އޮޕަރޭޝަން ހިރާސް ފާސް ދަށުން 100ށް ގިނަ ގުދަން، މީހުން ދިރިއުޅޭ 300ށް ވުރެ ގިނަ އިމާރާތް ބަލާފާސްކޮށްފައިވޭ
ކެމިކަލް ވިއްކާ 62 ފިހާރައެއްގެ މައުލޫމާތު އެއްކޮށްފައިވޭ
އޮޕަރޭޝަން ހިރާސް ފާސް ނިންމުމުގެ ރަސްމިއްޔާތުގެ ތެރެއިން
އެމްއެންޑީއެފް ފަޔަރ އެންޑް ރެސްކިޔު ސަރވިސްއިން ކުރިއަށް ގެންދިޔަ ''އޮޕަރޭޝަން ހިރާސް ފާސް 2024"ގެ ދަށުން މީހުން ދިރިއުޅޭ 300ށް ވުރެ ގިނަ އިމާރާތާއި، ނުރައްކާތެރި ކެމިކަލް ގުދަންކުރާ 100ށް ވުރެ ގުދަން ބަލާފާސްކޮށްފައިވާ ކަމަށް އެމްއެންޑީއެފުން ބުނެފިއެވެ.
ކެމިކަލް ރައްކާކުރުމުގައި ހޭލުންތެރިކުރުމަށް ކުރިއަށް ގެންދިޔަ "އޮޕަރޭޝަން ހިރާސް ފާސް 2024'' ކުރިއަށް ގެންގޮސްފައިވަނީ 1 އޮކްޓޫބަރު 2024 އިން 15 އޮކްޓޫބަރު 2024 އަށެވެ.
ހުކުރު ދުވަހު މި އޮޕަރޭޝަންގެ ނިންމުން ފާހަގަކޮށްފައިވާއިރު، އެމްއެންޑީއެފުން ބުނީ މި އޮޕަރޭޝަންގައި ކެމިކަލް ރައްކާކުރާ ތަންތަނާއި ވިޔަފާރިކުރާ ތަންތަން ހިންގަނީ ގަވާއިދާ އެއްގޮތަށްތޯ ބެލުމުގެ އިތުރުން، ގްރޭޓަރ މާލެ އޭރިއާގައި ފަސޭހައިން އަލިފާންރޯވާ ފަދަ ތަންތަނާއި އެ ތަންތަނުގައި ހުރި ހިރާސްތައް މި އޮޕަރޭޝަންގެ ތެރެއިން ދެނެގަނެފައިވާ ކަމަށެވެ. އަދި މި އޮޕަރޭޝަންގައި މާލެ ސިޓީ، ހުޅުމާލެ، ވިލިމާލެ އަދި ތިލަފުށީގައި އިންސްޕެކްޝަން ކުރިއަށް ގެންގޮސްފައިވާ ކަމަށް އެމްއެންޑީއެފުން ބުނެއެވެ.
މި އޮޕަރޭޝަންގައި 15 ދުވަހުގެ މަތިން، އިންސްޕެކްޝަން ޓީމްތަކުން ވަނީ މީހުން ދިރިއުޅޭ 399 އިމާރާތާއި، ނުރައްކާތެރި ކެމިކަލް ގުދަންކުރާ 144 ގުދަނާއި ކެމިކަލް ވިއްކާ 62 ފިހާރައެއްގެ މައުލޫމާތު އެއްކޮށްފައިވާ ކަމަށް އެމްއެންޑީއެފުން ބުނެއެވެ.
މި އޮޕަރޭޝަނުގައި އެމްއެންޑީއެފް އެފްއާރުއެސްއާއި، އެމްއެންޑީއެފް މާލެ އޭރިއާ ކޮމާންޑް، އަދި މޯލްޑިވްސް ޕޮލިސް ސަރވިސްއިން ވަނީ ބައިވެރިވެފައެވެ.
ނުރައްކާތެރި ކެމިކަލް ގުދަންކުރާ ތަންތަން ބަލާފާސްކުރުމުގެ މަސައްކަތް ފަށާފައިވާއިރު، މީގެ ކުރިން މިފަދަ ގުދަން ތަކުގައި ނުރައްކާތެރި އަލިފާނުގެ ހާދިސާތައް ހިނގާފައިވެއެވެ.
