ޤައުމީ ތަރައްޤީގެ ޕްލޭން އެކުލަވާލުމަށް އަހަރެއް، ރައްޔިތުންގެ ލަފާ ވެސް ބޭނުން: ހައިދަރު
6 ނޮވެމްބަރު 2024 | ބުދަ 09:55ޕްލޭން އެކުލަވާލާނީ އެއް އަހަރު ދުވަހުގެ މުއްދަތެއްގެ ތެރޭގައި
ޤައުމީ ތަރައްޤީ ޕްލޭން އެކުލަވާލުމަށް ބޭއްވި މަޝްވަރާ ބައްދަލުވުމުގައި މިނިސްޓަރު ހައިދަރު
20 އަހަރުގެ ޤައުމީ ތަރައްޤީ ޕްލޭން އެކުލަވާލުމުގައި ކޮންމެ ރައްޔިތެއްގެ ފުރިހަމަ އެއްބާރުލުމާއި އަމިއްލަ ޙިޔާލާޢި ލަފާ ބޭނުންވާނެކަމަށް ގެދޮރުވެރިކަމާއި ބިމާއި އުމްރާނީ ތަރައްޤީއާ ބެހޭ ވަޒީރު ޑރ. ޢަލީ ޙައިދަރު އަޙުމަދު ވިދާޅުވެއްޖެއެވެ.
ޤައުމީ ތަރައްޤީގެ ޕްލޭން އެކުލަވާލުމުގެ މަސައްކަތް ފެށުމުގެ ގޮތުން ޒުވާނުންގެ މަރުކަޒުގައި ބޭއްވި ޙާއްސަ ރަސްމިއްޔާތުގައި ވާހަކަދައްކަވަމުން ވަޒީރު ވިދާޅުވީ އެ ޕްލޭން އެކުލަވާލާނީ އެއް އަހަރު ދުވަހުގެ މުއްދަތެއްގެ ތެރޭގައި ކަމަށެވެ. އެހެންކަމުން އެ މުއްދަތުގެ ތެރޭގައި އެންމެ ފައިދާހުރި ޕްލޭންއެއް އެކުލަވާލުމަށް ހުރިހާ ރައްޔިތުންގެ ޝާމިލުވުން މުހިންމުވާނެކަމަށް ވެސް ވަޒީރު ވިދާޅުވިއެވެ.
މީގެއިތުރުން ވަޒީރު ވިދާޅުވީ އެ ޕްލޭނަކީ އިޖުތިމާއީ އިޤްތިސާދީ ތަރައްޤީއަށާއި، ތިމާވެށި ރައްކާތެރިކުރުމަށާއި، ދުނިޔޭގެ މޫސުމަށް އަންނަ ބަދަލުތަކުން ރާއްޖެއަށް ކުރާ ނޭދެވޭ އަސަރުތައް ކުޑަކުރުމަށް އާޅާނެ މުހިންމު ފިޔަވަޅުތައް ހިމެނޭނެ ޕްލޭނެއްކަމަށެވެ.
ވަޒީރު ވިދާޅުވީ ޤައުމީ ތަރައްޤީގެ ޕްލޭނެއް ހަދަން މަސައްކަތްފަށާއިރު އެ ޕްލޭނަށް ޤާނުގެ ތެރެއިން ރައްކާތެރިކަން ދޭންޖެހޭނެކަމެއްކަމަށެވެ. އެހެންކަމުން އެ ޕްލޭނަށް ދޭންޖެހޭ ޤާނޫނީ ރައްކާތެރިކަން ދިނުމަށް ޤާނޫނު އަސާސީއަށް މާއްދާއެއް އިތުރުކުރުމަށް ރައްޔިތުންގެ މަޖިލީހަށް ހުށަހަޅާނެކަމަށެވެ.
ވަޒީރު ވިދާޅުވީ ރާއްޖޭގެ ތަރައްޤީއާއި ކުރިއެރުން ދެމެހެއްޓުމަށްޓަކައި، ޕްލޭނުގައި ކަނޑައެޅޭ މުހިންމު ސިޔާސަތުތަކާއި، އަމާޒުތަކާއި، އިސްތިރާޖުތަކާއި، ލަނޑުދަނޑިތައް ހާސިލުކުރުމަށް މަގުފަހިކުރުމުގެ ގޮތުން މި ޕްލޭނަށް ޤާނޫނީ ބާރުވެރިކަން ގެނެސްދޭންޖެހޭ ކަމަށެވެ.
20 އަހަރުގެ ދުރު ރާސްތާ ޕްލޭންއަކީ ރައީސުލްޖުމްހޫރިއްޔާގެ ރިޔާސީ ވަޢުދުފުޅާއި އެއްގޮތައް ދިވެހި ރާއްޖޭގެ ހުރިހާ ރަށެއްގެ ކައުންސިލްތަކާއި، ސިޔާސީ ޕާރޓީތަކާއި އާއްމު ރައްޔިތުންގެ ބައިވެރިވުމާއި މަޝްވަރާ ހިމަނައިގެން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ޚާއްސަ ސަމާލުކަމެއް ދީގެން ކުރިއަށްގެންދާ މަސައްކަތެކެވެ.
