އިޒްރޭލު ދިފާއު ކޮށްދޭން އެމެރިކާއިން އިޒްރޭލަށް އެންމެ ޒަމާނީ މިސައިލް ދިފާއީ ނިޒާމަކާއި އަދި އެ ނިޒާމު ހިންގުމަށް ސިފައިން ފޮނުވަން ނިންމައިފިއެވެ.

ޓާމިނަލް ހައި-އަލްޓިޓިއުޑް އޭރިއާ ޑިފެންސް (ތާޑް) އަކީ ދުރު، މެދު އަދި ކުރު ރާސްތާގެ ބެލިސްޓިކް މިސައިލްތަކުން ދިފާއުވެވޭ އަގުބޮޑު ނިޒާމެކެވެ.

ޕެންޓަގަނުން ބުނާ ގޮތުގައި މި ނިޒާމު އިޒްރޭލުގައި ބޭނުން ކުރަން ނިންމީ "13 އޭޕްރީލް 2023 އަދި 1 އޮކްޓޯބަރ 2023 ގައި އީރާނުން އިޒްރޭލަށް ދިން ނުރައްކާތެރި ހަމަލާތަކަށް ފަހު އިޒްރޭލުގެ ވައިގެ ދިފާއު ވަރުގަދަކުރުމަށެވެ."

މި ނިޒާމާއެކު "އެމެރިކާގެ ސިފައިންގެ ޓީމެއް" ވެސް ފޮނުވާނެ ކަމަށް ޕެންޓަގަނުން ބުނެފައިވެއެވެ.

ތާޑްގެ ބެޓަރީއެއް ހިންގުމަށް 95 ސިފައިން ބޭނުންވެއެވެ.

"މި ނިންމުމުން ދައްކުވައިދެނީ އިޒްރޭލުގެ ދިފާއަށް އެމެރިކާއިން ދޭ އަހައްމިއްޔަތުކަމާއި، އީރާނުގެ އިތުރު ބެލިސްޓިކް މިސައިލް ހަމަލާތަކުން އިޒްރޭލުގައި ތިބި އެމެރިކާގެ ރައްޔިތުން ދިފާއުކުރުމަށް އެމެރިކާއިން ދޭ އަހައްމިއްޔަތުކަމެވެ،" ޕެންޓަގަނުން ނެރުނު ބަޔާނުގައި ބުނެފައިވެއެވެ.

އެމެރިކާގެ މި ނިންމުމާ ގުޅިގެން އީރާނުގެ ފޮރިން މިނިސްޓަރު އައްބާސް އަރަޤްޗީ އާދިއްތަ ދުވަހު ވިދާޅުވީ، "އެމެރިކާގެ މިސައިލް ނިޒާމުތައް ހިންގުމަށް އިޒްރޭލަށް ސިފައިން ފޮނުވުމުން އެ ސިފައިންގެ ފުރާނަ ނުރައްކަލަށް ހުށަހަޅަނީ،" ކަމަށެވެ.

7 އޮކްޓޯބަރުގެ ހަމަލާތަކަށް ފަހު މެދުއިރުމަތީގައި ތިބި އެމެރިކާގެ ސިފައިންނާއި އެމެރިކާގެ މަސްލަޙަތުތައް ދިފާއުކުރުމަށް ކަމަށް ވިދާޅުވެ، މިދިޔަ އަހަރު ޖޯ ބައިޑަން ވަނީ މެދުއިރުމައްޗަށް މިފަދަ ނިޒާމެއް ފޮނުވުމަށް ނިންމަވަފައެވެ. މީގެ ކުރިން 2019 ގައި އެމެރިކާއިން ވަނީ އިޒްރޭލަށް ތާޑް ބެޓަރީއެއް ފޮނުވާފައެވެ. ނަމަވެސް އެފަހަރު އެކަން ކުރީ ތަމްރީނުކުރުމަށެވެ.