މޯލްޑިވްސް އިސްލާމިކް ބޭންކް (އެމްއައިބީ)ގެ އާ ޕްރޮޑަކްޓް ތަކެއް ލޯންޗުކޮށްފިއެވެ.
ހުކުރު ދުވަހު އެ ޕްރޮޑަކްޓްތައް ލޯންޗްކޮށްފައި ވަނީ ހުޅުމާލެ ސެންޓްރަލް ޕާކުގައި ބޭއްވި ހަފްލާއެއްގައެވެ. ޖުމްލަ 3 ޕްރޮޑަކްޓް ލޯންޗްކޮށްފައިވެއެވެ.
އެމްއައިބީން ތައާރަފްކުރި ޕްރޮޑަކްޓް ތަކުގެ ތެރޭގައި ރާއްޖެ އަށް މުޅިން އަލަށް، ކޭޝްކާޑުގެ ބަދަލުގައި ބޭނުންކުރެވޭ އަނގޮޓި އެއް ވަނީ ތައާރަފްކޮށްފައެވެ. ފައިސާ ވެއަރގެނަމުގައި ތައާރަފްކުރި މި ރިންގަކީ ވޯޓަރ ޕްރޫފް ރިންގެކެވެ. އެ ރިންގް މެދުވެރިކޮށް އޭޓީއެމް ބޭނުންކުރުން ނޫން ކާޑުން ލިބޭ ހުރިހާ ޚިދުމަތެއް ލިބޭނެއެވެ. އެ ރިންގްގެ ހަތަރު ޑިޒައިނެއް ވަނީ ތައާރަފްކޮށްފައެވެ. ހޯމަ ދުވަހުން ފެށިގެން އެމްއައިބީގެ މާލޭގެ ބިޒްނަސް ސެންޓަރ އިން އެ ޕްރޮޑަކްޓް ލިބޭނެއެވެ.
ދެ ވަނަ ޕްރޮޑަކްޓަކީ ކުޑަކުދިންނަށް ޚާއްސަކޮށްގެން އެކުލަވާލާފައިވާ، ބިންގާ ސޭވިންގ އެކައުންޓް ހިމެނެއެވެ. ބިންގާ ސޭވިންގ އެކައުންޓްގައި 3 ވައްތަރެއްގެ އެކައުންޓް ހިމެނެއެވެ. އެއީ ބިންގާ ޓްރާންސެކްޝަން، ބިންގާ ސޭވިންގ އަދި ބިންގާ އިންވެސްޓްމެންޓެވެ. ބިންގާ ޓްރާންސެކްޝަން އެކައުންޓުގައި 7 އަހަރުވީމަ ކާޑެއް ކުއްޖާ އަށް ލިބޭނެ ކަމަށާއި އިންޓަރނެޓް ބޭންކިން ވެސް ލިބޭނެ ކަމަށް އެމްއައިބީ އިން ބުނެއެވެ. އެ ޚިދުމަތް ލިބޭނީ ބެލެނިވެރިއެއްގެ ބެލުމުގެ ދަށުންނެވެ. ބިންގާ ސޭވިންގ އަކީ ކުރު މުއްދަތަކަށް ބޭނުންކުރެވޭ ސޭވިން އެކައުންޓެކެވެ. ބިންގާ އިންވެސްޓްމެންޓް އެކުލަވާލާފައި ވަނީ ދިގު މުއްދަތުގެ ސޭވިންގއަށެވެ.
ދެން ލޯންްޗްކޮށްފައި ވަނީ ފައިސާ މޯބައިލް އެކްސްއެވެ. މިއީ ފައިސާނެޓުން ކުރެވޭ ހުރިހާ ކަމެއް ލިބޭ ގޮތަށް އެކުލަވާލާފައިވާ މޮބައިލް އަޕްގްރޭޑްއެކެވެ. ހުކުރު ދުވަހުގެ އިވެންޓަށް ވަރަށް ހޫނު ތަރުޚީބެއް ވަނީ ލިބިފައެވެ. ކުލަގަދަކޮށް ކުރިއަށް ގެންދިޔަ މި ހަރަކާތުގައި ހަވާވެސް ވަނީ އަރުވާފައެވެ. މީގެ އިތުރުން ހުކުރު ދުވަހު ހަވީރު ސެންޓްރަލް ޕާކުގައި އެމްއައިބީން ވަނީ ޚާއްސަ ކުޑަކުދިންގެ ހަވީރެއް ބާއްވާފައެވެ. މި ހަވީރުގައި ކުޑަކުދިންނަށް އަމާޒުކޮށްގެން އެ ކުދިންނަށް ކަމުދާނެ ފަދަ ހިތްގައިމު އެކި ގޭމު ސްޓޯލުތައް ވަނީ ބަހައްޓާފައެވެ.
ރާއްޖޭގެ ބެންކިންގ ދާއިރާގައި ތަފާތު ގިނަ ޕްރޮޑަކްޓްތައް ލޯންޗްކޮށްފައިވާ އެމްއައިބީއަކީ ގިނަބައެއްގެ މެދުގައި މަޤްބޫލް ބެންކެކެވެ. އެގޮތުން އެމްއައިބީގެ "އުޖާލާ ފައިނޭންސިން" އަދި ވިސާ އެކްސްޕެންސް ބިޒްނަސް ކާޑު ފަދަ ޕްރޮޑަކްޓުތަކަށް ބޮޑު ތަރުޚީބެއް ވަނީ ލިބިފައެވެ.
