"ސްކީލާން" ޑޮކިއުމެންޓްރީއަށް އެވޯޑް ލިބުނު މައްސަލައިގައި ސަރުކާރުން އަންގައިގެން އޭސީސީން މީޑިއާ ކައުންސިލަށް ވަދެއްޖެ
އޭސީސީން ބުނެފައިވަނީ ހުށަހެޅުނު މައްސަލައަކާއި ގުޅިގެން މީޑިއާކައުންސިލަށް ވަދެފައިވަނީ ހޯމަ ދުވަހު ކަމަށް
ސްކީލާން - ރައީސް މުއިއްޒުގެ ދޮން މަންނަ - ސްކްރީން އިމޭޖް
"އަދަދު" ނޫހުގެ ތަހުގީގީ ޑޮކިއުމެންޓްރީ "ސްކީލާން" އަށް އެވޯޑް ލިބުނު މައްސަލައިގައި ސަރުކާރުން އަންގައިގެން އެންޓި ކޮރަޕްޝަން ކޮމިޝަން (އޭސީސީ) އިން މޯލްޑިވްސް މީޑިއާ ކައުންސިލް (އެމްއެމްސީ) އަށް ވަދެއްޖެއެވެ.
އޭސީސީން، މީޑިއާ ކައުންސިލަށް ވަދެފައިވާ ކަން އޭސީސީން ވަނީ ރާއްޖެއެމްވީ އަށް ކަށަވަރުކޮށްދީފައެވެ. އޭސީސީގެ މީޑިއާ އޮފިޝަލް ވިދާޅުވީ ހުށަހެޅިފައިވާ މައްސަލައަކާއި ގުޅިގެން ހޯމަ ދުވަހު މީޑިއާ ކައުންސިލަށް އޭސީސީން ވަދެފައިވާ ކަމަށެވެ. އޭސީސީން މީޑިއާ ކައުންސިލަށް ވަދެފައިވަނީ ރައީސް ޑރ. މުހައްމަދު މުއިއްޒުގެ ދޮން މަންމަ، ޖީ ސްކީލާން ރާއްޖޭން ބްލެކްލިސްޓުކޮށް ޑީޕޯޓުކުރި ގޮތާއި އޭނާ ރައީސް މުއިއްޒު މައްޗަށް ކުރާ ތުހުމަތުތަކުގެ މައްޗަށް ބިނާކޮށް ހަދާފައިވާ ތަހުގީގީ އުފެއްދުމަށް އެވޯޑް ލިބުނު މައްސަލައިގައި ސަރުކާރުގެ ޕްރެޝަރު ބޮޑުވެގެންނެވެ.
އެމްއެމްސީ ގެ 11 ވަނަ ނޫސްވެރިކަމުގެ އެވޯޑް ޙަފްލާ ޕްބްލިކް ސަރވިސް މީޑިއާ (ޕީއެސްއެމް)ގެ ފަރާތުން ވަގުތުން ދައްކަމުން ދިޔައިރު، "ސްކީލާން" ޑޮކިއުމެންޓަރީގެ ތަންކޮޅެއް ދެއްކިގެން މައްސަލަ ގޯސްވެ މީޑީއާ ކައުންސިލްގެ ރައީސް، އަހްމަދު މުސްތަފާ ޕަބްލިކް ސާވިސް މީޑީއާ ގައި އޭނާ އަދާ ކުރައްވާ ވަޒީފާއިންވެސް ކުއްލި ގޮތަކަށް ވަކި ކުރިއެވެ. ނަމަވެސް ފަހުން ވަނީ އޭނާގެ ވަޒީފާ ރުޖޫއަ ކޮށްދީފައެވެ.
"ސްކީލާން" ޑޮކިއުމެންޓަރީ ގެ މައްސަލަ މިހާރުން މިހާރަށް ތަހުގީގު ކުރުމަށް ސަރުކާރު ހިންގާ ޕާޓީ ޕީޕަލްސް ނޭޝަނަލް ކޮންގްރެސް (ޕީއެންސީ) އަށް ނިސްބަތްވާ ރައްޔިތުންގެ މަޖިލީހުގެ މެންބަރު އަޙްމަދު ޒަމީރު ވަނީ ގޮވާލައްވާފައެވެ. އަދި މެމްބަރު ޒަމީރު ވަނީ ރައްޔިތުންގެ މަޖިލީހުގެ މެމްބަރެއްގެ ހައިސިއްޔަތުން "ސްކީލާން" ޑޮކިއުމެންޓަރީ ގެ މައްސަލަ "މިހާރުން މިހާރަށް ތަހުގީގު ކުރުމަށް ކަރަޕްޝަންގެ މައްސަލަތައް ބަލާ، އޭސީސީއަށް "އިލްތިމާސް" ކުރައްވާފައެވެ.
ސްކީލާން އަށް އެވޯޑް ދިން ރަސްމިއްޔާތުގައި ސަރުކާރުގެ މަތީ ފެންވަރުގެ ބޭފުޅުން ބައިވެރިވެ ވަޑައިގެންފައިވެއެވެ. އޭގެ ތެރޭގައި، ނައިބު ރައީސް ހުސައިން މުހައްމަދު ލަތީފް އާއި ގައުމިއްޔަތު މިނިސްޓަރ އާދަމް ނަސީރު އާއި ރައީސް އޮފީހުގެ މީޑިއާ ކަންކަން ބަލަހައްޓަވާ މިނިސްޓަރު އިބްރާހިމް ހަލީލު އާއި ސަރުކާރުގެ ތަރުޖަމާނު ހީނާ ވަލީދު ހިމެނިވަޑައިގަންނަވައެވެ.
