އަމިއްލަ ބޭނުމަށް ޑިއުޓީ އާ ނުލައި ގެނެވޭނީ 10،000ރ ގެ ތަކެތި ކަމަށް ކަނޑައަޅައިފި

އަމިއްލަ ފަރާތްތަކުން ކުދިކުދި ބޭނުންތަކަށް ރާއްޖޭން ބޭރުން ގެންނަ ތަކެއްޗަށް ޑިއުޓީ މާފު ކުރެވޭނީ އެފްއޯބީ އަގުން 10،000 ރުފިޔާގެ ގެ ތަކެއްޗަށް ކަމަށް ސަރުކާރުން ކަނޑައަޅައިފިއެވެ.

މިގޮތައް ކަނޑައަޅާފައިވަނީ، ރައީސުލް ޖުމްހޫރިއްޔާގެ އޮފީހުން އެކުލަވާލައި، ނޮވެމްބަރު މަހުގެ 9 ވަނަ ދުވަހު ގެޒެޓް ކުރި, "ދަތުރުވެރިން ގެންނަ ތަކެއްޗާއި، އަމިއްލަ ފަރާތްތަކުގެ ކުދިކުދި ބޭނުންތަކަށް ގެންނަ ތަކެއްޗާއި، ވިޔަފާރި ސާމްޕަލުގެ ގޮތުގައި ގެންނަ ތަކެތިން ޑިއުޓީ މާފު ކުރުމުގެ އުސޫލު" ގެ ދަށުންނެވެ.

މި އުސޫލުގައި ބުނެފައިވަނީ، ބިދޭސީންގެ ނަމުގައި ގެންނަ ތަކެތިން ޑިއުޓީ ނުނަގާ ދޫ ނުކުރެވޭނެ ކަމަށެވެ.

މުދަލަށް ނުވަތަ ޝިޕްމަންޓަށް ކަސްޓަމްސް އިން ކަނޑައަޅާ އެފްއޯބީ އަގު 10،000ރ އަށް ވުރެ ބޮޑު ނަމަ އެތަކެއްޗަށް ގުޑްސް ޑެކްލަރޭޝަން ހުށަހަޅަން ޖެހޭ ގޮތައް ވަނީ ކަނޑައަޅާފައެވެ. އަދި 10،000 ރުފިޔާ އަށް ވުރެ ބޮޑު ނަމަ އިތުރުވާ ބަޔަށް ޑިއުޓީ ދައްކަން ޖެހޭނެ ކަމަށް ވެސް އުސޫލު ބުނެއެވެ.

ސަރުކާރުން މިހާރު ކަނޑައަޅާފައިވާ އުސޫލުގައި ބުނަނީ، އަމިއްލަ ބޭނުމަށް އެތެރެކުރާ އެއްޗެއްގެ އަގު 10،000 ރުފިޔާ އަށް ވުރެ ކުޑަ ނަމަވެސް އެތަކެތީގެ ބާވަތާއި އަދަދާއި އަގާއި ގެންނަ ނިސްބަތައް ބަލާއިރު، އެއީ އަމިއްލަ ކުދިކުދި ބޭނުންތަކަށް ދޫކުރެވޭ ވަރަށް ވުރެ ގިނަ ތަކެތި ކަމަށް ވާނަމަ، ގުޑްސް ޑެކްލަރޭޝަން ހުށަހަޅައި އެތަކެއްޗަށް ޑިއުޓީ ދައްކަން ޖެހޭނެ ކަމަށެވެ.