މަންމައަށް އަނިޔާކޮށް ވަޅިން ހަމަލާދީ ފޭރުނު މީހާގެ ބަންދަށް 10 ދުވަސް
23 އޮކްޓޯބަރު 2024 | ބުދަ 07:52ވަޅިިން ހަމަލާދީ މަރާލާނެ ކަމަށް ބުނެ އިންޒާރުދީ އަދި ފޯނު ފޭރިގެން ގޮސްފައިވޭ
މަންމައަށް އަނިޔާކޮށް ފޭރުނު މުހައްމަދު އިސްމާއިލް
57 އަހަރުގެ މަންމައަށް އަނިޔާކޮށް ވަޅިން ހަމަލާދީ މަރަލާނެކަމަށް ބުނެ ފޭރުނު ފިރިހެން ދަރީގެ ބަންދަށް 10 ދުވަސް ޖަހައިފިއެވެ.
މި މައްސަލައިގައި 28 އަހަރުގެ ޒުވާނަކު ވަނީ އަންގާރަ ދުވަހު ހައްޔަރުކޮށްފައެވެ. އަދި އޭނާގެ ބަންދާ މެދު ގޮތެއް ނިންމުމަށް ހުޅުމާލެ މެޖިސްޓްރޭޓް ކޯޓަށް ހާޒިރުކުރުމުން 10 ދުވަހަށް ބަންދުކުރުމަށް ކޯޓުން ވަނީ އަމުރުކޮށްފައެވެ.
މި މައްސަލައާއި ގުޅިގެން ފުލުހުން ބުނީ ހުޅުމާލެ ފޭސް 2 (އެޗް13) ގެ އެޕާޓްމަންޓަކުން އަންހެނަކު ރޯ އަޑު އިވޭ ކަމަށް ބުނެ ހޯމަ ދުވަހުގެ އިރުއޮއްސި 6:17 އެހާކަންހާއިރު ރިޕޯޓް ކޮށްފައިވާ ކަމަށެވެ.
މި ރިޕޯޓާ ގުޅިގެން ފުލުހުން ގޮސް އެ އެޕާޓްމަންޓްގެ ދޮރުގައި ޓަކި ޖެހުމުން އަންހެނަކު ދޮރުހުޅުވާފައިވާ ކަމަށާއި، އަދި އެ އަންހެން މީހާގެ ދަރިފުޅު، ހ.އެހަޑަ، މުޙައްމަދު އިސްމާޢީލް (28އ) އެ އަންހެން މީހާއަށް އަނިޔާކޮށް، ވަޅިިން ހަމަލާދީ މަރާލާނެ ކަމަށް ބުނެ އިންޒާރުދީ އަދި ފޯނު ފޭރިގެން ގޮސްފައިވާ ކަމަށް ބުނެފައިވާ ކަމަށެވެ.
މި މައްސަލައާ ގުޅިގެން މުޙައްމަދު އިސްމާޢީލް ހައްޔަރުކުރި އަންގާރަ ދުވަހުގެ ވަގުތެއްގައި ކޯޓު އަމުރެއްގެ ދަށުންނެވެ.
އަންހެން މީހާއަށް ހޮސްޕިޓަލްގައި ފަރުވާދިނުމަށްފަހު ހޯމަ ދުވަހުގެރޭގެ ވަގުތެއްގައި ވަނީ ދޫކޮށްލާފައެވެ.
މި މައްސަލަ ފުލުހުން ގެންދަނީ ތަޙުޤީޤު ކުރަމުންނެވެ.
