ގެދޮރުވެރިކަމަކީ އެންމެ ދަތިވެފައި އޮތްކަން، ނިމިފަ ހުރިތަންތަން އަލުން އިވަލުއޭޓްކުރުން އެއީ ކުރެވޭނެ ކަމެއް ނޫން: ރައީސް ޔާމީން
ފްލެޓް ލިސްޓު އިވެލުއޭޓް ކުރުމުގެ މަސައްކަތް މިހާރު ގެންދަނީ ސީދާ ހައުސިންގ މިނިސްޓްރީން ކަމަށްވަނީ ބުނެފައި
ކުރީގެ ރައީސް ޢަބްދުﷲ ޔާމީން އަދި ރައީސް ޑރ.މުޙައްމަދު މުއިއްޒު
ގެދޮރުވެރިކަމަކީ އެންމެ ދަތިވެފައި އޮތްކަން ކަމަށާއި ނިމިފަ ހުރިތަންތަން އަލުން އިވަލުއޭޓްކުރުން އެއީ ކުރެވޭނެ ކަމެއް ނޫން ކަމަށް ކުރީގެ ރައީސް އަބްދުﷲ ޔާމީން އަބްދުލް ޤައްޔޫމް ވިދާޅުވެއްޖެއެވެ.
އެމަނިކުފާނު އެފަދައިން ވިދާޅުވީ ޕީއެންއެފްގެ ޖަލްސާގައި ވާހަކަދައްކަވަމުންނެވެ.
ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުން ދިން ފްލެޓާއި ގޯތި ނުދީ ސަރުކާރުން ހިފަހައްޓާތީ އެމަނިކުފާނު ވަނީ އެކަމާއި މެދު ކަންބޮޑުވުން ފާޅުކުރައްވާފައެވެ. އެކަމަކީ އެއީ އެއްވެސް ސަރުކާރަކަށް ކުރެވޭނެ ކަމެއް ނޫން ކަމަށް އެ މަނިކުފާނު ވިދާޅުވިއެވެ. މިހާރުވެސް ފްލެޓްތަކެއް ސަރުކާރުން ދިނުމުން ދެން އަނެއްކާ އަންނަ ސަރުކާރަކުން އެ ފްލެޓްތައް އަތުލަންވީތޯ ރައީސް ޔާމީން ވަނީ ސުވާލުކުރައްވާފައެވެ. ރައީސް ޔާމީން ވަނީ އެއީ ހަމަޖެހޭ އުސޫލެއް ނޫންކަމަށް ފާހަގަކުރައްވާ އެކަމަށް ފާޑު ވިދާޅުވެފައެވެ. އެއްވެސް ސަރުކާރަކުން ދީފައި ހުރި ފްލެޓެއް އަތުލެވޭނީ ނުވަތަ އަލުން އެ މައްސަލަ ބެލޭނީ އޭސީސީ އަށް ވެސް އެކަމުގައި މައްސަލަ އެއް ހުރިކަން ސާބިތުކޮށްދީގެން ކަމަށާއި މިހާރު ފްލެޓްތައް ނުދީ ހިފެހެއްޓުމުގައި އެފަދަ ހާލަތެއް ނެތް ކަމަށް ރައީސް ޔާމީން ވިދާޅުވިއެވެ. ރައީސް ޔާމީން ވަނީ މިއީ ސަރުކާރުން ވަރަށް ދެރަވަރުކޮށް ކުރާ ކަމެއް ކަމަށް ވެސް ވިދާޅުވެފައެވެ. އަދި މިހާރު ސަރުކާރުން މަސައްކަތް ކުރަނީ ސަރުކާރުން ޤަބޫލުކުރާ ވަކި ބަޔަކަށް ފްލެޓްތައް ދިނުމަށް ކަމަށާއި އެ ސަގާފަތް ރާއްޖެއިން ފެނިގެންދާ ކަމަށް ވެސް ރައީސް ޔާމީން ވިދާޅުވިއެވެ.
މި ސަރުކާރުން ހެދި ފުލެޓު ލިސްޓު ވެސް އެންމެ ފަހުން ރަނގަޅު ނޫން ކަމަށް ކަނޑައަޅާ، 'ގެދޮރުވެރިޔާ" ސްކީމަށް ހުށަހެޅި ހުރިހާ ފޯމެއް އަލުން އިވެލުއޭޓު ކޮށް ފްލެޓް ލިސްޓު އެކުލަވާލުމުގެ މަސައްކަތް ކުރިއަށް ގެންދާ ކަމަށް ހައުސިންގ މިނިސްޓްރީން ދަނީ ބުނަމުންނެވެ. ހައުސިންގ މިނިސްޓްރީން ނެރުނު ނޫސްބަޔާނެއްގައި ބުނީ ރައީސުލް ޖުމްހޫރިއްޔާގެ ލަފާފުޅުގެ މަތިން އުފެއްދި 'ހައުސިންގ އެޑްވައިޒަރީ ކޮމިޓީ' އާއި މާލޭ ސިޓީ ކައުންސިލުން އެކުލަވާލި 'ހައުސިންގ ކޮންސަލްޓޭޓިވް ކޮމިޓީ' އިން އެކުލަވާލި ފްލެޓް ލިބޭ މީހުންގެ ދާއިމީ ލިސްޓުވެސް ރަނގަޅު ކަމަށް ނުފެންނަ ކަމަށެވެ.
މިކަމަށް އެކުލަވާލި ކޮމިޓީތަކުގެ މަސައްކަތް ގޯސްވުމުގެ ސަބަބުން ލިސްޓު އިވެލުއޭޓް ކުރުމުގެ މަސައްކަތް މިހާރު ގެންދަނީ ސީދާ ހައުސިންގ މިނިސްޓްރީން ކަމަށް ނޫސް ބަޔާނުގައި ބުނެފައިވެއެވެ. "ރައީސުލްޖުމްހޫރިއްޔާގެ ލަފާފުޅުގެ މަތިން އެކުލަވައިލެވުނު 'ހައުސިން އެޑްވައިޒަރީ ކޮމިޓީ' އާއި މާލެ ސިޓީ ކައުންސިލުން އެކުލަވައިލި 'ހައުސިން ކޮންސަލްޓެޓިވް ކޮމިޓީ' އިން ވެސް 'ގެދޮރުވެރިޔާ' ސްކީމުގެ ދާއިމީ ލިސްޓު އެކުލަވައިލާފައިވާ ގޮތް ރަނގަޅު ކަމަށް ނުފެންނާތީ، މި ސްކީމުގެ ދަށުން ހުށަހަޅާފައިވާ ހުރިހާ އެޕްލިކޭޝަން ފޯމުތައް ރީ-އިވެލުއޭޓް ކުރުމުގެ މަސައްކަތް މި މިނިސްޓަރީން ވަނީ ފަށައިފަ އެވެ." ހައުސިންގ މިނިސްޓްރީގެ ބަޔާނުގައި ވެއެވެ.
