ދޮގުހެދުމަކީ ދެވި ހިފާކަމެއް، މި ސަރުކާރުގެ "ދޮގުހެދުމަށް" ރީހެބެއް ބޭނުންވޭ: އާޒިމް

ދޮގުހެދުމަކީ ދެވި ހިފާކަމެއް ކަމަށާއި މި ސަރުކާރުގެ "ދޮގުހެދުމަށް" ރީހެބެއް ބޭނުންވާ ކަމަށް މާލެ ސިޓީ ކައުންސިލްގެ މޭޔަރ އާދަމް އާޒިމް ވިދާޅުވެއްޖެއެވެ.

އޭނާ އެފަދައިން ވިދާޅުވީ އެމްޑީޕީގެ "ފުދިއްޖެ، ފުނޑިއްޖެ" ޖަލްސާގައި ވާހަކަދައްކަވަމުންނެވެ.

އެ ޖަލްސާގައި މި ސަރުކާރަށް ފާޑު ވިދާޅުވެ ވާހަކަަދައްކަވަމުން އާޒިމް ވަނީ ސަރުކާރުން އިންތިހާ އަށް ދޮގު ހަދާކަމަށް ސިފަކުރައްވާ އެކަމަށް ވަރަށް ބޮޑަށް ފާޑު ވިދާޅުވެފައެވެ. ސިނގިރެޓަށް ދެވި ހިފާފައި ހުންނަ މީހަކަށް ސިނގިރެޓް ނުބޮއެ ނިދި ނާންނަ ފަދައިން މި ސަރުކާރުގެ މީހުންނަށް ވެސް ދޮގެއް ހަދާނުލާ ނިދާ ނުލެވޭ ކަމަށް އާޒިމް ސިފަކުރެއްވިއެވެ. އެގޮތުން ސަރުކާރުން ދޮގު ނުހަދާ އެންމެ ދުވަހެއް ވެސް ވޭތުވެގެން ނުދާ ކަމަށް އާޒިމް ވަނީ ވިދާޅުވެފައެވެ. ސައިކޮލޮޖިސްޓުން ބުނާގޮތުން ދޮގުހެދުމަކީ ދެވި ހިފާކަމެއް ކަމަށާއި އެ ބީދައިން ބަލާ ނަމަ ދުންފަތުން ޓެކްސް ބޮޑުކުރާ ފަދައިން މި ސަރުކާރުގެ ދޮގުހެދުމުން ވެސް ޓެކްސް ބޮޑުކުރުން ރަނގަޅުވާނެ ކަމަށް އޭނާ ވިދާޅުވިއެވެ. އެކަން އެގޮތަށް ކޮށްފި ނަމަ މި ސަރުކާރުން ދޮގު ހަދާ ނިސްބަތަށް ބަލާއިރު ދަރަނި ދައްކާނެހާ ފައިސާ ލިބޭނެކަމަށް އާޒިމް ވަނީ ސިފަކުރައްވާފައެވެ. އާޒިމް ވަނީ ބަޖެޓުގައި ޖަހައިގެން ނަމަވެސް އެފަދަ ދޮގުހަދާ މީހުންނަށް ރީހަބެއް ޤާއިމްކޮށްދިނުމަށް، އެމްޑީޕީގެ ޕީޖީ ލީޑަރ އިބްރާޙިމް ނާޒިލްގެ އަރިހުން އެެދިވަޑައިގަންނަވާފައެވެ. އެކަން ނުކޮށް ޤައުމު ސަލާމަތްކުރެވޭނެ އެހެން ގޮތެއް ނެތް ކަމަށް އޭނާ ވަނީ ވިދާޅުވެފައެވެ.

އެ ޖަލްސާގައި އިތުރަށް ވާހަކަދައްކަވަމުން އާޒިމް ވިދާޅުވީ ފެންނަމުން ދަނީ މި ސަރުކާރުން ހުރި ތަންތަން ހުޅުވަމުންދާ މަންޒަރު ކަމަށެވެ. އެގޮތުން ކުރީގެ ރައީސަކު އަޅާދެއްވި ހޮސްޕިޓަލެއް ވަރަށް އަވަހަށް ހުޅުވާދިނުމަށް ސަރުކާރުން ތައްޔާރުވަމުންދާ ކަމަށް އާޒިމް ވިދާޅުވިއެވެ. އާޒިމް ވަނީ މިވަރުން ދާނަމަ ޢީދު މިސްކިތް ވެސް ހުކުރު މިސްކިތްވެސް އަލުން ހުޅުވާނެ ކަމަށް ވިދާޅުވެފައެވެ. އެކަން އެގޮތަށް ހިނގަނީ މި ސަރުކާރަށް އެއް ކަމެއް ވެސް ނުކުރެވޭތީ ކަމަށް އާޒިމް ވަނީ ވިދާޅުވެފައެވެ. އެއް އަހަރު ވެގެން ދިޔައިރު ގާބުރި އެއްވެސް ސަރުކާރަށް ބޭއްވިފައި ނުވާ ކަމަށް އާޒިމް ވިދާޅުވިއެވެ. ނިމިދިޔަ ރައީސް އިބްރާހިމް މުހައްމަދު ޞާލިހުގެ ސަރުކާރުގައި 11 ދުވަހުން ވެސް ޕްރޮޖެކްޓްތައް ނިންމާފައި ހުންނާނެ ކަމަށް އާޒިމް ވިދާޅުވިއެވެ. ކުރީ ސަރުކާރުތަކުން ކުރި ކަންކަމުގެ ކްރެޑިޓް ނަގަން ޖެހެނީ މި ސަރުކާރަށް ކަންކަން ނުކުރެވޭތީ ކަމަށް އާޒިމް ވިދާޅުވިއެވެ. އާޒިމް ވަނީ އޭނާގެ ވާހަކައިގައި އާރްޓީއެލްގެ ޚިދުމަތަށް ވެސް އަލިއަޅުވާލާފައެވެ. އެގޮތުން ކުރީ ސަރުކާރު ވެރިކަމުގައި އޮތް ނަމަ މިހާރު އާރްޓީއެލްގެ ޚިދުމަތް ވެސް އިތުރު ރަށްތަކަށް ފުޅާވީސް ކަަމސް އާޒިމް ވިދާޅުވިއެވެ.

އިތުރަށް ވާހަކަދައްކަވަމުން އާޒިމް ވަނީ މި ސަރުކާރުން ބޯހިޔާވަހިކަމުގެ މައްސަލަ އަށް ވެސް ހައްލެއް ހޯދާ ދީފައި ނުވާ ކަމަށާއި ސަރުކާރަށް އެއްކަމެއް ވެސް ރަނގަޅަށް ނުވާ ކަމަށެވެ. އެމްޑީޕީ އަކީ މަދު ލާރިކޮޅަކުން ކަންކަން ކުރަން އެނގޭ ބައެއް ކަމަށާއި އެކަން އެމްޑީޕީން ވަނީ ސާބިތުކޮށްދީފައި ކަމަށް އާޒިމް ވިދާޅުވިއެވެ. އެގޮތުން ހަ މަސް ތެރޭގައި ތަޅާ ސުންނާފަތިކޮށްފައި ކުރިން ހުރި އާސަހަރާ މިސްކިތުގެ މަސައްކަތް ނިންމާ، 15 އަހަރު ވަންދެން ހައްލު ނުވެ އޮތް ބުޅަލުގެ މައްސަލަ ހައްލުކޮށްދިނީ އެމްޑީޕީގެ ކުޅަދާނަކަމުން ކަމަށް އޭނާ ވަނީ ވިދާޅުވެފައެވެ. އެމްޑީޕީގެ ސަރުކާރެއްގައި ރައްޔިތުން މާޔޫސްވާކަށް ނުޖެހޭނެ ކަމަށާއި ރައްޔިތުން ތަކެތީގެ އަގުބޮޑުވެގެން ޝަކުވާ ކުރަން ނުޖެހޭނެ ކަަމަށް އާޒިމް ވިދާޅުވިއެވެ.