އަސްކަރީ މަރުކަޒުތައް ބޭރު ގައުމުތަކުގެ އެހީގައި ހަދާނެކަމަށް ރައީސް ވިދާޅުވެއްޖެ
އަސްކަރީ މަރުކަޒުތައް ހަދަން އެކުވެރި ދައުލަތްތަކުގެ އެހީތެރިކަމަށް މިހާރު އެދިފައިވޭ
ރައީސް އިންޑިއާ ކުރެއްވި ރަސްމީ ދަތުރުފުޅުގެ ތެރެއިން އިންޑިއާގެ ބޮޑުވަޒީރާއި ސަލާމްކުރައްވަނީ
އަސްކަރީ މަރުކަތައް ބޭރު ގައުމުތަކުގެ އެހީގައި ހަދާނެކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
އަސްކަރީ އެއްވެސް ނުފޫޒެއް ރާއްޖޭގައި އޮންނާކަށް ބޭނުންނުވާ ކަމަށް ރައީސް ޑރ. މުހައްމަދު މުއިއްޒު ވިދާޅުވިތާ އަހަރެއް ކައިރިވެފައިވަނިކޮށް، ނަޞްރުގެ ދުވަހުގެ މުނާސަބަތުގައި ބޭއްވެވި ރަސްމީ ޖަލްސާގައި ރައީސް ވިދާޅުވީ ރާއްޖޭގެ އެކި ކަންކޮޅުތަކުގައި ހުރި ސިފައިންގެ މަރުކަޒުތައް ހުރީ ފަހަކަށްއައިސް ނުބެލެހެއްޓުމުގެ ސަބަބުން، މި ވޭތުވެދިޔަ ހަތަރު ފަސް އަހަރެއްގެ ތެރޭގައި، ޢަމުދުން ނުބެލެހެއްޓުމުގެ ސަބަބުން، ވަރަށް ބޮޑަށް ވީރާނާވާން ފަށާފައި ކަމަށެވެ. އަދި އެކުވެރި ދައުލަތްތަކުގެ އެހީތެރިކަމަށް މިހާރު އެދިފައިވާނެ ކަމަށާއި، އިރާދަކުރެއްވީތީ އެ ކަންކަން މި އަންނަ އަހަރުގެ ތެރޭގައި، އެ ދެންނެވި ހުރިހާ މަރުކަޒުތައް، އެފަދަ ފަރާތްތަކުގެ އެހީތެރިކަމާ އެކީގައި ހެދިގެންދާނެ ކަމަށެވެ.
ނަމަވެސް މިދިޔަ އަހަރުގެ ނޮވެމްބަރު މަހުގެ 30 ވަނަ ދުވަހު ބްލޫމްބަރގް ޓީވީއަށް ދެއްވި ބަސްދީގަތުމެއްގައި ރައީސް މުޢިއްޒު ވިދާޅުވީ ރާއްޖޭގައި އެހެން ގައުމެއްގެ އަސްކަރީ އެއްވެސް ނުފޫޒެއް ރާއްޖޭގައި އޮންނާކަށް ބޭނުންނުވާ ކަމަށެވެ. އިންޑިއާ ސިފައިން ރާއްޖެއިން އަނބުރާ ފޮނުވާލާނެކަމުގެ ވައުދާއެކު ވަޑައިގެން 2000 ސިފައިން ތިބިކަމަށް މި ސަރުކާރުން ބުނި ނަމަވެސް މިހާތަނަށްވެސް ފޮނުވާލި ސިފައިންގެ ތަފްސީލީ މައުލޫމާތެއް ސަރުކާރުން ހާމަކޮށްފައި ނުވެއެވެ.
އަދި އިންޑިާ ސިފައިން ފޮނުވާލާފައިވާކަމަށް ބުނެ، އިންޑިއާގެ އަސްކަރިއްޔާގެ މުވައްޒަފުން އާދައިގެ ހެދުމުގައި އަނބުރާ ގެނައުމުގެ ހުއްދަ ދެއްވާ، އިންޑިއާއިން ދީފައިވާ ހެލިކޮޕްޓަރާއި މަތިންދާ ބޯޓު އަދިވެސް ދަނީ ބޭނުންކުރަމުންނެވެ. މީގެ އިތުރުން އިންޑިއާއިން ގާމްކޮށްފައިވާ ރާޑަރު ސިސްޓަމްތައް އޮޕަރޭޓް ކުރަމުން ގެންދަނީވެސް އިންޑިއާގެ އަސްކަރިއްޔާގެ ބެލުމުގެ ދަށުންނެވެ.
