ޤައުމު ތަމްސީލު ކުރުމަށްވުރެ ބޮޑު އުފަލެއް ނޯންނާނެ: ރޮނާލްޑޯ

އަމިއްލަ ޤައުމު ތަމްސީލު ކުރުމަށްވުރެ ބޮޑު އެހެން އެއްްވެސް އުފަލެއް ނޯންނާނެ ކަމަށް، ޕޯޗުގަލް ޤައުމީ ޓީމުގެ ކެޕްޓަން ކްރިސްޓިއާނޯ ރޮނާލްޑޯ ބުނެފި އެވެ.

އޭނާ މިހެން ބުނީ ޕޯޗުގަލް ޤައުމީ ޓީމުގައި އޭނާ ދައްކާފައިވާ ކުޅުމާއި، ޤައުމީ ޓީމާ އެކު ހޯދާފައިވާ ކާމިޔާބީތައް އަދި ޤައުމީ ޓީމަށް ރޮނާލްޑޯ ކޮށްދީފައިވާ ޚިދުމުގެ އަގު ވަޒަން ކުރުމުގެ ގޮތުން އޭނާ އަށް ދިން އެވޯޑާ ގުޅިގެންނެވެ. އެގޮތުން ޕޯޗުގަލް އަށް ނިސްބަތްވާ ބައެއް ކުޅުންތެރިން ޤައުމީ ޓީމަށް ކުޅުމަށް ދެކޮޅު ހަދާކަން ރޮނާލްޑޯ ވަނީ ފާހަގަ ކޮށްފަ އެވެ. އެކަން ފާހަގަކޮށް ރޮނާލްޑޯ ބުނީ، ޕޯޗުގަލް ޤައުމީ ޓީމަށް ކުޅެން ބައެއް ކުޅުންތެރިން ބޭނުން ނުވުމަކީ، އޭނާ އަށް ވަރަށް އުނދަގޫ ކުރުވާ ކަމެއް ކަމަށެވެ.

ޕޯޗުގަލް އާއެކު ގިނަ ކާމިޔާބީތަކެއް ހޯދާފައިވާ ރޮނާލްޑޯ ބުނީ، ޤައުމީ ޓީމަށް ކުޅެން ފުރުސަތު ލިބުމުން، އެ ފުރުސަތުގެ ބޭނުން ހިފަން ޖެހޭނެ ކަމަށެވެ. ވަރަށް އަވަހަށް ވަގުތުތައް ހުސްވަމުން ދާނެ ކަމަށާއި، ކަންކަން ބަދަލުވާނީ ވަރަށް އަވަހަށް ކަމަށް ރޮނާލްޑޯ ބުންޏެވެ. މީގެ އިތުރުން ރޮނާލްޑޯ ބުނީ، ޤައުމު ތަމްސީލު ކުރުމާއި، ޤައުމުގެ ސަޤާފަތުގެ ތެރޭގައި އުޅުމަށްވުރެ ވަކިން ބޮޑު އެހެން އެއްވެސް އުފަލެއް ނޯންނާނެ ކަމަށެވެ.

ބައިނަލްއަޤުވާމީ ބްރޭކުގައި ޕޯޗުގަލް އިން ކުޅުމަށް ހަމަޖެހިފައިވާ ދެ މެޗުގައި ވެސް ރޮނާލްޑޯ ފެންނާނެ ކަމަށް ބެލެވެ އެވެ. ޔުއެފާ ނޭޝަންސް ލީގުގައި މި މަހުގެ 16 ވަނަ ދުވަހު ޕޯޗަގަލް ނިކުންނާނީ ޕޮލެންޑާ ދެކޮޅަށެވެ. އަދި ދެ ވަނަ މެޗުގައި މި މަހުގެ 19 ވަނަ ދުވަހު ނިކުންނާނީ ކްރޮއޭޝިއާއާ ދެކޮޅަށެވެ.

ޕޯޗުގަލްގެ ސީނިއާ ޓީމުން ރޮނާލްޑޯ އަށް ޖާގަ ލިބުނީ 2003 ވަނަ އަހަރު އެވެ. މިހާރު އުމުރުން 39 އަހަރުވެފައިވާ ރޮނާލްޑޯ ވަނީ މިހާތަނަށް ޤައުމީ ޓީމަށް ކުޅެދިން 216 މެޗުގައި 133 ލަނޑު ޖަހައިފަ އެވެ. ރޮނާލްޑޯ އަކީ ޕޯޗުގަލް ޤައުމީ ޓީމަށް އެންމެ ގިނަ ލަނޑު ޖަހައިދީފައިވާ ކުޅުންތެރިޔާ އެވެ. އަދި އޭނާ އަކީ ބައިނަލްއަޤުވާމީ ފެންވަރުގައި ޤައުމީ ޓީމަށް އެންމެ ލަނޑު ޖަހައިދީފައިވާ ކުޅުންތެރިޔާ އެވެ. ރޮނާލްޑޯ ވަނީ ޕޯޗުގަލް ޤައުމީ ޓީމާ އެކު 2016 ވަނަ އަހަރުގެ ޔޫރޯ ފުޓުބޯޅަ މުބާރާތް ކާމިޔާބު ކުރުމުގެ އިތުރުން، 19-2018 ވަނަ އަހަރުގެ ޔުއެފާ ނޭޝަންސް ލީގު ވެސް ކާމިޔާބު ކޮށްފަ އެވެ.