މި ސަރުކާރުގެ ސިޔާސީ މަގާމުތަކުގެ ޖުމްލަ އަދަދަކީ ދައުލަތުގެ ސިއްރެއް: މެންބަރު އަހުމަދު ދީދީ
މި ސަރުކާރުގެ ހަރަދު ކުޑަ ކުރުމުގެ އެއްވެސް ސިޔާސަތެއް ނެތް
ފަލަސުރުހީ ޕްރޮގްރާމްގައި ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އަހުމަދު ދީދީ ވާހަކަދައްކަވަނީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒު ސަރުކާރުގެ ސިޔާސީ މަގާމުތަކުގެ ޖުމްލަ އަދަދަކީ ދައުލަތުގެ ސިއްރެއް ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އަހުމަދު ދީދީ ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި މެންބަރު އަހުމަދު ދީދީ ވިދާޅުވީ ރާއްޖެ އޮތީ އިގްތިސާދު ވަރަށް ބޮޑު އަނދަވަޅެއްގައި ކަމަށް ކަމަށް ބުނެ ސަރުކާރުގެ ހަރަދު ކުޑަ ކުރުމަށް ފިޔަވަޅުތަކެއް އަޅަމުން ގެންދާކަން މިސަރުކާރުން ހާމަކުރަމުންދާ ކަމަށެވެ. އަދި މިހާތަނަށް ހަރުދަނާ އެއްވެސް ފިޔަވަޅެއް އަޅާފައިނުވާ ކަމަށާއި، މި ސަރުކާރުގެ ހަރަދު ކުޑަ ކުރުމުގެ އެއްވެސް ސިޔާސަތެއް ނެތް ކަމަށެވެ.
ހަރަދު ކުޑަކުރަންޖެހޭ ހާލަތްތަކުގައި އެގޮތަށް އަމަލުކުރަން ދިވެހި ރައްޔިތުންނަށް އެނގޭނެކަން ފާހަގަކުރައްވައި މެންބަރު އަހުމަދު ވިދާޅުވީ ވިދާޅުވީ ކޮވިޑް-19ގެ ދަތިހާލުގައި ވެސް ރައްޔިތުން ކަންކަން މެނޭޖްކުރި ކަމަށާއި، ސަރުކާރަށް ފުރިހަމަ އެއްބާރުލުން ދިން ކަމަށެވެ. ނަމަވެސް މިއަދު ފެންނަމުންދަނީ އެ މަންޒަރު ނޫން ކަމަށާއި، މިސަރުކާރުގައި ރައްޔިތުން ބިކަ ކުރަމުންދާ ކަމަށެވެ. އެގޮތުން އާދައިގެ މުވައްޒަފުން ވަޒީފާއިން ވަކިކޮށް، ސިޔާސީ ގިނަ ބޭފުޅުން މަގާމުތަކަށް ބޮޑު މުސާރާގައި އައްޔަން ކުރަމުންދާ ކަމަށް މެންބަރު އަހުމަދު ދީދީ ވިދާޅުވިއެވެ.
މެންބަރު އަހުމަދު ދީދީ ވިދާޅުވީ ރައީސް މުއިއްޒު ވެރިކަމަށް ވަޑައިގެންނެވީ 700ށް ވުރެ ސިޔާސީ މަގާމުތައް އިތުރުނުކުރާނެ ކަމުގެ ވައުދުފުޅާއެކު ކަމަށާއި، ނަމަވެސް މިހާރު ސިޔާސީ މަގާމުތަކުގެ ޖުމްލަ އަދަދު 2500ށް ވުރެ އިތުރު ކަމަށް މައުލޫމާތު ލިބޭ ކަމަށެވެ. އެ މައުލޫމާތުތައް ސިއްރު ކުރުމަށް މަސައްކަތް ކުރާ ކަމަށާއި، އާރްޓީއައި ހުށަހެޅި ނަމަވެސް ޖަވާބު ނުދޭ ކަމަށާއި، އެއީ ސްޓޭޓް ސީކްރެޓަކަށް ހަދާފައިވާ ކަމަށް މެންބަރު އަހުމަދު ދީދީ ވިދާޅުވިއެވެ.
އެމްޑީޕީގެ ސަރުކާރަކީ މަތިބަރު ސަރުކާރެއް ކަމަށް ރައީސް މުއިއްޒުގެ ސަރުކާރުގެ ބޭފުޅުން ވިދާޅުވާތީ އެކަމަށް ރައްދު ދެއްވައި މެންބަރު އަހުމަދު ދީދީ ވިދާޅުވީ މިއަދު ރައްޔިތުންނަށް މަތި ބަރު ސަރުކާރު ފެނިފައިވާ ކަމަށެވެ. ރައްޔިތުންނަށް ދޮގުހަދައި، އޮޅުވާލުމަށް މަސައްކަތް ކުރަނީ ކޮން ސަރުކާރަކުން ހާމަވާ ކަމަށް އޭނާ ވިދާޅުވިއެވެ.
