އިޒްރޭލުން ދިން ހަމަލާއިން ހިޒްބުﷲ ގެ ވެރިޔާ ހަސަން ނަސްރުﷲ ސަލާމަތްވެއްޖެ

ހިޒްބުﷲ ގެ ސަލާމަތީ މަސްދަރުތަކުން ޕްރެސް ޓީވީއަށް މަޢުލޫމާތު ދީފައިވާ ގޮތުގައި، ހިޒްބުﷲ ގެ ލީޑަރު ސައްޔިދު ހަސަން ނަސްރުﷲ ވަނީ ރައްކާތެރި ތަނެއްގައި ކަމަށާއި، ހުކުރު ދުވަހު އޭނާ އަވަހާރަކޮށްލަން އިޒްރޭލުން ދިން ވަރުގަދަ ހަމަލާއިން ނަސްރުﷲ އަށް އެއްވެސް ގެއްލުމެއް ވެފައި ނުވާ ކަމަށެވެ.

އީރާނުގެ ފްރެސް ޓީވީން މިހެން ބުނެފައިމިވަނީ، ހުކުރު ދުވަހު ބެއިރޫތުގެ ދެކުނުގެ ދާހިޔާ ސަރަހައްދަށް އިޒްރޭލުން ދިން ވަރުގަދަ ވައިގެ ހަމަލާ ނަސްރުﷲ އަށް އަމާޒުވި ކަމަށް ބުނެ ސޯޝަލް މީޑިއާގައި ފެތުރުނު ވާހަކަތަކަށް ފަހުގައެވެ.

އީރާނުގެ ތަސްނީމް ނިއުސް އޭޖެންސީން ލުބުނާނުގެ އިތުބާރުހުރި މަސްދަރުތަކަށް ޙަވާލާދީ ބުނެފައިވާ ގޮތުގައި، އިޒްރޭލުގެ މި ޓެރަރިސްޓު ހަމަލާގައި ހިޒްބުﷲގެ އެއްވެސް ކޮމާންޑަރަކު ޝަހީދުވެފައި ނުވާ ކަމަށާއި، މި ހަމަލާއަކީ "ނާކާމިޔާބު" ހަމަލާއެއް ކަމަށެވެ.

ލުބުނާނުގެ ޞިއްޙަތާބެހޭ މިނިސްޓްރީން ބުނެފައިވާ ގޮތުގައި މި ހަމަލާގައި މަދުވެގެން ދެ މީހަކު ޝަހީދުވެ، 76 މީހުންނަށް އަނިޔާވެފައިވެއެވެ.

ލުބުނާނުގެ ދެކުނުގެ ސަރަޙައްދެއް ކަމުގައިވާ ދާހިޔާގެ ހާރަތް ހަރީކް ޑިސްޓްރިކްޓަށް މިދިން ހަމަލާގައި 6 ޢިމާރާތެއް ވަނީ ބިމާ ހަމަކޮށްލާފައެވެ.

އިޒްރޭލުގެ އަސްކަރީ ރޭޑިއޯއިން ބުނެފައިވާ ގޮތުގައި މި ހަމަލާ ދިނީ އެފް-35 މަތިންދާބޯޓުތަކުން ބަންކަރ-ބަސްޓަރ ބޮން ބޭނުންކޮށްގެންނެވެ.

އިޒްރޭލުގެ މީޑިއާތަކުން ރިޕޯޓުކޮށްފައިވާ ގޮތުގައި، މި ހަމަލާ ދިނުމުގެ ކުޑައިރުކޮޅެއް ކުރިން އެމެރިކާއަށް އެކަމުގެ މަޢުލޫމާތު އިޒްރޭލުން ދީފައިވެއެވެ.