ޔުނައިޓެޑާއި، ޓޮޓެންހަމް ބަލިވެއްޖެ

އިނގިރޭސި ޕްރިމިއާ ލީގުގައި ވެސްޓް ހޭމް ޔުނައިޓެޑާ ދެކޮޅަށް ކުޅުނު މެޗުން މެންޗެސްޓަރ ޔުނައިޓެޑު ބަލިވީއިރު، ކްރިސްޓަލް ޕެލެސްއާ ދެކޮޅަށް ކުޅުނު މެޗުން ޓޮޓެންހަމް ބަލިވެއްޖެ އެވެ.

ވެސްޓް ހޭމްގެ އަމިއްލަ ދަނޑުގައި ކުޅުނު މެޗުން ޔުނައިޓެޑު ބަލިވީ 2-1ންނެވެ. މެޗުގައި ވެސްޓް ހޭމް އިން ލަނޑު ޖަހައި ލީޑު ނަގާފައި ވަނިކޮށް، ޔުނައިޓެޑުން ނަތީޖާ ހަމަހަމަ ވެސް ކުރި އެވެ. ނަމަވެސް މެޗުގެ ފަހު ވަގުތުގައި ލަނޑު ޖަހައިގެން ވެސްޓް ހޭމް ވަނީ މޮޅުވެފަ އެވެ.

މެޗުގެ ލަނޑުތައް ފެނުނީ ދެ ވަނަ ހާފުގަ އެވެ. މެޗުގެ 74 ވަނަ މިނެޓުގައި ވެސްޓް ހޭމަށް ލީޑު ނަގައިދިނީ ކްރައިސެންސިއޯ ސަމާވިލް އެވެ. ނަމަވެސް އޭގެ ހަތް މިނެޓު ފަހުން ޔުނައިޓެޑުން ނަތީޖާ ހަމަހަމަ ކުރީ ކަސެމީރޯ ޖެހި ލަނޑުންނެވެ. މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ވެސްޓް ހޭމް އިން ދެ ވަނަ ލަނޑެއް ޖެހީ އެ ޓީމަށް ލިބުނު ޕެނަލްޓީންނެވެ. އެ ލަނޑު އެ ޓީމަށް ޖަހައިދިނީ ޖެރަަޑް ބޮވެން އެވެ.

ލީގުގައި ކްރިސްޓަލް ޕެލެސްގެ ދަނޑުގައި ކުޅުނު މެޗުން ޓޮޓެންހަމް ބަލިވީ 1-0ންނެވެ. މެޗުގައި ޕެލެސް އިން ލަނޑު ޖެހީ ވެސް ފުރަތަމަ ހާފުގަ އެވެ. މެޗުގެ ފުރަތަމަ ހާފުގެ 31 ވަނަ މިނެޓުގައި އެ ޓީމަށް ލަނޑު ޖަަހައިދިނީ ހުއާން ފިލީޕޭ މަޓޭޓާ އެވެ.

ވެސްޓް ހޭމް އަތުން ވީ ބައްޔާއެކު ޔުނައިޓެޑު އޮތީ ލީގު ތާވަލްގެ 14 ވަނައިގަ އެވެ. އެއީ މިހާތަނަށް ކުޅުނު ނުވަ މެޗުން 11 ޕޮއިންޓާ އެކު އެވެ. މިއީ މި ސީޒަންގެ ލީގުގައި ޔުނައިޓެޑުގެ ހަތަރު ވަނަ ބައްޔެވެ. ޕެލެސް އަތުން ވީ ބައްޔާ އެކު ޓޮޓެންހަމް އޮތީ ނުވަ މެޗުން 13 ޕޮއިންޓާ އެކު އަށް ވަނައިގަ އެވެ.