ދައުރު ފަށާ ދުވަހަކަށް ނޮވެންބަރު 11، ރިޔާސީ އަދި މަޖިލިސް އިންތިޚާބު އެކީގައި ބޭއްވުމަށް ގާނޫނު އަސާސީއަށް އިސްލާހު ހުށަހަޅަނީ
ޖުމްހޫރީ ދުވަހަކީ ނޮވެންބަރު 11 ށް ވާއިރު، ދައުރު ފަށާ ދުވަސް ބަދަލު ކުރަން ބޭނުންވޭ
އާދިއްތަ ދުވަހުގެ ރޭ ބޭއްވި ޖުމްހޫރީ ދުވަހުގެ ރަސްމީ ޖަލްސާގެ ތެރެއިން
ދައުރު ފަށާ ދުވަހަކަށް ނޮވެންބަރު 11، ރިޔާސީ އަދި މަޖިލިސް އިންތިޚާބު އެކީގައި ބޭއްވުމަށް ގާނޫނޫ އަސާސީއަށް އިސްލާހު ހުށަހަޅާނެ ކަަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
އާދިއްތަ ދުވަހުގެ ރޭ ބޭއްވި ޖުމްހޫރީ ދުވަހުގެ ރަސްމީ ޖަލްސާގައި ރައީސް މުއިއްޒު ވިދާޅުވީ ސިޔާސީ ގޮތުންނާއި، އަދިވެސް އެކިއެކި ސަބަބުތަކާއި ގުޅިގެން ޖުމްހޫރީ ދުވަސް ހަފްތާއެއް ލަސްވެފައިވާ ކަމަށާއި، ދައުރު ފަށާ ދުވަސް ނޮވެންބަރު 17 އަށް ބަދަލުވެފައިވާ ކަމަށެވެ. ނަމަވެސް ޖުމްހޫރީ ދުވަހަކީ ނޮވެންބަރު 11 ށް ވާއިރު، ދައުރު ފަށާ ދުވަސް ބަދަލު ކުރަން ބޭނުންވާ ކަމަށެވެ. އަދި މި ނިންމުން ނިންމާނީ ރައްޔިތުން ކަމަށާއި، ރައްޔިތުންގެ މަޖިލީހަށް ގާނޫނު ބަދަލު ކުރަން ހުށަހަޅުއްވާނެ ކަމަށް، މަޖިލީހުގެ މެޖޯރިޓީ ކޮންޓްރޯލް ކުރައްވާ ރައީސް މުއިއްޒު ވިދާޅުވިއެވެ.
ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބަށް އިޝާރާތް ކުރައްވައި ރައީސް މުއިއްޒު ވިދާޅުވީ، މި ދެ އިންތިޚާބު އޮންނަނީ ކައިރި ކައިރީގައި ކަމަށާއި، އެކުގައި ބާއްވާން ބޭނުންވާ ކަމަށެވެ. ވަކިވަކިން ދެ އިންތިޚާބު ބޭއްވުމުން ވަރަށް ބޮޑު ހަރަދެއް ހިނގާ ކަމަށް ރައީސް މުއިއްޒު ވިދާޅުވިއެވެ. ނަމަވެސް މިކަން މިގޮތަށް ނިންމާނީ ރައްޔިތުން އެކަމަށް ރުހޭނަމަ ރައްޔިތުންގެ މަޖލީހުން ކަމަށް ރައީސް މުއިއްޒު ވިދާޅުވިއެވެ.
މީގެ އިތުރުން ރައީސް މުއިއްޒު ވިދާޅުވީ ރިޔާސީ އިންތިޚާބުގެ ދެވަނަ ބުރު އުވާލަންޖެހޭ ކަމަށާއި، އެމަސައްކަތް ކުރުމަށް މިހާރު އެޓާނީ ޖެނަރަލްއާ ގުޅިގެން ދިރާސާ ކުރުމުގެ މަސައްކަތްތައް ކުރިއަށްދާ ކަމަށެވެ. އަވައްޓެރި ބައެއް ގައުމުތައް ހިމެނޭ ގޮތަށް ދުނިޔޭ އެކިއެކި ގައުމުތަކުން އެއުސޫލަށް އަމަލުކުރަމުންދާ ކަމަށާއި، ރާއްޖެއަށް އެންމެ ރަނގަޅު ގޮތް ބަލާނެ ކަމަށް އެމަނިކުފާނު ވިދާޅުވިއެވެ.
ރައީސް މުއިއްޒު ވިދާޅުވީ ގައުމުގައި ހުރި މިފަދަ މުހިންމު ކަންކަމަށް ރައްޔިތުންގެ ގާތުގައި އަހައި، ރައްޔިތުން އެދޭ ގޮތަށް ބަދަލު ގެންނަވާނެ ކަމަށެވެ. އަދި މިގޮތަށް ކަންކަން ކުރުމުން ހަރަދު ވަރަށް ބޮޑަށް ކުޑަވެގެންދާނެ ކަމަށް އެމަނިކުފާނު ވިދާޅުވިއެވެ.
