ސްޕެނިޝް ލީގުގައި ސެލްޓަ ވީގޯއާ ދެކޮޅަށް ކުޅުނު މެޗުން އެންމެ ފަހުގެ ޗެމްޕިއަން ރެއާލް މެޑްރިޑު މޮޅުވެއްޖެ އެވެ.

ސެލްޓަ ވީގޯގެ އަމިއްލަ ދަނޑުގައި ކުޅުނު މެޗު ރެއާލުން ކާމިޔާބު ކުރީ 2-1ންނެވެ. މެޗުގައި ރެއާލުން ލަނޑު ޖަހައި ލީޑު ނަގާފައި ވަނިކޮށް، ސެލްޓަ ވީގޯ އިން ވަނީ ނަތީޖާ ހަމަހަމަ ވެސް ކޮށްފަ އެވެ. ނަމަވެސް ދެ ވަނަ ލަނޑެއް ޖަހައިގެން ރެއާލް ވަނީ މެޗުން މޮޅުވެފަ އެވެ.

މެޗުގެ ފުރަތަމަ ހާފުގެ 20 ވަނަ މިނެޓުގައި ރެއާލަށް ލީޑު ނަގައިދިނީ ފްރާންސްގެ ކެޕްޓަން ކީލިއަން އެމްބާޕޭ އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ އެޑުއާޑޯ ކަމަވިންގާ އެވެ. މެޗުގެ ދެ ވަނަ ހާފު ފަަށައިގެން ހަ ވަނަ މިނެޓުގައި ސެލްޓަ ވީގޯ އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ލަނޑު އެ ޓީމަށް ޖަހައިދިނީ ވިލޮޓް ސްވެޑްބާގް އެވެ. މެޗުން ރެއާލް މޮޅުވީ އޭގެ ފަހުން 66 ވަނަ މިނެޓުގައި ވިނީޝިއުސް ޖޫނިއާ ޖެހި ލަނޑުންނެވެ. އެއީ ލޫކާ މޮޑްރިޗް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

ސެލްޓަ ވީގޯއާ ދެކޮޅަށް އުމުރުން 39 އަހަރުވެފައިވާ މޮޑްރިޗް ކުޅުނުއިރު، އޭނާ ވެގެން ގޮސްފައި ވަނީ ރެއާލަށް މެޗެއް ކުޅެދިން އެންމެ އުމުރުން ދުވަސްވީ ކުޅުންތެރިޔާ އަށެވެ.

މޮޅާއެކު ރެއާލް ދެ ވަނައިގައި އޮތީ މިހާތަނަށް ކުޅުނު 10 މެޗުން 24 ޕޮއިންޓު ހޯދައިގެންނެވެ. ރެއާލަށް ވުރެ އެއް މެޗު މަދުން ކުޅެގެން އެއް ވަނައިގައި އޮތް ވާދަވެރި ބާސެލޯނާ އަށް ވެސް ލިބެނީ 24 ޕޮއިންޓެވެ.