އާސެނަލް މެޗުގެ ނަތީޖާއާ މެދު ސްކޮޓް ހިތްހަމަ ޖެހޭ!

އިނގިރޭސި ޕްރިމިއާ ލީގުގައި އާސެނަލްއާ ދެކޮޅަށް ކުޅުނު މެޗުން ލިބުނު ނަތީޖާއާމެދު ހިތްހަމަ ޖެހޭ ކަމަށް، ލިވަޕޫލްގެ ކޯޗު އާން ސްލޮޓް ބުނެފި އެވެ.

އާސެނަލްގެ އެމިރޭޓްސް ސްޓޭޑިއަމްގައި ކުޅުނު މެޗު ނިމުނީ ދެ ޓީމު 2-2 އިން އެއްވަރުވެގެންނެވެ. އެ މެޗުގައި އާސެނަލް އިން ވަނީ ދެ ފަހަރެއްގެ މަތިން ލީޑު ވެސް ނަގައިފަ އެވެ. ނަމަވެސް ލިވަޕޫލް އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ.

އެމެޗުގެ ފަހުން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން ސްލޮޓް ބުނީ، އާސެނަލް އަކީ ވަރަށް ވަރުގަދަ ޓީމެއް ކަމަށާއި، އެ ޓީމު ކައިރިން ދެ ފަހަރު ނަތީޖާ ހަމަހަމަކޮށްގެން މެޗު ނިންމާލެވުމަކީ ލިބޭ ހިތްހަމަ ޖެހުމެއް ކަމަށެވެ. ޚާއްސަކޮށް އާސެނަލް މެޗުގެ ކުރިން ވެސް ލިވަޕޫލް އިން ރަށުން ބޭރުގައި މެޗެއް ކުޅެން ޖެހުނު ކަމަށާއި، އާސެނަލް މެޗަށް އެންމެ ފުރިހަމަ އަށް ތައްޔާރުވާން އެކަށީގެންވާ ވަގުތު ނުލިބޭ ކަމަށް ވެސް ސްލޮޓް ބުންޏެވެ.

ސްލޮޓް ބުނީ މެޗުގެ ފުރަތަމަ ހާފު ނިމުނުއިރު ލިވަޕޫލް އޮތީ އެއް ލަނޑުން ފަހަތުގައި ކަމަށާއި، ނަމަވެސް ދެ ވަނަ ހާފުގައި ލަނޑު ޖަހައިގެން މެޗު އެއްވަރު ކުރީ ކުޅުންތެރިން ކުރި ބުރަ މަސައްކަތުން ކަމަށެވެ. އެ މެޗުގައި ލިވަޕޫލްގެ ކުޅުންތެރިން ދެއްކި ކުޅުމާއި، އެ ކުޅުންތެރިން ކުރި މަސައްކަތާ މެދު ވެސް އޭނާ ހުރީ ހިތްހަމަ ޖެހިގެން ކަމުގައި ސްލޮޓް ވަނީ ބުނެފަ އެވެ.

މީގެ އިތުރުން ސްލޮޓް ބުނީ ލީގަށް ވާދަކުރާ ފަރާތްތަކާ ގުޅޭ ގޮތުން އަދި ލީގުގައި ލިވަޕޫލް އޮތް ހިސާބާ ގުޅޭ ގޮތުން ވެސް އޭނާ އަށް ސުވާލުތައް އަންނާނެކަން އިނގޭ ކަމަށެވެ. އޭނާ ބުނީ ރަށުން ބޭރުގައި ކުޅޭ މެޗުތަކުގައި ނަތީޖާ ނެރުމަކީ އުނދަގޫ ކަމަކަށްވާއިރު، އާސެނަލް މެޗުން ލިބުނު ނަތީޖާއާ މެދު ހިތްހަމަ ނުޖެހެންވީ ސަބަބެއް ނެތް ކަމަށެވެ. ސްލޮޓް ބުނީ އޭނާ އަބަދު ވެސް ބޭނުން ވަނީ ރަށުން ބޭރުގައި ކުޅޭ މެޗުތަކުން ނަތީޖާ ނެރުމަށް ކަމަށެވެ. ކުރިން ވެސް ފާހަގަ ކުރިހެން، ލީގު ކާމިޔާބު ކުރަން ބޭނުންވާ ނަމަ ރަށުން ބޭރުގައި ކުޅޭ މެޗުތައް މުހިންމުވާނެ ކަމަށް ސްލޮޓް ވަނީ ތަކުރާރުކޮށް ބުނެފަ އެވެ.

އާސެނަލް މޮޅުވެ އަލުން އެއް ވަނަ އަށް ޖެހިލުމުގެ ފުރުސަތު ލިވަޕޫލަށް އޮތް ނަމަވެސް، އެއްވަރުވުމުން އެ ޓީމު އޮތީ ދެ ވަނައިގަ އެވެ. އެއީ މިހާތަނަށް ލީގުގައި ކުޅުނު ނުވަ މެޗުން 22 ޕޮއިންޓާ އެކު އެވެ. މި ސީޒަނާ ދިމާކޮށް ލިވަޕޫލްގެ ކޯޗުކަމާ ހަވާލުވި ސްލޮޓްގެ އިރުޝާދުގެ ދަށުން އެ ޓީމު އަންނަނީ ރަނގަޅު ނަތީޖާތަކެއް ނެރެމުންނެވެ.