ފަލަސްތީން ސްކާފް އާއި ހިތްޕެވި ކޮފީ އާއި މަނާ ނުކުރެވުނު އިޒްރޭލް ޕާސްޕޯޓް

ކިތައްމެ ވަރަކަށް ދޮން ކުރިއަސް ދުނބުރި އެއް އަނބަކަށް ނުވާނެއެވެ. ހިތި ކަނދޫ ވެލެއްގެ ބުޑަށް ފެންކަމުގައި މާމުއި އެޅިއަސް އޭގައި އަޅާ އެއްޗެއް ފޮންޏެއް ނުވާނެއެވެ. ދައްކާ ވާހަކައަކުން އުޅޭ ގޮތަކުން މީހެއްގެ ހުރި ސިފައެއް ބަދަލެއް ނުވާނެއެވެ. މިހެން ގޮސް ކިތައްމެ މިސާލެއް ލިޔެވިދާނެއެވެ. ދިގު ކުރާކަށް ލިޔާނެ ކަމެއް ނެތެއް ނޫންތޯއެވެ. ސިދާ ޕޮއިންޓަށް ދަމާތޯއެވެ.

ރައީސް މުއިއްޒުގެ ދެފުށް ދެގޮތް ކަމާއި ދެއްކުންތެރިކަމުގެ ވާހަކަ އަކީ ރާއްޖޭގެ ސިޔާސީ މައިދާނުގައި މަޝްހޫރު ވާހަކަ އެކެވެ. ދެ މީހަކު ދިމާވިއަސް ދެ ފަތް ކޭއްތެލިއަސް އެންމެ ގިނައިން އިވޭ އެއްވާހަކައަކީ އެއީ ނޫންތޯއެވެ. މީހުން ވާހަކަ ދައްކަނީ ދައްކަން ވެގެންނެވެ. ނުދައްކާ ނުވެގެންނެވެ. ސަރުކާރުން ދުލުގައި ހިފައިގެން ދަމާތީއެވެ.

ރައީސް މުއިއްޒު އދ. ކުރައްވަމުން ގެންދަވާ ދަތުރުފުޅުގައި ދައްކާ ވާހަކަފުޅުތަކުންނާއި، އުޅުއްވާ ގޮތްކޮޅުތަކުން މީހަކަށް އެއްޗެކޭ ނުބުނެ ހުރެވޭ ވަރެއް ވެސް ނޫނެއް ނޫންތޯއެވެ. އެންމެ ފަހުން އެއޮތް ކުރެއްވި ކަމެއް ބައްލަވާށެވެ. ފަލަސްތީނުގެ ރައީސް މަހުމޫދު އައްބާސް އާއި ރައީސް މުއިއްޒު ބައްދަލު ކުރެއްވި އިރު ހުންނެވީ ކަރުފުޅުގައި ކުފިއްޔާ ސްކާފް އަޅުއްވައިގެންނެވެ. އެއީ ފަލަސްތީނު ރަމްޒުކޮށްދޭ ނިޝާނެއް ކަމަށް ގިނަ ބަޔަކު ގަބޫލުކުރެއެވެ. ހުންނެވީ ވަރަށް ބޮޑަށް ހިނިފުޅުވެސް އައިސްފައެވެ. ހީވަނީ މާގާތް މީހަކާ ބައްދަލުވީހެންނެވެ. ވިދާޅުވާ ކަހަލައެވެ. ފަލަސްތިނުގެ ހައްގުގައި ތިމަން މަނިކުފާނަށްވުރެ ވަކިން ބޮޑަށް ތެދުވެ ހުރި މީހަކުން ނުހުންނާނެއެވެ. ވިދާޅުވީ ވެސް އެހެންނެވެ. މަހުމޫދު އައްބާސް ކައިރީގައި ވިދާޅުވާތީ އިވުނީ ފަލަސްތީނުގެ ރައްޔިތުންނަށްޓަކައި ކުރައްވަން ޖެހުނު ކޮންމެ ކަމެއް ކުރައްވަން ހުންނެވީ ތައްޔާރަށެވެ. ހިތައް އެރިއެވެ. މި ދެން ތަންފުކެއް ބޮޑުވަރެއް ނޫންތޯއެވެ. މަހުމޫދު އައްބާސް އާއި ބައްދަލު ކުރެއްވި އިރު މި ސްކާފް އެޅުއްވުމުގެ ބަދަލުގައި އީޔޫގެ ވެރިޔާ އާއި ބައްދަލު ކުރެއްވި އިރު އެ ސްކާފް އަޅުއްވައިގެން ބައްދަލު ކުރައްވަން ކެރިވަޑައި ނުގަތީ ކީއްވެ ބާއެވެ. އދ ގެ އެކި އެކި ސައިޑް އިވެންޓްތަކުގައި ބައިވެރިވެވަޑައިގެން ވާހަކަފުޅު ދެއްކެވި އިރު ފަލަސްތީނުގެ ރައްޔިތުންނާ އެކު ހުންނެވި ކަން ރަމްޒުކޮށްދޭން އެ ސްކާފް ނޭޅުއްވީ ކީއްވެ ބާވައެވެ. ފަލަސްތީނުގެ ރައީސް އާއި ބައްދަލު ކުރެއްވުމަށްފަހު ނުކުމެވަޑައިގެން ދެއްވި އިންޓަރވިއުގައި އިޒްރޭލްގެ ނަންވެސް ވިދާޅުވާން ކެރިވަޑައި ނުގަތީ ކީއްވެބާވައެވެ. އިޒްރޭލުން ފަލަސްތީނުގައި ހިންގަނީ ގަތުލްއާއްމެކޭ ވިދާޅުވާން ކެރިވަޑައި ނުގަތީ ކީއްވެބާވައެވެ. ޖެނެސައިޑް މި ލަފްޒު ވެސް ބޭނުންކޮށްލަން ކެރިވަޑައި ނުގަތީ ކީއްވެބާވައެވެ.

ކުފިއްޔާ ސްކާފް އަޅުއްވައިގެން މުޅި ސޯޝިއަލް މީޑިއާގައި އެ ފޮޓޯ ދައުރުކުރާއިރު އަދި ފަލަސްތީނާއެކު ހުންނެވިކަން ދެއްކެވުމަށް އެކި ކަންކަން ކުރައްވަމުން ގެންދަވާއިރު، އިޒްރޭލް ޕާސްޕޯޓް މަނާކުރާ ބިލް އަމިއްލަފުޅު ސުޕަރ މެޖޯރިޓީ އޮތް ކޮމިޓީއެއްގައި އޮންނަތާ 100 ދުވަހަށްވުރެ ގިނަ ވެއްޖެކަން އެހެން މީހުންނަށް ނޭނގޭނެއޭ ހީފުޅުވަނީ ހެއްޔެވެ. ފަލަސްތީނުގެ ހައްގުގައި ވަކަލާތު ކުރި 2 އަންހެނެއްގެ އަބުރު ނަގާލާ ހައްޔަރުކޮށް ޖަލަށްލާ ހެއްދެވި އިހާނެތި ގޮތް ބައެއްގެ ހަދާނުން ފިލާ ގޮސްފާނެ އޭ ހީވަނީތޯއެވެ. އދ އަށް ކުރެއްވި ދަތުރުފުޅުގައި ކޮށްލެއްވި ޓްރާންސިޓްގައި ހިތްޕަވައިގެން އިސްތިހާރު ކުރައްވަމުން ގެންދެވި ކޮސްޓާ ކޮފީތަށި އެއީ ފަލަސްތީނު ރައްޔިތުންގެ މޫނުގައި ޖެއްސެވުނު ތަފާއްޔެއްކަން ބަޔަކަށް ނޭނގޭނެ އޭ ހިފުޅުވަނީތޯއެވެ. ކަން އޮތީ މިހެން ކަމުގައިވާނަމަ ކުފިއްޔާ ސްކާފް ކަރުފުޅުގައި އަޅުއްވައިގެން އާދަޔާ ޚިލާފު ހިނުފުޅެއް އައިސް ހުންނަވައިގެން މަހުމޫދު އައްބާސް އާއި ބައްދަލު ކުރެއްވުމަކުން ހަގީގަތް އަދި ބަދަލެއް ނުވާނެއެވެ. މީހުން ބުނަނީ ރަނގަޅަށެވެ. މިއީ ހަމަ ދެ ފުށް ދެގޮތްކަމާ ކަންދެއްކެވުން ނޫން އެހެން ދެން ކޮން އެއްޗެއްތޯއެވެ.