ޖަރުމަނު ލީގުގައި ސްޓަޓްގާޓްއާ ދެކޮޅަށް ކުޅުނު މެޗުން ބަޔާން މިއުނިކް މޮޅުވެ، ލީގު ތާވަލްގެ އެއް ވަނަ މަގާމުގައި ދެމިއޮވެއްޖެ އެވެ.

ބަޔާންގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 4-0ންނެވެ. މެޗުގައި ބަޔާން އިން އެ ޓީމުގެ ހަތަރު ލަނޑު ވެސް ޖެހީ ފަހު ހާފުގަ އެވެ.

މެޗުގެ ދެ ވަނަ ހާފު ފަށައިގެން 12 ވަނަ މިނެޓުގައި ބަޔާނަށް ލީޑު ނަގައިދިނީ އިންގްލެންޑުގެ ކެޕްޓަން ހެރީ ކޭން އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ޔޯޝުއާ ކިމިކް އެވެ. އޭގެ ތިން މިނެޓު ފަހުން ސާޖް ގްނަބްރީ ތަނަވަސްކޮށްދިން ފުރުސަތެއްގައި ކޭން ވަނީ ބަޔާންގެ ދެ ވަނަ ލަނޑު ވެސް ޖަހައިފަ އެވެ. ބަޔާންގެ ތިން ވަނަ ލަނޑު 80 ވަނަ މިނެޓުގައި ޖަހައި ކޭން ވަނީ އޭނާގެ ހެޓްރިކް ހަމަކޮށްފަ އެވެ. އޭގެ ނުވަ މިނެޓު ފަހުން ބަޔާންގެ ހަތަރު ވަނަ ލަނޑު ޖެހީ ކިންގްސްލީ ކޯމަން އެވެ.

މޮޅާއެކު ބަޔާން އެއް ވަނައިގައި އޮތީ މިހާތަނަށް ކުޅުނު ހަތް މެޗުން 17 ޕޮއިންޓު ހޯދައިގެންނެވެ. ހަމަ އެ އަދަދަށް މެޗު ކުޅެގެން ދެ ވަނައިގައޮ އޮތް އާރުބީ ލައިޕްޒިގަށް ވެސް ލިބެނީ 17 ޕޮއިންޓެވެ.