މިޓްރޮވިޗްގެ ހެޓްރިކާ އެކު މޮޅުވެ، އަލް ޙިލާލް އެއް ވަނައިގައި

އޭއެފްސީ ޗެމްޕިއަންސް ލީގުގެ ގުރޫޕް ބީގައި އަލް އިސްތިޤުލާލާ ދެކޮޅަށް ކުޅުނު މެޗުން މޮޅުވެ، އަލް ޙިލާލް އިން ގުރޫޕުގެ އެއް ވަނަ އަށް ޖެހިލައިފި އެވެ.

އަލް އިސްތިޤުލާލާ ދެކޮޅަށް ހޯމަ ދުވަހުގެ ރޭ ކުޅުނު މެޗު އަލް ޙިލާލް އިން ކާމިޔާބު ކުރީ 3-0ންނެވެ. މެޗުގެ ފުރަތަމަ ހާފުގައި އަލް ޙިލާލް އިން ދެ ލަނޑު ޖެހިއިރު، ފަހު ހާފުގައި އެ ޓީމުން ވަނީ އެއް ލަނޑު ޖަހައިފަ އެވެ.

މެޗުގައި އަލް ޙިލާލްގެ ތިން ލަނޑު ވެސް ޖެހީ އެ ޓީމުގައި މޮޅު ކުޅުމެއް ދައްކަމުން އަންނަ ސާބިއާގެ އެލެކްސެންޑާ މިޓްރޮވިޗް އެވެ. މެޗުގައި އޭނާ ލަނޑުތައް ޖެހީ 15 ވަނަ މިނެޓު، 33 ވަނަ މިނެޓު އަދި 74 ވަނަ މިނެޓުގަ އެވެ. މި ސީޒަންގެ މިހާތަނަށް އަލް ޙިލާލަށް ކުޅެދިން 17 މެޗުގައި 17 ލަނޑު ޖަހައިފަ އެވެ. އޭގެ ތެރެއިން 10 ލަނޑަކީ ސައުދީ ލީގުގައި އޭނާ ޖަހާފައިވާ ލަނޑުތަކެވެ.

މެޗުގައި އަލް ޙިލާލަށް ކުޅެމުން އަންނަ ބްރެޒިލްގެ ނޭމާ ޖޫނިއާ އަށް ވަނީ އަނިޔާވެފަ އެވެ. އަލް އިސްތުޤުލާލްގެ އޭރިޔާ ތެރެއިން ލިބުނު ބޯޅަައަކަށް ކުޅެން އުޅުމުގެ ތެރޭގައި ނޭމާގެ ފަޔަށް ލިބުނު އަނިޔާއެއްގެ ސަބަބުން އޭނާ ވަނީ ބަދަލުކޮށްފަ އެވެ. އަލް ޙިލާލް އަށް ބަދަލުވި ކޮޅާ ގާތު ލިބުނު އަނިޔާ އިން ރަނގަޅުވެ، ގިނަ ދުވަސްތަކެއް ވަންދެން ކުޅުމާ ދުރުގައި ހުރުމަށް ފަހު ނޭމާ ކުޅުމުގެ ތެރެއަށް އައީ ވެސް ދާދި ފަހުންނެވެ.

މޮޅާއެކު އަލް ޙިލާލް އެއް ވަނައިގައި އޮތީ މިހާތަނަށް ކުޅުނު ހަތަރު މެޗުން ވެސް މޮޅުވެ 12 ޕޮއިންޓު ހޯދައިގެންނެވެ. ހަމަ އެ އަދަދަށް މެޗު ކުޅެގެން ދެ ވަނައިގައި އޮތް އަލް އަހްލީ ސައުދީ އަށް ވެސް ލިބެނީ 12 ޕޮއިންޓެވެ.