އިންތިހާއަށް ބޭކާރު ޚަރަދު ކުރުމަކީ މިސަރުކާރުގެ އެންމެ ކަމުނުދާ އެއްސިފަ: ފައިސަލް
11 ނޮވެމްބަރު 2024 | ހޯމަ 07:44ވާހަކަތައް ދައްކައި އަމަލު ކުރަންޖެހޭނީ އެއް އުސޫލަކުން، ނަމަވެސް އެގޮތަށް އެކަން ނުހިނގާ
ފަށާއިރު ޕްރޮގްރާމްގައި ކުރީގެ ނައިބު ރައީސް ފައިސަލް ނަސީމް ވާހަކަދައްކަވަނީ
އިންތިހާއަށް ބޭކާރު ޚަރަދު ކުރުމަކީ މިސަރުކާރުގެ އެންމެ ކަމުނުދާ އެއްސިފަ ކަމަށް ކުރީގެ ނައިބު ރައީސް ފައިސަލް ނަސީމް ވިދާޅުވެއްޖެއެވެ.
ހޯމަ ދުވަހު ރާއްޖެޓީވީ ފަށާއިރު ޕްރޮގްރާމްގައި ފައިސަލް ވިދާޅުވީ މި ސަރުކާރުގައި އެންމެ ކަމުނުދާ ސިފައަކީ އިންތިހާއަށް ބޭކާރު ޚަރަދު ކުރުން ކަމަށާއި، އިސްރާފު ވަރަށް ބޮޑު ކަމަށެވެ.
މިސަރުކާރުގެ އަމަލުތަކަށް އިޝާރާތް ކުރައްވައި ފައިސަލް ވިދާޅުވީ ވާހަކަތައް ދައްކައި އަމަލު ކުރަންޖެހޭނީ އެއް އުސޫލުކުން ކަމަށެވެ. ނަމަވެސް އެގޮތަށް އެކަން ނުހިނގާ ކަމަށް ފައިސަލް ވިދާޅުވިއެވެ. މިސަރުކާރުގައި އެއްކަހަލަ ކަންތައްތަކެއް ކުރާއިރު، އެއްކަން ގޯސްވެފަ ހަމަ އެޒާތުގެ މާ ގޯސް އެހެންކަހަލަ ކަންތައްތަކެއް ކުރާއިރު އެކަންކަން މިސަރުކާރަށް ނުފެންނަ ކަމަށާއި، އެއީ ގަބޫލުކުރެވޭ ކަމެއް ނޫން ކަމަށް ފައިސަލް ވިދާޅުވިއެވެ.
މީގެ އިތުރުން ފައިސަލް ވަނީ ސަރުކާރުގެ ހިންގުމުގެ ނިޒާމަށް ވެސް ވަރަށް ބޮޑަށް ފާޑު ވިދާޅުވެފައެވެ.
ފައިސަލް ވިދާޅުވީ މި ނިޒާމުގެ ތެރޭގައި ދައުލަތަށް ނުގުޑާ ވަރަށް ބޭފުޅުން އެބަތިބި ކަމަށާއި، ހަރުދަނާ އުސޫލެއްގެ ތެރެއިން އެކަން ރަނގަޅުކުރަންޖެހޭ ކަމަށެވެ. ވަކި ދިމާލަކުން އެކަނި ބޭފުޅުން މަދުކުރި ނަމަވެސް ހައްލު ނުލިބޭނެ ކަމަށް ފައިސަލް ވިދާޅުވިއެވެ.
މި ސަރުކާރުގެ ހާމަކަމުގެ ސިޔާސަތަަށް އިޝާރާތް ކުރައްވައި ފައިސަލް ވިދާޅުވީ ކުރީ ސަރުކާރުގެ ކަންކަން ސިއްރު ކުރި ކަމަށް މިސަރުކާރުގެ ބޭފުޅުން ވާހަކަ ދެއްކެވި ނަމަވެސް މިސަރުކާރުގެ ސިއްރުކަން މާ ބޮޑު ކަމަށެވެ. މުޅި މަންޒަރު ފެނިގެންދަނީ ތަފާތުކޮށް ކަމަށް ފައިސަލް ވިދާޅުވިއެވެ.
ފައިސަލް ވިދާޅުވީ ގައުމުގެ ކަންކަމުގައި މިސަރުކާރުގެ ބޭފުޅުން ސީދާ އޮޅޭގޮތަށް ވާހަކަތައް ދައްކަވާ ކަމަށާއި، އެއީ ވަރަށް ގޯސް ކަމެއް ކަމަށެވެ. އަދި ސީދާ ތެދުބަހުން ވާހަކަތައް ދައްކައި، އަންނަން އޮތް ޖީލުތަކަށް މިސާލު ދައްކަންޖެހޭ ކަމަށް ފައިސަލް ވިދާޅުވިއެވެ.
