ދައުލަތުގެ އެއްވެސް ބާރެއްގެ ތެރެއަށް ނުފޫޒު ފޯރުވުމަކީ އަޅުގަނޑު ކުރާނެ ކަމެއް ނޫން: ރައީސް މުއިއްޒު
ރައީސަށް ބާރު ލިބޭ ގޮތައް އޭސީސީ އާއި އީސީ ގެ ގާނޫނަށް ބަދަލު ގެންނަން ސަރުކާރުގެ ފަރާތުން ރައްޔިތުންގެ މަޖިލިހަށް ވަނީ ހުށަހަޅާފައި
ޔޫއެންޑީޕީގެ ޚިދުމަތައް 45 އަހަރު ފުރުން ފާހަގަކުރުމުގެ ގޮތުން މާލޭގައި އޮތް ހަފްލާގައި ރައީސް މުއިއްޒު ވާހަކަފުޅު ދައްކަވަނީ
ދައުލަތުގެ އެއްވެސް ބާރެއްގެ، ނުވަތަ މިނިވަން މުއައްސަސާއެއްގެ، ނުވަތަ އިންތިޚާބު ކުރެވޭ އެއްވެސް ބައެއްގެ ބާރުތަކުގެ ތެރެއަށް ނުފޫޒު ފޯރުވުމަކީ މިއަދާ ހަމަޔަށްވެސް ކުރެއްވި ކަމެއް ނޫން ކަމަށާއި، އަދި ކުރިޔަށް އޮތް ތާނގައިވެސް ކުރާނޭކަމެއްނޫން ކަމަށް ރައީސުލް ޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
އެކްސް ގައި ބުދަ ވިލޭރޭ ކުރެއްވި ޕޯސްޓެއްގައި ރައީސް މުއިއްޒު މިހެން ވިދާޅުވިއިރު، އެންޓި ކަރަޕްޝަން ކޮމިޝަން (އޭސީސީ) އާއި އިލެކްޝަންސް ކޮމިޝަން (އީސީ) ގެ ގާނޫނަށް ބަދަލު ގެންނަން ސަރުކާރުގެ ފަރާތުން ރައްޔިތުންގެ މަޖިލިހަށް ވަނީ ހުށަހަޅާފައެވެ. ސަރުކާރުން ހުށަހެޅި ބަދަލުގައި ބުނަނީ އެ ދެ ކޮމިޝަންގެ ރައީސާއި ނައިބު ރައީސަކަށް އައްޔަން ކުރަން ފެނިވަޑައިގަންނަވާ ބޭފުޅެއްގެ ނަން މަޖިލިހަށް ފޮނުއްވާނީ ރައީސުލް ޖުމްހޫރިއްޔާ ކަމަށެވެ.
މި ދެ މުއްސަސާގެ އެންމެ އިސް ދެ މަގާމަށް މީހުން އައްޔަން ކުރުމުގައި ރައީސް ޑރ. މުއިއްޒަށް ބާރު ލިބޭގޮތައް ގާނޫނަށް ބަދަލު ގެނައުމަށް ނިންމުމުން ގިނަ ސިޔާސީ ޕާޓީތަކާއި އާންމުންގެ ފާޑު ކިޔުން ސަރުކާރަށް ވަނީ ވަރަށް ބޮޑަށް އަމާޒުވެފައެވެ.
"އޭގެ ބަދަލުގައި، އެފަދަ ފަރާތްތަކުން ޢަދުލުވެރިކަމާއި، އިންސާފާއި، ހަމަހަމަކަމާއެކު، ވަކި މީހަކަށް ބެލުމެއްނެތި، ހަލުއި ދުވެލީގައި މަސައްކަތްކުރަމުން ދޭތޯ ކަށަވަރުކުރުމާއި އެ މަގަށް ކަންކަން ބައްޓަން ކުރުމަށް ކުރަންޖެހޭ އެންމެހާ ކަންކަން ކުރުމަށް، ޤާނޫނާއި ޤަވާޢިދަށް ގެންނަންޖެހޭ އިސްލާހެއް ވާނަމަ އެ އިސްލާޙެއް ގެންނަން ސަރުކާރުން ހުށަހަޅަމުން ގެންދާނެ ވާހަކަ ދަންނަވަން." ޑރ. މުއިއްޒު ކުރެއްވި ޕޯސްޓުގައި އިތުރަށް ވިދާޅުވެފައިވެއެވެ.
ދައުލަތުގެ ބާރުތަކަށާއި، މިނިވަން މުއައްސަސާތަކަށް ނުފޫޒު ނުފޯރުވާނެ ކަމަށް ރައީސް ޑރ. މުއިއްޒު ވިދާޅުވި ނަމަވެސް، އެމަނިކުފާނަކީ ކުރިން ވިދާޅުވާ އެއްޗަކާ އެއްގޮތަކަށް ފަހުން އަމަލު ކުރައްވާ ބޭފުޅެއް ނޫންކަން ގިނަ ފަރާތްތަކުން އަންނަނީ ފާހަގަ ކުރަމުންނެވެ. މިގޮތުން، ދާދި ފަހުން ރައްޔިތުންގެ މަޖިލީހުގެ ކޮމިޓީއަކުން ނިންމި ނިންމުމެއް ރައީސް މުއިއްޒު އަންގަވައިގެން ހަމަ އެދުވަހު އެނިންމުން ބަދަލުކޮށްފައިވާކަން މީޑިއާ ރިޕޯޓްތަކުގައި ވަނީ ފާހަގަ ކޮށްފައެވެ.
"ކޮމިޝަންތަކުގެ އިދާރީ ހިންގުމަށް ޒިންމާވާ ފަރާތްތައް ރައީސުލްޖުމްހޫރިއްޔާ އައްޔަންކުރުމަކީ ވެރިކަން ހިންގާ ފަރާތުން ކޮމިޝަންތަކަށް ސީދާ ނުފޫޒު ފޯރުވުމުގެ ހަޑިމުޑުދާރު ޢަމަލެކެވެ،" ސަރުކާރުން ގާނޫނުތަކަށް ހުށަހަޅާފައިވާ ބަދަލުތަކަށް ދެކޮޅު ހަދާކަން ހާމަކޮށް އެމްޑީޕީން ނެރެފައިވާ ބަޔާނުގައި ބުނެފައިވެއެވެ.
ފާޑުކިޔާ ފަރާތްތަކުން ބުނާ ގޮތުގައި ރައީސުލްޖުމްހޫރިއްޔާއަށް އޭސީސީ އާއި އީސީގެ އިސްވެރިން އައްޔަންކުރުމުގެ ބާރު ދިނުމުން، އެ މުއައްސަސާތައް އިތުރަށް ސިޔާސީވެ، މިނިވަންކަމާ އެކު ވަކިފަރާތަކަށް ނުޖެހި މަސައްކަތްކުރުމުގެ ޤާބިލުކަމަށް އުނިކަން އަންނާނެއެވެ. އެފަރާތްތަކުން ބުނާ ގޮތުގައި ހައްލަކީ ވެރިކަން ހިންގާ ފަރާތުގެ ބާރު އިތުރުކުރުމެއް ނޫނެވެ. އޭގެ ބަދަލުގައި މިނިވަން މުއައްސަސާތައް މިނިވަންކަމާއެކު ހަރުދަނާކަމާއެކު މަސައްކަތްކުރުމުގެ ޤާބިލުކަން އިތުރުކުރެވޭނެ އިސްލާހުތަކެއް ގެނައުމެވެ.
ނިމިދިޔަ ރައްޔިތުންގެ މަޖިލީހުގެ އިންތިޚާބުގައި ސަރުކާރުގެ ކެންޑިޑޭޓުންނަށް ތާއީދު ހޯދުމަށް ޑރ. މުއިއްޒުގެ ސަރުކާރުން ނުފޫޒާއި ބާރު ބޭނުން ކޮށް، ރިޝްވަތާއި ނުހައްގުން ވަޒީފާ އާއި ޕްރޮމޯޝަން ދިނުން ފަދަ ގާނޫނާއި ގަވައިދާ ޚިލާފު އެތައް އަމަލެއް ހިންގާފައިވާކަން ގިނަ ބަޔަކު ފާހަގަ ކުރެވެއެވެ. މީގެ އިތުރުން ޑިޕާޓްމަންޓް އޮފް ނޭޝަނަލް ރެޖިސްޓްރޭޝަންގެ ތެރޭގައި ޑރ. މުއިއްޒުގެ ޕާޓީއަށް މީހުން ވައްދަން ފޯމު ފުރަމުން ދިޔަކަން ފަޅާއެރީވެސް ދާދިފަހުންނެވެ.
