މިދާ ގޮތުން ރާއްޖެ 19،20 ވަނަ ގަރުނާ ހަމައަށް ފަހަތަށް ގޮސްދާނެކަމުގެ ބިރު އެބަ އޮތް - ފައްޔާޒް

ކަންކަން މިހާރު ދާ ގޮތުން 19 ވަނަ ނުވަތަ 20 ވަނަ ގަރުނާއި ހަމައަށް ގައުމުގެ ކަންކަން ފަހަތަށް ގޮސްދާނެ ކަމުގެ ބިރު އެބަ އޮތް ކަމަށް އެމްޑީޕީގެ ޗެއަރޕަރސަން ފައްޔާޒް އިސްމާއިލް ވިދާޅުވެއްޖެއެވެ.

މި ސަރުކާރުން ވެރިކަމާއި ހަވާލުވީ ރައްޔިތުންނަށް ދޭ ޚިދުމަތްތައް ދަށް ކުރަން ޖެހޭނެ ކަމަށް ބުނެފައި ނޫން ކަމަށް ފައްޔާޒް ވިދާޅުވިއެވެ. އެގޮތުން ސަރުކާރުން އާސަންދަ ކަނޑާލާނެ ކަމަށް ބުނެފައި ނުވާ ކަމަށާއި އާސަންދަ އިތުރުކުރައްވާނެ ކަމަށް ރައީސް މުއިއްޒު ވައުދުވެވަޑައިގަތް ކަމަށް ފައްޔާޒް ވަނީ ވިދާޅުވެފައެެވެ. މީގެ އިތުރުން މަސްވެރިންނަށް 48 ގަޑިއިރު ތެރޭގައި ކިރާ މަހަށް ފައިސާ ދޭނެ ކަމަށާއި، އެ ފައިސާ ދޭނީ ޑޮލަރުން ކަމަށް ވިދާޅުވުމާއި، ގޯތިގެދޮރު ކުރިން ދިން ގޮތަށް ވުރެ މޮޅަށް ދޭނެ ކަމަށް ބުނެ ބޮޑެތި ވައުދުތައް ވެވަޑައިގަތް ކަމަށް ފައްޔާޒް ވިދާޅުވިއެވެ. އެހެންނަމަވެސް ވެރިކަމަށް ވަޑައިގެން މުޅިން ދައްކަވަނީ ކުރީ ސަރުކާރުގެ ވާހަކަކަން ފައްޔާޒް ވަނީ ފާހަގަކުރައްވާފައެވެ.

ހަށިގަނޑުގައި ހުރި ނާރުތައް ވެސް ދައްކާނެ ކަމަށް ވިދާޅުވެ މިސަރުކާރަކީ ހާމަކަން ބޮޑު ސަރުކާރަކަށް ވާނެ ކަމަށް ރައީސް މުއިއްޒު ވައުދުވެވަޑައިގެންފައިވާ ކަން ފައްޔާޒް ފާހަގަކުރެއްވިއެވެ. އެހެންނަމަވެސް އެއްވެސް އެއްޗެއް ހާމަނުކުރާ ކަމަށާއި، އާދޭސްކޮށް، ކޯޓަށް ގޮސްގެން ވެސް ސަރުކާރުން ކަހާތަން ހިރުވާ ވެސް ނުލާ ކަމަށް ފައްޔާޒް ވިދާޅުވިއެވެ. ވެރިކަމަކާއި ބަޔަކު ހަވާލު ވަނީ ރައްޔިތުންގެ ހުވަފެންތަކުގައި ކުލަ ޖައްސާނެކަމުގެ އުންމީދާއި އެކުގައި ކަމަށް ފައްޔާޒް ވިދާޅުވިއެވެ. އަދި މިހާރު ރައީސް މުއިއްޒު ވެރިކަން ކުރާ ގޮތަށް ކޮންމެ މީހަކަށް ވެސް ވެރިކަން ކުރެވިދާނެ ކަމަށް ފައްޔާޒް ވަނީ ވިދާޅުވެފައެވެ. 10 މަސްވީ އިރު މި ސަރުކާރުންވީ ވައުދުތައް އެ ފުށް މި ފުށަށް ޖަހާފައިވާކަމަށާއި ގައުމު ނުހިންގޭކަން މި ސަރުކާރަށް ވެސް ސާފުވާ ކަމަށް ވަނީ ވިދާޅުވެފައެވެ.

ޕީޕީއެމް، ޕީއެންސީ އަށް ހިފެހެއްޓެނީ ހަމައެކަނި ދޮގާއި މަކަރުވެރިކަމުގައި ކަމަށް އޭނާ ވިދާޅުވިއެވެ. އެ މީހުންނަށް އެކައްޗެއްގައި ހިފަހައްޓައިގެން ނުތިބެވޭ ކަމަށާއި ކޮންމެ ފަހަރަކު ވެސް ރައްޔިތުންގެ މޫނުގައި ޖަހަނީ ސައްޕެއް ކަމަށް ފައްޔާޒް ވިދާޅުވިއެވެ. އޭނާ ވަނީ ރައްޔިތުންގެ ބާރުވެރިކަމަކީ ޕީޕީއެމް އިން ދަންނަ ކަމެއް ނޫން ކަމަށް ފައްޔާޒް ވަނީ ވިދާޅުވެފައެވެ. ފައްޔާޒް ވަނީ ސަރުކާރުން ދީން ހަތިޔާރަކަށް ބޭނުންކުރާކަމަށް ފާހަގަކުރައްވާ އެކަމަށް ވެސް ފާޑު ވިދާޅުވެފައެވެ. މަކަރުވެރިކަމާއި އެކު އިސްލާމްދީނުގެ ވާހަކަ ދައްކަމުންދާ ކަމަށާއި ދީނާއި މެދު އޮތް އިތުބާރު ގެއްލޭ ގޮތަށް ސަރުކާރުން އަމަލުކުރަމުންދާ ކަމަށް ފައްޔާޒް ވަނީ ވިދާޅުވެފައެވެ.