ގެދޮރުވެރިކަމުގެ ބަޖެޓުގައި ގެދޮރުވެރިކަމަށް ހިމަނާފައި އޮތީ މިދިޔަ ތިން އަހަރަށް ވުރެ ވެސް ދަށް އަދަދެއް: އަމީރު
ބަޖެޓުގައި ގެދޮރުވެރިކަމާއި ބޯހިޔާވަހިކަމުގެ މަޝްރޫއުތަކަށް ހިމަނާފައި ވަނީ 2.7 ބިލިއަން ރުފިޔާ
އެމްޑީޕީން ބޭއްވި ނޫސްވެރިންގެ ބައްދަލުވުމުގައި ކުރީގެ ފިނޭންސް މިނިސްޓަރު އިބްރާހިމް އަމީރު ވާހަކަދައްކަވަނީ
2025 ވަނަ އަހަރުގެ ބަޖެޓަކީ ގެދޮރުވެރިކަމުގެ ބަޖެޓެއްގެ ގޮތުގައި މިސަރުކާރުން ސިފަކުރި ނަމަވެސް ބަޖެޓުގައި ގެދޮރުވެރިކަމުގެ މަޝްރޫއުތައް ހިމަނާފައި އޮތީ މިދިޔަ ތިން އަހަރަށް ވުރެ ވެސް ދަށް އަދަދެއްގެ ކަމަށް ކުރީގެ ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.
ބުރާސްފަތި ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމެއްގައި އަމީރު ވަނީ ވަރަށް ތަފްސީލުކޮށް 2025 ވަނަ އަހަރަށް ސަރުކާރުން ހުށަހަޅާފައިވާ ބަޖެޓް ހިއްސާކޮށްދެއްވާފައެވެ.
އަމީރު ވިދާޅުވީ 2025 ވަނަ އަހަރުގެ ބަޖެޓަކީ ގެދޮރުވެރިކަމުގެ ބަޖެޓުގެ ގޮތުގައި ސިފަ ކުރި ނަމަވެސް ގެދޮރުވެރިކަމުގެ ބަޖެޓު ވޭތުވެދިޔަ 3 އަހަރަށް ވުރެ ދަށް ކަމަށެވެ. އަދި ވިދާޅުވީ ބަޖެޓުގައި ގެދޮރުވެރިކަމާއި ބޯހިޔާވަހިކަމުގެ މަޝްރޫއުތަކަށް ހިމަނާފައި ވަނީ 2.7 ބިލިއަން ރުފިޔާ ކަމަށެވެ.
ޕީއެސްއައިޕީ މަޝްރޫއުތަކުގެ ދެބައިކުޅަ އެއްބައި މަދުވެގެން 50 އިންސައްތަ ކޮންމެ އަހަރަކު ކަނޑައަޅާނީ ގެދޮރު ބިނާ ކުރުމަށް ކަމަށް ރައީސް ޑރ. މުހައްމަދު މުއިއްޒު ވިދާޅުވެފައިވާތީ އެކަމަށް ރައްދުދެއްވައި އަމީރު ވިދާޅުވީ މިސަރުކާރުން މަސައްކަތް ކުރަނީ ހުށަހަޅާފައިވާ ބަޖެޓުން އަނެއްކާ ވެސް ބޮޑު އޮޅުވާލުމެއް އޮޅުވާލުމަށް ކަމަށާއި، އެއަދަދަށް ބަޖެޓްކޮށްފައިނުވާ ކަމަށެވެ.
މީގެ އިތުރުން އަމީރު ވިދާޅުވީ މިސަރުކާރުން ހަރަދު ބޮޑުކޮށްފައިވަނީ އިދާރީ ކަންކަމަށް ކަމަށެވެ.
އެގޮތުން އިގްތިސާދީ ތަރައްގީއަށް ހޭދަކުރާ މިންވަރު 2024 އަށްވުރެ 18 ޕަސެންޓް ދަށް ކަމަށާއި، ގެދޮރުވެރިކަމަށް ހޭދަކުރާ މިންވަރު 2024 އަށް ވުރެ 20 ޕަސެންޓް ދަށް ކަމަށެވެ. އަދި އިދާރީ ކަންކަމަށް ކުރާ ހަރަދު 23 ޕަސެންޓް އިތުރުވެފައިވާއިރު، ހަރަދު އިތުރު ކުރަނީ ރައްޔިތުންނާ ގުޅުން ނެތް ދައުލަތުގެ އޮފީސްތަކުގެ ހަރަދުތަކަށް ކަމަށާއި، ސަރުކާރުގެ ވެރިންގެ ބޭނުންތަކަށް ކަމަށް އޭނާ ވިދާޅުވިއެވެ.
