ލުބްނާންގެ އެކި ސަރަހައްދުތަކަށް އިޒްރޭލުން ބޮން އަޅާ އެތައް ސަތޭކަ މީހުން މަރުވެ، ހާހަކަށް ވުރެ ގިނަ މީހުން ޒަޚަމްވެއްޖެއެވެ.
ލުބުނާނުގެ ސިއްހަތާ ބެހޭ ވުޒާރާއިން ހާމަކޮށްފައިވާ މައުލޫމާތު ބުނާ ގޮތުން، އިޒްރޭލުން ބޮން އެޅުމުގެ ސަބަބުން މަދުވެގެން 492 މީހުން މަރުވެފައިވެއެވެ. އޭގެ ތެރޭގައި 35 ކުޑަކުދިން ހިމެނެއެވެ. އިޒްރޭލުގެ ހަމަލާތަކުގައި މަދުވެގެން 1،645 މީހުން ވަނީ ޒަޚަމްވެފައެވެ.
އިޒްރޭލުން ލުބުނާނުގެ އެކި ސަރަހައްދުތަކަށް ބޮންއަޅާ އޭގެ ސަބަބުން މަރުވަމުންދާ މީހުންނާ ޒަޚަމްވަމުންދާ މީހުންގެ އަދަދު މައްޗަށް ގޮސް މަސްރަހް ނުރައްކާވެފައި ވުމާއެކު، ދުނިޔޭގެ ލީޑަރުންނާއި އދ އިން ވަނީ އިތުރަށް ހާލަތު ގޯސް ނުކުރުމަށް ގޮވާލާފައެވެ. ތުރުކީން ބުނެފައިވަނީ ލުބުނާނަށް އިޒްރޭލުން ދިން ހަމަލާތަކުން "މުޅި ސަރަޙައްދު ހަލަބޮލިކަމުގެ ތެރެއަށް ވައްޓާލަފާނެ" ކަމަށެވެ.
ލުބުނާނަށް އިޒްރޭލުގެ ހަނގުރާމަމަތީ ބޯޓުތަކުން ހަމަލާތައް ދޭން ފެށީ ހޯމަ ދުވަހުގެ ހެނދުނު 6:30 ހާ އިރު ކަމަށް ރިޕޯޓްތައް ބުނެއެވެ.
ފުރަތަމަ ދިން ވަރުގަދަ ހަމަލާތައް އަމާޒުވީ ދެކުނު ލުބުނާނުގެ އެކި ސަރަޙައްދުތަކަށެވެ. އޭގެ ފަހުން، ބެކާ ވެލީ އާއި ބާލްބެކް އަދި އުތުރަށް ހަމަލާތައް ވަނީ ދީފައެވެ. އޭގެ ފަހުން، ދަހްޔާ، އަށާއި ބޭއިރޫތު ގެ ބޭރުން މީހުން ތޮއްޖެހިފައިވާ ސަރަޙައްދަކަށް ވަނީ ހަމަލާ ދީފައެވެ.
އިޒްރޭލުގެ އަސްކަރިއްޔާ އިން ބުނާ ގޮތުގައި ހަމަލާތައް އަމާޒުކުރީ ހިޒްބުﷲ ގެ އިސް ލީޑަރެއް ކަމަށްވާ އަލީ ކަރާކީ އަށެވެ. ނަމަވެސް، ހިޒްބުﷲ އިން ނެރުނު ބަޔާނެއްގައި ބުނެފައިވަނީ އަލީ ކަރާކީ ހެޔޮ ހާލުގައި ހުރި ކަމަށެވެ.
އިޒްރޭލުން ބުނާ ގޮތުގައި ލުބުނާނުގެ 1،600ށް ވުރެ ގިނަ ތަންތަނަށް ވަނީ ހަމަލާ ދީފައެވެ.
ހޯމަދުވަހުގެ ހަމަލާތަކުގައި މަދުވެގެން 492 މީހުން ލުބުނާނުން މަރުވެފައިވާއިރު، އޭގެ ތެރޭގައި 35 ކުޑަކުދިންނާއި 58 އަންހެނުން ހިމެނެއެވެ.
ހޯމަ ދުވަހަކީ ލުބުނާނުގެ އަހުލީ ހަނގުރާމައިގެ ފަހުން އެންމެ ގިނަ އަދަދަކަށް މީހުން މަރުވި ދުވަސް ކަމަށް ރިޕޯޓްތައް ބުނެއެވެ.
އިޒްރޭލުގެ ހަމަލާތަކަށް ރައްދު ދިނުމުގެ ގޮތުން ހިޒްބުﷲ އިން ވަނީ ރޮކެޓް ހަމަލާތައް އިޒްރޭލުގެ ޓާގެޓްތަކަށް ދީފައެވެ. ރިޕޯޓްތައް ބުނާގޮތުގައި އިޒްރޭލުގެ އަސްކަރީ ބޭސްތަކަށް މަދުވެގެން 6 ހަމަލާ ހިޒްބުﷲ އިން ދީފައިވެއެވެ. އޭގެ ބައެއް ރޮކެޓްތައް ހައިފާ ޕޯޓު ސިޓީއާ ވަރަށް ކައިރިއަށް ފޯރިކަމަށްވެސް ޚަބަރުތައް ބުނެއެވެ.
އދ. ގެ އާންމު މަޖިލީހުގައި ވާހަކަފުޅު ދައްކަވަމުން ފްރާންސްގެ ޚާރިޖީ ވަޒީރު ވަނީ ލުބުނާނުގެ މައްސަލައިގައި އދ ގެ ސަލާމަތީ މަޖިލީހުގެ ކުއްލި ޖަލްސާ އަކަށް ގޮވާލައްވާފައެވެ.
އިޒްރޭލުގެ ނުރައްކާތެރި ހަމަލާތަކާއެކު ލުބުނާނުގެ ދެކުނުގެ ސަރަހައްދުތަކުގައި ދިރިއުޅޭ އެތައް ހާސް މީހުން ވަނީ އެ ސަރަހައްދު ދޫކޮށް ދާން ފަށާފައެވެ. ސްކޫލްތަކުގެ ކިޔެވުން ވަނީ ބަންދުކޮށްފައެވެ. ޒަޚަމްވާ މީހުންނަށް ފަރުވާ ދިނުމަށް ޖާގަ ހެދުމަށް ހޮސްޕިޓަލް ތަކުގައި ކޮންމެހެން ކުރަންޖެހޭ އޮޕަރޭޝަނެއް ނޫނީ ނުކުރުމަށް ވަނީ އަންގާފައެވެ.
