފިޔަވަޅު އެޅުމަށް ސަރުކާރަށް ނިސްބަތްވާ ފަރާތްތަކުން ގޮވާލަމުންދާ ކަމަށެވެ. އަދި ސަރުކާރުން މަސައްކަތް ކުރަމުންދަނީ، ފަހަރަކު ހައްގަކަށް އަމާޒުކޮށްގެން، އެ ހައްގުތައް އުނިކޮށް، ގައިދުކުރަމުންގޮސް، ނިޒާމީ ސިފައެއްގައި، ރައްޔިތުންގެ މިނިވަންކަމާއި އަސަސީ ހައްގުތައް ދާއިމީ ގޮތެއްގައި ނަގައިލުމުގެ ނިޔަތުގައި ހުށަހަޅާފައިވާ ބިލެއް ކަމަށް މެންބަރު ވިދާޅުވެފައިވެއެވެ.
