މުޅި ރާއްޖެއަށް ދެމެހެއްޓެނިވި ތަރައްގީ ގެނެސްދިނީ ކުރީގެ ރައީސް ސާލިހުގެ ސަރުކާރުން: ޑރ.ޑީޑީ

ދިވެހިރާއްޖެއަށް ދެމެހެއްޓެނިވި ތަރައްގީ ގެނެސްދިނީ ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުން ކަމަށާއި، ރައީސް ޑރ.މުހައްމަދު މުއިއްޒުގެ ސަރުކާރުން ކުރަމުންދަނީ ހުދުމުހުތާރު ވެރިކަމެއް ކަމަށް އެމްޑީޕީގެ ކުރީގެ ރައީސް ޑރ.އިބްރާހިމް ދީދީ (ޑރ.ޑީޑީ) ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި ޑރ.ޑީޑީ ވިދާޅުވީ މިސަރުކާރުގެ ފުރަތަމަ 10 މަހާއި، ކުރީގެ ސާލިހުގެ ވެރިކަމުގެ ފުރަތަމަ 10 މަސް ރައްޔިތުން އަޅާކިޔާލުމުން ފަރަގު ފެންނާނެ ކަމަށެވެ. ރައީސް ސާލިހުގެ ސަރުކާރުގައި މުޅި ރާއްޖޭގައި ދެމެހެއްޓެނިވި ތަރައްގީގެ މަޝްރޫއުތައް ކުރިއަށް ގެންގޮސްފައިވާ ކަމަށާއި، މީހުން ދިރިއުޅޭ ހުރިހާ ރަށަކުން އެތަރައްގީ ފެނިގެންދިޔަ ކަމަށެވެ. މާލެސިޓީގެ އިތުރުން އެންމެ އާބާދީ ބޮޑު ސިޓީއަކީ އައްޑޫ ސިޓީކަން ފާހަގަކުރައްވައި ޑރ.ޑީޑީ ވިދާޅުވީ އައްޑޫގެ ޗާޓު ބަދަލުކޮށްފައިވަނީ ރައީސް ސާލިހުގެ ސަރުކާރުގެ ތަރައްގީން ކަމަށެވެ.

ނަމަވެސް މި ސަރުކާރުގެ 10 މަސް ފާއިތުވެގެންދިޔައިރު ތަރައްގީގެ އެއްވެސް ކުލަވަރެއް ފެނިފައިނުވާ ކަމަށާއި، މާލީ ގޮތުން ރައްޔިތުންނަށް ވަރަށް ބޮޑަށް ދަތިކޮށްފައިވާ ކަމަށް ޑރ.ޑީޑީ ވިދާޅުވިއެވެ.

މީގެ އިތުރުން ޑރ.ޑީޑީ ވިދާޅުވީ މިސަރުކާރުން ކުރަމުންދަނީ ހުދުމުހުތާރު ވެރިކަމެއް ކަމަށާއި، އެކަންކަން މިހާރު ފެންނަމުންދާ ކަމަށެވެ. އެގޮތުން ރާއްޖޭގެ ތާރީހުގައި ވެސް އެއްވެސް ސަރުކާރަކުން ނުފޫޒު ނުފޯރުވާ މިނިވަން މާލީ މުއައްސަސާތަކަށް މިސަރުކާރުން ސިޔާސީ ނުފޫޒު ފޯރުވަމުންދާ ކަމަށް ޑރ.ޑީޑީ ތުހުމަތު ކުރެއްވިއެވެ. ޑރ.ޑީޑީ ވިދާޅުވީ އެމްއެމްއޭ އަދި ބީއެމްއެލްގެ ބޯޑަށް ސިޔާސީ ބޭފުޅުން އައްޔަންކޮށް، ދެ މުއައްސަސާގެ ސިޔާސަތުތަކަށް ބަދަލު ގެނެސްފައިވާ ކަމަށެވެ.

ޑރ.ޑީޑީ ވިދާޅުވީ މިސަރުކާރުން މަސައްކަތް ކުރަނީ ހުރިހާ ދިމާލަކަށް ނުފޫޒު ފޯރުވުމަށް ކަމަށެވެ. މިއީ ވަރަށް ނުރައްކާތެރި ކަމެއް ކަމަށާއި، ރައްޔިތުން މިކަމަށް އިތުރަށް ހޭލުންތެރިވެ ހޭލަން ޖެހޭ ކަމަށް އޭނާ ވިދާޅުވިއެވެ. އަދި ވިދާޅުވީ ހުދުމުހުތާރު ވެރިކަމެއް ކުރުމުގެ ފުރުސަތު ދީގެން ނުވާނެ ކަމަށެވެ.