މާލެ ސަރަޙައްދުން ދޫކޮށްފައިވާ ގޯތިތައް ހެދުމަށްޓަކައި އެހީތެރިކަން ލިބޭ ސްކީމެއް ތަޢާރަފުކުރައްވާނެ ކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ "ހިޔާވެހި ފައިނޭންސިންގ ޕްރޮގްރާމް" އިފްތިތާޙުކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.

މި ރަސްމިއްޔާތުގައި ރައީސުލްޖުމްހޫރިއްޔާ ވަނީ، މި ސްކީމް ތަޢާރަފުކުރުމާ ގުޅުންހުރި ފަންނީ މަސައްކަތްތައް މިހާރު ކުރައްވަމުގެންދަވާކަމަށާއި، އެކަންކަން ފުރިހަމަވުމުން، އެ ސްކީމްވެސް އިޢުލާންކުރައްވާނޭކަން ހާމަކުރައްވާފައެވެ.

މާލޭ ސަރަހައްދުން ދޫކޮށްފައިވާ ގޯތިތަކާ ގުޅޭގޮތުން އަދާހަމަކުރައްވަމުން ރައީސުލްޖުމްހޫރިއްޔާ ވަނީ، ހުޅުމާލެ އާއި ގުޅީފަޅާއި ގިރާވަރު ފަޅުގެ ބައެއް ތަފްޞީލުތައް ދެއްވާފައެވެ. އެގޮތުން، ހުޅުމާލޭގެ ދެވަނަ ފިޔަވަހިން ދޫކޮށްފައިހުރި ގޯތިތައް ހަވާލުކޮށް ނިމިފައިވާކަމަށާއި، ހުޅުމާލޭގެ ތިންވަނަ ފިޔަވަހި ހިއްކާ ނިމުމުން އެތަނުން ދޫކޮށްފައިވާ ގޯތިތައް ހަވާލުކުރައްވާނޭ ކަމުގައި އެމަނިކުފާނު ވިދާޅުވިއެވެ.

ގުޅީފަޅުގެ ހިއްކާ ނުނިމި އޮތް ސަރަހައްދު ހިއްކުމުގެ މަސައްކަތް ވަރަށް އަވަހަށް ހަވާލުކުރާނޭކަމަށާއި، ގޯތީގެ ރަޖިސްޓަރީ ހަވާލުކުރެވޭނީ ބިން ހިއްކައި ނިމުމުން ކަމަށް އެމަނިކުފާނު ވިދާޅުވިއެވެ. އެހެންނަމަވެސް މިހާރުވެސް، ރައްޔިތުންނަށް ޔަޤީންކަން ދެއްވުމުގެ މަޤްޞަދުގައި، އެ މީހެއްގެ ގޯތި ލިބޭނޭ ސަރަޙައްދުގެ ކޯޑިނޭޓްސް ފެންނަ ލިޔުމެއް، ދޫކުރަމުންދާކަމަށް އެމަނިކުފާނު ވިދާޅުވިއެވެ.

ގިރާވަރު ފަޅުގެ މައްސަލައަށް އަލިއަޅުއްވާލައްވަމުން ރައީސުލްޖުމްހޫރިއްޔާ ވަނީ، ގިރާވަރު ފަޅުން ގޯތި ދޫކޮށްފައިވަނީ އެއްވެސް މިންގަނޑަކަށް ނުވަތަ ލޭންޑް ޔޫސް ޕްލޭނަކަށް ބަލައިގެން ނޫންކަމަށާއި، އޭގެ ސަބަބުން 1200 އެއްހާ ގޯތި، އެހެން ސަރަޙައްދުތަކަށް ބަދަލުކުރަން ޖެހިވަޑައިގަތްކަން ހާމަކުރައްވާފައެވެ. މީގެއިތުރުން ރަސްމާލޭގެ މަސައްކަތުގައިވެސް ހުރި ގޮންޖެހުންތަކުން އަރައިގަނެ، ރޭވުމާ އެއްގޮތަށް މަސައްކަތް ނިންމަވާނޭކަމަށް ރައީސުލްޖުމްހޫރިއްޔާ ވިދާޅުވިއެވެ.

އަދި ގެދޮރުވެރިކަމަށް ދާއިމީ ހައްލެއް ހޯދެން އޮތީ، ދެން ހުރި ސަރަހައްދު ތަކުގައިވެސް ހިއްކަން ޖެހޭ ބިންތައް ހިއްކައި، މާލެ ނޫން ސަރަޙައްދުތަކުގައިވެސް އަރބަން ސެންޓަރުތައް ތަރައްޤީކޮށްގެންކަން އެމަނިކުފާނު ފާހަގަކުރެއްވިއެވެ. ރައީސުލްޖުމްހޫރިއްޔާ ވިދާޅުވީ، މި ސަރުކާރަށް އަބަދުވެސް މުހިންމީ ނަތީޖާކަމަށެވެ. އަދި ވާހަކަދައްކާނީވެސް ނަތީޖާގެ މައްޗަށް ކަމުގައި އެމަނިކުފާނު ވިދާޅުވިއެވެ.

މާލެ ސަރަޙައްދުން ދޫކޮށްފައިވާ ގޯތިތައް ޢިމާރާތްކުރުމަށްޓަކައި އެހީތެރިކަން ލިބޭ ސްކީމުގެ ދަށުން، ސަރުކާރުގެ ކުންފުންޏަކާ އެކުގައި މަސައްކަތްތަކެއް ކޮށްގެން، ރައްޔިތުންނަށް ލިބިފައިވާ ގޯތިތަކުގައި ގެ އެޅޭނޭ ލުއި ގޮތްތަކެއް ހޯދައިދެވޭނެ އިންތިޒާމު ހަމަޖައްސައިދެއްވުމަކީ ރައީސުލްޖުމްހޫރިއްޔާގެ ވަޢުދެކެވެ.