އެމެރިކާ އާއި އިނގިރޭސިވިލާތުން ޔަމަނުގެ ޕްރޮވިންސްތަކަކަށް ހަމަލާދީފި: ރިޕޯޓް

އެމެރިކާ އާއި އިނގިރޭސިވިލާތުން ޔަމަނުގެ 2 ޕްރޮވިންސަކަށް އަމާޒުކޮށް ހަމަލާދީފިކަމަށް ރިޕޯޓްތައް ބުނެފިއެވެ.

ހޯމަ ދުވަހުގެ ފަތިހު ޔަމަނުގެ ހޫތީން ހިންގާ ނޫހެއް ކަމަށްވާ އަލް-މަސީރާ ޓީވީ އިން ބުނެފައިވަނީ އަމްރާން އަދި ސަޢާދާ ޕްރޮވިންސްތަކަށް އަމާޒުކޮށް ވައިގެ ހަމަލާތަކެއް ދީފައިވާ ކަމަށާއި، މިހަމަލާތައް ދީފައިވަނީ އެމެރިކާ އާއި އިނގިރޭސިވިލާތުން ކަމަށެވެ. މީގެ އިތުރުން، ޔަމަނުގެ ވެރިރަށް ސަނާ އާއި އޭގެ ކައިރި ސަރަޙައްދުތަކަށާއި އަމްރާން ޕްރޮވިންސަށް ގާތްގަނޑަކަށް 9 ފަހަރު ހަމަލާދީފައިވާކަމަށް ވެސް އެނޫހުން ވަނީ ބުނެފައެވެ.

އެމެރިކާ އާއި އިނގުރޭސިވިލާތުން ޔަމަނަށް ހަމަލާދީފައިވާކަމަށް ރިޕޯޓް ލިބޭއިރު، ހޫތީން އަންނަނީ ފާއިތުވި އަހަރުގެ ނޮވެމްބަރު މަހުން ފެށިގެން ޔަމަނާ ކައިރި ސަރަޙައްދުތަކުން ދަތުރުކުރާ ބައިނަލްއަޤްވާމީ ބޯޓުތަކަށް ހަމަލާ ދެމުންނެވެ. އެގޮތުން ވޭތުވެ ދިޔަ އޮކްޓޫބަރު މަހު ޔަމަނުގެ ހޫތީންގެ މިސައިލް އާއި ޑްރޯން ހަމަލާތަކެއް ރަތްކަނޑުގައި ދަތުރުކުރަމުންދިޔަ ދެ އުޅަނދަކަށް އަމާޒުވެ، ބޮޑެތި ގެއްލުންތަކެއް އެ އުޅަނދުތަކަށް ލިބުނު މަންޒަރުތައް ވެސް ވަނީ އާއްމުވެފައެވެ. މީގެއިތުރުން، ހުދައިދާ ބަނދަރުން ގާތްގަނޑަކަށް 110 ކިލޯމީޓަރު (70 މޭލު) ދުރުން ދަތުރުކުރަމުންދިޔަ ޕެނަމާގެ ދިދަ ނަގާފައިވާ ތެޔޮ ޓޭންކަރު "ކޯޑީލިއާ މޫން" އަށްވެސް ވަނީ ހަމަލާދީފައެވެ.

މިހަމަލާތަކުގެ ސަބަބުން އުޅަނދުފަހަރުގެ ވެރިން ވަނީ ރަތް ކަނޑާއި ސުވެޒް ކެނާލުގެ ބަދަލުގައި އެފްރިކާގެ ދެކުނު ކައިރިން ވަށައިގެން ދަތުރުކުރާ ދިގު މަގު ބޭނުންކުރަން ފަށާފައެވެ.