ކުރިއަށް އޮތް ހަފުތާތެރޭގައި 700 މީހުންނަށް ޕާކިންގ ސްލޮޓް ހަވާލުކުމަށް މަސައްކަތް ކުރަނީ

މާލެއިން ކުއްޔަށް ދޫކުރަން ނިންމާފައިވާ 1000 ޕާކިންގ ސްލޮޓްގެ ތެރެއިން ކުރިއަށް އޮތް ހަފުތާ ތެރޭގައި 700 މީހުންނަށް ސްލޮޓް ހަވާލުކުމަށް މަސައްކަތް ކުރަމުންދާ ކަމަށް މާލެ ސިޓީ ކައުންސިލުން ބުނެއެވެ.

މިއީ މަހު ފީއަށް ކުއްޔަށް ދޫކުރާ ސްލޮޓްތަކެކެވެ.

ރާއްޖެއެމްވީއަށް ކައުންސިލުން ބުނީ ކުރިއަށް އޮތް ހަފުތާ ތެރޭގައި ޕާކިން ސްލޮޓްތައް ދޫކުރުމަށް މަސައްކަތް ކުރަމުންދާ ކަމަށާއި، މިހާރު ކުރިއަށް ދަނީ އިދާރާ ގޮތުން ކުރަމުންދާ މަސައްކަތް ކަމަށެވެ. ޕާކިން ސްލޮޓްތައް ކުރެހުމުގެ މަސައްކަތް ކުރަމުންދާއިރު، މިހާރު ނިމިފައި ހުރީ 700 ސްލޮޓެވެ. ބާކީ ހުރި 300 ސްލޮޓް ހަވާލު ކުރުމުގެ މަސައްކަތް ކުރަމުންދާ ކަމަށް ކައުންސިލުން ބުނެއެވެ.

ޕާކިންގގެ މައްސަލައަށް ހައްލު ހޯދުމަށް ކުރަމުންދާ މަސައްކަތުގެ ދަށުން 2021 ވަނަ އަހަރު ޖުލައި މަހުގެ ތެރޭގައި ޕާކިން ޒޯންތަކުގެ 211 ޖާގައަށް ކުރިމަތިލުމުގެ ފުރުސަތު ހުޅުވާލިއެވެ. ނަމަވެސް މައްސަލަ ހޫނުވެ، އެކަން އޭސީސީން ހުއްޓުވިއެވެ. އަދި ފަހުން ސްލޮޓްތައް އިތުރުކޮށް 1000 ސްލޮޓަށް ހުޅުވާލީއެވެ.

މި ޕާކިންގ ސްލޮޓްތަކަކީ މަހު ފީ ނަގާގޮތަށް ކުއްޔަށް ދޫކުރެވޭ ސްލޮޓްތަކެކެވެ. މި ސްލޮޓްތަކުގެ ތެރޭގައި ޕްރައިވެޓް ކާރުތަކަށާއި، މާލޭގައި ދުއްވާ ޓެކްސީތަކަށް, އަދި 3.5 ޓަނުގެ ޕިކަޕްތަކަށް ޚާއްސަ ސްލޮޓްތައް ހިމެނެއެވެ. މިހާރު ގާއިމުކުރެވިފައިވާ ޕާކިންގ ސްލޮޓުތަކުގެ ތެރެއިން 25 އިންސައްތަ ޚާއްސަކުރެވިފައި ވަނީ މާލޭގައި ދުއްވާ ޓެކްސީތަކަށެވެ. ކޮންމެ ފަރުދަކަށްވެސް ތަފާތު ތިން ސަރަހައްދަކުން ޖާގައަށް އެޕްލައި ކުރެވޭނެއެވެ. މި ހުޅުވާލެވޭ ފުރުސަތުތަކުގެ ތެރޭގައި ގަރާޖުގެ ގޮތުގައި ސްލޮޓް ރަޖިސްޓްރީކުރުން ނުހިމެނެއެވެ.

ޕާކިންގ ސްލޮޓަށް އެދުމަށް 16 ފެބްރުއަރީ 2022ގައި ހުޅުވާލި ފުރުސަތުގައި 2،807 މީހުން ފޯމް ހުށަހަޅާފައިވެއެވެ. އެއީ ޕޯޓަލް ޑައުންވުމުގެ ކުރިން ހުށަހެޅި 378 ފޯމާއި، ފަހުން ހުށަހެޅި 2429 ފޯމެވެ.

ޕާކިންއަށް ޚާއްސަ ކުރެވޭ ސްލޮޓްތައް ދޫކުރެވުމާއެކު މި މައްސަލައަށް ބޮޑު ހައްލެއް ލިބޭނެ ކަމަށް ކައުންސިލުން ބުނެއެވެ.