މެރިޓައިމް ދާއިރާގައި ގިނަ ފުރުސަތުތައް އެބަހުރި ހުރި ކަމަށާއި، ދިވެހި ޒުވާނުން މިދާއިރާއަށް ނުކުންނަންޖެހޭ ކަމަށް ޓްރާންސްޕޯޓު މިނިސްޓްރީން ބުނެފިއެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި އެ މިނިސްޓްރީގެ ޑިރެކްޓަރު ހުސެއިން ނަޒީރު ވިދާޅުވީ މެރިޓައިމް ދާއިރާއަކީ ވަރަށް ފުޅާ ދާއިރާއެއް ކަމަށާއި، މިދާއިރާއަށް ގިނަ ދިވެހި ޒުވާނުން ނުކުންނަން ޖެހޭ ކަމަށެވެ.

ނަޒީރު ވިދާޅުވީ މެރިޓައިމް ދާއިރާއަކީ ހަމައެކަނި ބޯޓު ދަތުރުކުރުން ދިއުން ނޫން ކަމަށެވެ. މި ދާއިރާއަށް ވަރަށް ފުރުސަތުތައް އޮތް ބޮޑު ދާއިރާއެއް ކަމަށާއި، އެހެން ދާއިރާތަކާ ހިލާފަށް މުސާރަ ވެސް ބޮޑު ދާއިރާއެއް ކަމަށް އޭނާ ވިދާޅުވިއެވެ. އަދި ވިދާޅުވީ މިހާރު ސްކޫލު ނިންމާ ވަޒީފާގެ މައިދާނަށް ނުކުންނަ ޒުވާނުން މެރިޓައިމް ދާއިރާއަށް ބޭނުންވާ ކަމަށެވެ.

މެރިޓައިމް ދާއިރާއަށް ނުކުންނަ ދިވެހިން ނިސްބަތުން ވަރަށް މަދުކަން ފާހަގަކުރައްވައި ނަޒީރު ވިދާޅުވީ މިދާއިރާއަށް ޒުވާނުން ނެރުމަށްޓަކައި ހޭލުންތެރިކުރުވުމަށް ގިނަ މަސައްކަތްތައް ކުރަމުންދާ ކަމަށާއި، މައުލޫމާތުތައް ފޯރުކޮށްދެމުންދާ ކަމަށެވެ.

މީގެ އިތުރުން ނަޒީރު ވިދާޅުވީ މީގެ ކުރިން ވަރަށް ގިނަ ދިވެހިން ބޯޓު ދަތުރުކުރަން ދިޔަ ކަމަށާއި، ނަމަވެސް ފަތުރުވެރިކަމާއެކު ރާއްޖެއަށް އައި ބަދަލާއެކު ބޯޓު ދަތުރުކުރަން ދާ ދިވެހިންގެ ނިސްބަތް ވަރަށް ބޮޑަށް މަދުވި ކަމަށެވެ. ނަމަވެސް މިދާއިރާއިން ނަފާ ހޯދައިގެން ބޮޑެތި ވިޔަފާރިވެރިންނަށް ވެފައިވާ މީހުން ރާއްޖޭގައި އެބަ ތިބި ކަމަށް އޭނާ ވިދާޅުވިއެވެ. އަދި ވިދާޅުވީ މެރިޓައިމް ދާއިރާއާ މެދު އާއްމުން ދެކޭ ގޮތް ބަދަލުކޮށް ރަނގަޅު ވިސްނުމަކުން ވިސްނަންޖެހޭ ކަމަށެވެ.

ނަޒީރު ވިދާޅުވީ މެރިޓައިމް ދާއިރާއިން ކުރިއަށް ދިއުމަށް ސްކޮލާޝިޕްގެ ގިނަ ފުރުސަތުތައް ލިބެމުންދާ ކަމަށެވެ. އެގޮތުން މޯލްޑްވިސް ސްޓޭޓް ޝިޕިންގ (އެމްއެސްއެސް), މޯލްޑިވްސް ޕޯޓްސް ލިމިޓެޑް އަދި ވޯލްޑް މެރިޓައިމް ޔުނިވާސިޓީން އަދި މިކަމާ ގުޅުންހުރި އެކިއެކި ޔުނިވާސިޓީތަކުން ސްކޮލާޝިޕްގެ ފުރުސަތުތައް ލިބޭކަން އޭނާ ފާހަގަކުރެއްވިއެވެ.

ނަޒީރު ވިދާޅުވީ ކޮންމެ އަހަރަކު ވެސް އެކިއެކި ދަރިވަރުންނަށް ސްކޮލާޝިޕްގެ ފުރުސަތުތައް ފަހިކޮށް ދެމުންދާ ކަމަށާއި، ކުރިއަށް އޮތްތަނުގައި މި ދާއިރާއިން ދިވެހި ޒުވާނުން ފެނިގެންދާ ނިސްބަތް އިތުރުވާނެ ކަމަށެވެ.