މޫސުމަށް އަންނަ ބަދަލުތަކަށް ހޭނެން މާލީ އެހީ ލިބުމުގައި ހުރި ދަތިތައް ފިލުވުމަށް މުއްސަނދި ގައުމުތަކަށް ރައީސް މުއިއްޒު ގޮވާލައްވައިފި
އދ ގެ އާންމު މަޖިލީހުގައި ރައީސް މުއިއްޒު ދެއްކެވި ވާހަކަފުޅުގެ މައިގަނޑު މައުޟޫއަކަށް އޮތީ މޫސުމަށް އަންނަ ބަދަލުތަކުގެ މައްސަލަ
ރައީސް ޑރ. މުއިއްޒު އދ ގެ އާންމު މަޖިލީހުގެ 79 ސެޝަންގައި އަންގާރަ ދުވަހު ވަނީ ވާހަކަފުޅު ދައްކަވާފައި
މޫސުމަށް އަންނަ ބަދަލުތަކަށް ހޭނުމަށް ކުރެވޭ މަސައްކަތްތަކަށް މާލީ އެހީތެރިކަން ހަމަޖެހުމުގައި ކުރިމަތިވާ ދަތިތައް ކުޑަކުރުމުގައި އެއްބާރުލުން ދިނުމަށް މުއްސަނދި ގައުމުތަކަށް ރައީސް ޑރ. މުހައްމަދު މުއިއްޒު ގޮވާލައްވައިފިއެވެ.
ރައީސުލްޖުމްހޫރިއްޔާ މިކަމަށް ގޮވާލެއްވީ އދ.ގެ އާންމު މަޖިލީހުގެ 79 ވަނަ ސެޝަނުގައި އަންގާރަ ދުވަހު ވާހަކަފުޅު ދައްކަވަމުންނެވެ.
ޑރ. މުއިއްޒު ވިދާޅުވީ މޫސުމަށް އަންނަ ބަދަލުތަކުގެ މައްސަލައަކީ އިންސާނިއްޔަތަށް އެންމެބޮޑު ނުރައްކަލެއް އޮތް މައްސަލަ ކަމުގައެވެ. އެހެން ކަމުން އެކަމުގައި ގުޅިގެން މަސައްކަތްކުރުމުގެ މުހިންމުކަން ވަނީ ފާހަގަ ކުރައްވާފައެވެ.
މޫސުމަށް އަންނަ ބަދަލުތަކުގެ ވާހަކައަކީ ހަގީގަތެއް ނޫން ކަމަށާއި، އެފަދަ ބަދަލެއް ނާންނަކަން ރާއްޖެއަށް ބަލާލުމުން އެނގޭނެ ކަމަށް ވިދާޅުވެ، ކުރިން ވާހަކަފުޅު ދައްކަވާފައިވީ ނަމަވެސް އދ ގެ އާންމު މަޖިލީހުގައި ރައީސް މުއިއްޒު ދެއްކެވި ވާހަކަފުޅުގެ މައިގަނޑު މައުޟޫއަކަށް އޮތީ މޫސުމަށް އަންނަ ބަދަލުތަކާއި އެކަމުގެ ނުރައްކަލުގެ މައްޗަށްކަން ފާހަގަ ކުރެވެއެވެ.
މޫސުމަށް އަންނަ ބަދަލުތަކުގެ ސަބަބުން ޤައުމުތަކުގެ އެތައް އަހަރުތަކެއްގެ ކުރިއެރުންތައް ނެތިގެންދާކަމަށާއި އަދި ޤައުމުތަކުގެ ތަރައްޤީގެ ކަންކަމަށް ހޭދަކުރުމަށް ހުންނަ މަދު ވަޞީލަތްތައް ކުއްލި ޙާދިސާތަކުގައި އެހީތެރިކަން ފޯރުކޮށްދިނުމަށާއި މޫސުމަށް އަންނަ ބަދަލުތަކަށް ހޭނުމަށް ކުރަންޖެހޭ މަސައްކަތްތަކަށް ހޭދަކުރަންޖެހޭކަމުގައި ރައީސް މުއިއްޒު ވިދާޅުވިއެވެ.
"އެކަށީގެންވާ ވަޞީލަތްތަކާއެކު އެ މައްސަލަ ޙައްލުކުރުމުގެ ނިޔަތާއެކު އަދި ސައިންސްގެ މައްޗަށް ބިނާވެފައިވާ ގޮތްތަކެއް މިހާރުން މިހާރަށް ހޯދުމަށް މަސައްކަތްކުރުމަށް،" ރައީސް މުއިއްޒުގެ ވާހަކަފުޅުގައި ގޮވާލެއްވިއެވެ.
2028 ވަނަ އަހަރު އަންނަންވާއިރަށް ރާއްޖެއަށް ބޭނުންވާ ކަރަންޓްގެ 33 އިންސައްތަ އިއާދަކުރަނިވި ހަކަތައިން އުފެއްދުމަށް ކަނޑައަޅާފައިވާ އަމާޒަށް ދިވެހިރާއްޖެއިން މަސައްކަތްކުރަމުންދާކަމަށް ރައީސް މުއިއްޒު ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި ދިވެހިރާއްޖޭގެ ރައްޔިތުން ދިރިއުޅުމަށް ކުރާ މަސައްކަތުގައި ކަނޑުތައް އަދާކުރާ މުހިންމު ދައުރު ފާހަގަ ކުރައްވަމުން ޕްލާސްޓިކުން ކަނޑުތައް ތަޣައްޔަރުވުމުގެ މައްސަލައާ ދިރުންތައް ހިމާޔަތްކުރުމާއި ނެތި ހިނގައިދާނެކަމުގެ ބިރު ހީވެފައިވާ ދިރުންތައް ޙިމާޔަތްކުރުމުގައި އިތުރު ބާރެއްލައިގެން މަސައްކަތްކުރުމަށް ގޮވާލެއްވިއެވެ.
