އިންޑިއާ އަތުން ބަލިވެ ރާއްޖެ ކަޓައިފި

ސަތާރަ އަހަރުން ދަށުގެ ސާާފް ޗެމްޕިއަންޝިޕްގެ ގުރޫޕް ސްޓޭޖުގައި ރާއްޖެ އިން ކުޅުނު ފަހު މެޗުގައި އިންޑިއާ އަތުން ބަލިވެ، ރާއްޖެ މުބާރާތުން ކަޓައިފި އެވެ.

ބޫޓާންގައި މިހާރު ކުރިއަށްދާ މުބާރާތުގައި ރާއްޖެ ހިމެނިފައި އޮތީ ގުރޫޕް އޭގަ އެވެ. މި ގުރޫޕުގައި ރާއްޖެ އާއެކު ދެން އޮތީ އިންޑިއާ އާއި ބަންގްލަދޭޝް އެވެ. ގުރޫޕް ސްޓޭޖުގެ ފުރަތަމަ މެޗުގައި ރާއްޖެ އިން ވަނީ ބަންގްލަދޭޝްއާ އެއްވަރުކޮށްފަ އެވެ. އެހެންކަމުން، ފަހު މެޗުގައި އިންޑިއާ އަތުން ބަލި ނުވެ، ރާއްޖެ އަށް މުބާރާތުގެ ސެމީ ފައިނަލްގެ ފުރުސަތު ހޯދެން އޮތެވެ.

އަންގާރަ ދުވަހުގެ ހަވީރު ކުޅުނު މެޗުގައި އިންޑިއާ އިން ރާއްޖޭގެ މައްޗަށް ކުރި ހޯދީ 3-0 އިންނެވެ. މެޗު ފަށައިގެން 13 ވަނަ މިނެޓުގައި އިންޑިއާ އަށް ލީޑު ނަގައިދިނީ ސަމްސޮން އެވެ. އިންޑިއާގެ އަނެއް ދެ ލަނޑު ވެސް އެ ޓީމުން ޖެހީ ފަހު ހާފުގަ އެވެ. މެޗުގެ 74 ވަނަ މިނެޓުގައި އެ ޓީމުގެ ދެ ވަނަ ލަނޑު ޖެހީ ލުންކިމް އެވެ. އަދި 89 ވަނަ މިނެޓުގައި ލުންކިމް ވަނީ އިންޑިއާގެ ތިން ވަނަ ލަނޑު ވެސް ޖަހައިފަ އެވެ.

ގުރޫޕް ސްޓޭޖުގައި ކުޅުނު ދެ މެޗުން ވެސް މޮޅުވެ، ގުރޫޕްގެ އެއް ވަނައިގައި ސެމީ ފައިނަލްގެ ފުރުސަތު ހޯދީ އިންޑިއާ އިންނެވެ. ގުރޫޕްގެ ދެ ވަނައިގައި ސެމީ ފައިނަލްގެ ފުރުސަތު ހޯދީ ބަންގްލަދޭޝް އެވެ. ރާއްޖޭގެ މައްޗަށް އެ ޓީމުން ކުރި ހޯދީ ލަނޑުގެ ތަފާތުންނެވެ. އިންޑިއާއާ ދެކޮޅަށް ކުޅުނު މެޗުން ބަންގްލަދޭޝް ބަލިވެފައި ވަނީ 1-0 އިންނެވެ.