ރާއްޖޭގެ ޖީޑީޕީ 2028 ވަނަ އަހަރު 10 ބިލިއަން ޑޮލަރާ ހަމައަށް ގެންދެވޭނެ - ޒަމީރު
ބަޖެޓަކީ، ދިވެހި ރައްޔިތުން ގެދޮރުވެރިކުރުވާނެ ބަޖެޓު
ފިނޭންސް މިނިސްޓަރު މޫސާ ޒަމީރު މަޖިލީހަށް ބަޖެޓް ހުށަހަޅުއްވަނީ
މިހާރު ވަޒީރުންގެ މަޖިލީހުން ފާސްކުރައްވާފައިވާ އިކޮނޮމިކް ރިފޯމް އެޖެންޑާ ތަންފީޒު ކުރުމުގެ ތެރެއިން، ދިވެހިރާއްޖޭގެ ޖީޑީޕީ 2028 ވަނަ އަހަރު 10 ބިލިއަން ޑޮލަރާ ހަމައަށް ގެންދެވޭނެ ކަމަށް ފިނޭންސް މިނިސްޓަރު މޫސާ ޒަމީރު ވިދާޅުވެއްޖެއެވެ.
އަންނައަހަރަށް ސަރުކާރުން ހުށަހަޅާ ދަޥުލަތުގެ ބަޖެޓު ހުށަހަޅުއްވަމުން ފިނޭންސް މިނިސްޓަރު މުސާ ޒަމީރު ވިދާޅުވީ އިގުތިސާދީ ހަރަކާތް މިހާރު އެތުރިފައިވާ ގޮތް އަލުން ރުކުރުވައިލައި، ރާއްޖޭގެ އުތުރާއި ދެކުނަކީ މި ރިޔާސީ ދައުރު ނިމޭއިރު އިގުތިސާދީ މައި މަރުކަޒުތައް ކަމުގައި ހެދުމަކީ ސަރުކާރުގެ އަމާޒެއް ކަމަށެވެ. މީގެއިތުރުން، ރާއްޖޭގެ އެކި ކަންކޮޅުތަކުގައި އަރބަން ސެންޓަރުތައް ގާއިމުކޮށް، ސަރަހައްދީ ތަރައްގީއަށް މަގުފަހިކުރުމަކީވެސް މި އެޖެންޑާގައި ތަސައްވުރުކޮށްފައިވާ ކަމެއް ކަމަށެވެ.
މިނިސްޓަރު ވިދާޅުވީ ހަމައެހެންމެ، ދިވެހިރާއްޖެއަކީ ތާއަބަދަށް ތެޔޮ އިމްޕޯޓުކޮށްގެން ރައްޔިތުންނަށް ބޭނުންވާ ކަރަންޓާއި އެހެނިހެން އަސާސީ ހިދުމަތްތައް ފޯރުކޮށްދޭ ގައުމެއްގެ ގޮތުގައި އޮންނަ އޮތުން ނިމުމަކަށް ގެނެސް، އިއާދަކުރަނިވި ހަކަތައާއި ދިމާއަށް ދިވެހިރާއްޖޭގެ ހަކަތައިގެ ވިއުގަ އަނބުރައިލުމަކީ ހާސިލުކުރަންޖެހޭ މުހިންމު ލަނޑުދަނޑިއެއް ކަމަށެވެ. މީގެއިތުރުން، އަންހެނުންނާއި ޒުވާނުންނަށް ވަކިން ހާއްސަކަމެއް ދީގެން ތައުލީމާއި ވިޔަފާރީގެ އިތުރު ފުރުސަތުތައް ހުޅުވައިލުމުގެ ތެރެއިން ދިވެހީންނަކީ ފަންނުވެރި ބަޔަކަށް ހަދައި، ދިވެހީންގެ އުފެއްދުންތަކާއި ހިދުމަތްތައް ދުނިޔޭގެ ބާޒާރަށް ނެރުމަކީ އަމާޒެއް ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ ރައީސުލްޖުމްހޫރިއްޔާގެ މި ތަސައްވުރު ހާސިލުކުރުމަށް އޮތް އެންމެ ބޮޑު ގޮންޖެހުމަކީ ހީނަރުވެފައިވާ ފިސްކަލް ހާލަތް ކަމަށެވެ. އަދި ސަރުކާރުގެ ޚަރަދު ކުޑަކުރަން ފިޔަވަޅު އެޅުން އަހަރުތަކެއް ވަންދެން ފަސްކޮށް، ބޮޑެތި އަދަދުތަކުން ޑެފިސިޓް ބަޖެޓުތައް ތަންފީޒުކުރަމުންގޮސްފައިވުމުގެ ނަތީޖާއަކީ، ދައުލަތުގެ ދަރަނި އިތުރުވެ، ދައުލަތުގެ އާމްދަނީއާ ބައްދަލު މިންވަރަކަށް ޚަރަދުތައް ކުޑަކުރުމަށް އެކީ އެއްފަހަރާ ގިނަ ނިޒާމީ ބަދަލުތަކެއް ގެންނަން މަޖުބޫރުވުން ކަމަށެވެ.
އަދި މިއަދު މަޖިލީހަށް ހުށަހަޅާ 2025 ވަނަ އަހަރަށް ލަފާކުރާ ދައުލަތުގެ ބަޖެޓުގައި، ދައުލަތުގެ މާލިއްޔާއަށް ދިމާވެފައިވާ މުހިންމު ފިސްކަލް މައްސަލަތައް ހައްލުކުރުމަށް ގިނަގުނަ ފިޔަވަޅުތަކެއް އެޅުމަށް ހިމަނާފައިވާނެ ކަމަށް މިނިސްޓަރު ވިދާޅުވިއެވެ.
