މަޖިލީހުން ސަރުކާރު ޖަވާބުދާރީ ކުރުވާ މަންޒަރު މިއަދު ނުފެނޭ: ޙަސަން ލަތީފް
25 ސެޕްޓެމްބަރު 2024 | ބުދަ 08:04ސަރުކާރު ޖަވާބުދާރީ ކުރުވުމަކީ މެމްބަރުން ކުރަންޖެހޭކަމެއްކަންވެސް ބައެއް މެމްބަރުން މިއަދު ޤަބޫލު ނުކުރައްވާ
ހެންވޭރު ހުޅަނގު ދާއިރާގެ މެންބަރު ހަސަން ލަތީފް
މަޖިލީހުން ސަރުކާރު ޖަވާބުދާރީ ކުރުވާ މަންޒަރުވެސް މިއަދު ނުފެންނަކަމަށް ދި ޑިމޮކްރެޓްސް ޕާޓީގެ ރައީސް ޙަސަން ލަތީފް ވިދާޅުވެއްޖެއެވެ.
ރާއްޖެޓީވީގެ ސުވާލަކީ ޕްރޮގްރާމްގައި ވާހަކަ ދައްކަވަމުން ޙަސަން ލަތީފް ވިދާޅުވީ، މިއަދު މަޖިލީހަށް ބަލާލުމުން ސިޔާސީ ޕާޓީތަކެއް ހިމެނޭ ތަނެއްގެ ގޮތުގައި ނުފެންނަ ކަމަށާއި، މަޖިލިސް ފެނިގެން ދަނީ ސަރުކާރުގެ ގޮތުގައި ކަމަށެވެ. ނުވިތާކަށް މަޖިލީހުން ސަރުކާރު ޖަވާބުދާރީ ކުރުވާ މަންޒަރުވެސް މިއަދު ނުފެންނަކަމަށް ޙަސަން ލަތީފް ވިދާޅުވިއެވެ.
ޙަސަން ލަތީފް ވިދާޅުވީ، ބައެއް މެމްބަރުން ގެ ވާހަކަތަކަށް ބަލާއިރު، ސަރުކާރު ޖަވާބުދާރީ ކުރުވުމަކީ މެމްބަރުން ކުރަންޖެހޭކަމެއްކަންވެސް ބައެއް މެމްބަރުން މިއަދު ޤަބޫލު ނުކުރައްވާ ކަމަށެވެ. އަދި މެމްބަރުންނަކީ ސަރުކާރުކަމަށް ސިފަ ކުރަމުންދާއިރު، އެއީ އުސޫލެއްގެ ގޮތުން ބަލާއިރު ވަރަށް ގޯސް ވިސްނުމެއްކަންވެސް ޙަސަން ލަތީފް ފާހަގަ ކުރެއްވިއެވެ.
ނިމިދިޔަ 19 ވަނަ ރައްޔިތުންގެ މަޖިލީހުގައިވެސް ދިމާވި އެންމެ ބޮޑު މައްސަލައަކީ އެއީކަމަށް މެމްބަރު ވިދާޅުވިއެވެ. އެގޮތުން އޭރު މަޖިލީހުން ސަރުކާރު ޖަވާބުދާރީ ކުރުވުމަށް މަސައްކަތް ކުރިކަން މެމްބަރު ފާހަގަ ކުރެއްވިއެވެ.
މި ސަރުކާރަށް ބަލާއިރުވެސް، މަޖިލިސް މެމްބަރުން ސަރުކާރަށް ތައުރީފު ކުރައްވައި ވާހަކަ ދައްކަވަމުންދާހާ ހިނދަކު ސަރުކާރަށް މަޖިލިސްވެސް ރަނގަޅުވާނެ ކަމަށާއި، ފެންނަމުންދަނީވެސް މަޖިލިސް "ރަބަރ ސްޓޭމްޕެއްގެ" ގޮތުގައި ހިންގަމުންދާތަން ކަމަށް މެމްބަރު ވިދާޅުވިއެވެ.
މެމްބަރު އިތުރަށް ވިދާޅުވީ، އަބަދުވެސް ވެރިކަން ހިންގާ ޕާޓީއަށް މަޖިލީހުގެ މެޖޯރިޓީ ލިބިގެންދާ ކަމަށާއި، އެހެންކަމުން މަޖިލިސް ތެރެއިން ސަރުކާރު ހިންގާތަން ފެނުމަކީ މިއަދު ރައްޔިތުން ހައިރާންވާ ކަމެއްވެސް ނޫން ކަމަށެވެ.
