އެއްލައިދޫ ރިސޯޓްގައި ކައްކާ މަރާލި މައްސަލަ: ރާއްޖެ ދޫކޮށް ދިޔަ ހެކިން ހޯދުމަށް އިންޓަޕޯލްގެ އެހީ ހޯދަނީ

އދ. އެއްލައިދޫ ރިސޯޓްގައި ލަންކާ ދެ މީހެއްގެ ދެމެދުގައި ހިންގި މާރާމާރީއެއްގައި އެ ރިސޯޓުގެ ކައްކާ މަރާލި މައްސަލައިގެ އަޑުއެހުމެއް އާދިއްތަ ދުވަހު ކުރިއަށް ގެންގޮސްފިއެވެ.

މި ޙާދިސާގައި މަރުވެފައި ވަނީ ސްރީލަންކާއަށް ނިސްބަތްވާ ޕަތުމް ދިލްޝަން ޑި ސިލްވާ އަގަމްޕޮޑިއެވެ.

މި މައްސަލައިގައި ތޫނު އެއްޗެއް ބޭނުންކޮށްގެން ޤަސްދުގައި މީހަކު މެރުމުގެ ކުށުގެ ދައުވާ އުފުލާފައިވަނީ ސްރިލަންކާ ރައްޔިތެއް ކަމަށްވާ ޖަޔަލަތު ކޮޑިއަރޗިގެ ޖަނަކަ ޕްރަސަންނަ ޕެރޭރާގެ މައްޗަށެވެ.

މި އަޑުއެހުމުގައި ފުރަތަމަ ހާޒިރުވި ހެކިވެރިޔާއަކީ ޙާދިސާ ހިނގިއިރު އެތަނުގައި ބަދިގޭގައި މަސައްކަތް ކުރާ މުވައްޒަފެކެވެ.

ހެކިވެރިޔާ ބުނީ، އޭނާ ކޮޓަރީގައި ހުއްޓައި އެހެން މުވައްޒަފަކު އައިސް ޙާދިސާ ހިނގައިގެން އުޅޭކަމަަށް ބުނި ކަމަށާއި، އޭނާ އެހެން ބުނިއިރު ހުރީ ނުހަނު ހާސްވެފައި ކަމަށެވެ.

އެ ހެކިވެރިޔާ ވަނީ އެ ޙާދިސާގެ މައުލޫމާތު އޭނާއަށް ފެނުނު ގޮތް ކިޔާދީފައެވެ. އޭނާ ކިޔާދިން ގޮތުގައި ޕަތުމް ހޮސްޕިޓަލަށް ގެންދިޔައިރު އޭނާވެސް ޕަތުމްއާއެކު ދިޔައެވެ.

މި އަޑުއެހުމުގައި އިތުރު ހެެއްކެއްގެ ހެކިބަސް ނެގުމަށްވެސް ތާވަލު ކުރެވުނެވެ. އެއީ ފުލުހުންގެ އޮފިސަރެކެވެ. ނަމަވެސް އެ ހެކިވެރިޔާ މި އަޑުއެހުމަށް ހާޒިރު ކުރުމަށް ކޯޓުން ޗިޓު ފޮނުވި ނަމަވެސް ފުލުހުންގެ ފަރާތުން އެ އޮފިސަރަށް ޗިޓު ރައްދުކޮށްފައި ނުވާ ކަމަށާއި، ޗިޓް ރައްދު ނުވާ ސަބަބުވެސް ސާފުވެފައި ނުވާކަމަށް ގާޒީ ވިދާޅުވިއެވެ.

ދައުލަތުން ވަނީ ދެން އޮންނަ އަޑުއެހުމެއްގައި އެ ހެކިވެރިޔާ ހާޒިރު ކުރައްވާނެކަމަށް ވިދާޅުވެފައެވެ.

މި މައްސަލައިގައި ދައުލަތުގެ ހެކިންގެ ގޮތުގައި ލަންކާގެ ގިނަ ރައްޔިތުން ތިބިއިރު، އޭގެ ތެރެއިން 6 މީހަކު މިހާރު ވަނީ ރާއްޖެއިން ފުރާފައެވެ. ދައުލަތުން ވަނީ އެ މީހުންގެ ހެކިބަސް އެމްބަސީ މެދުވެރިކޮށް ނަގަން ބޭނުންވާކަމަށް މީގެ ކުރިންވެސް ބުނެފައެވެ.

އެހެންނަމަވެސް އެކަމަށް އެތައް ދުވަހެއް ހޭދަވަމުންދާތީ ގާޒީ ވަނީ އެ ކަންބޮޑުވުން ހިއްސާ ކުރައްވާފައެވެ. އެގޮތުން މި މައްސަލައިގައި ދައުވާލިބޭ ފަރާތް ބަންދުގައި ހުންނަތާ 5 އަހަރަށްވުރެ ގިނަ އަހަރު ވަނީއެވެ.

ދައުލަތުގެ ވަކީލު ވިދާޅުވީ، އެ ހެކިން ހާޒިރު ކުރުމަށް އިންޓަޕޯލް މެދުވެރިކޮށް އޯގަސްޓު މަހުގެ 25 ވަނަ ދުވަހުން ފެށިގެން މަސައްކަތް ކުރަމުންދާ ކަމަށާއި، އަދި އެމީހުން ހޯދިފައިނުވާ ކަމަށެވެ.

އެހެންކަމުން މި އަޑުއެހުމުގައި ގާޒީ ވަނީ ހެކިން ހާޒިރު ކުރުމަށް ވަރަށް ދިގު މުއްދަތެއް ދެވިފައިވާކަން ފާހަގަ ކުރައްވައި މިކަމުގައި ބަންދުގައި ހުރި މީހާގެ ހައްޤުތައްވެސް ގެއްލިގެން ނުވާނެކަން ފާހަގަ ކުރައްވާފައެވެ. އެހެންކަމުން މިކަމުގައި ސްޓޭންޑެއް ނަގަންޖެހޭނެކަމަށް ގާޒީ ވިދާޅުވިއެވެ.

ގާޒީ ވިދާޅުވީ، އޮކްޓޯބަރު މަހުގެ ފުރަތަމަ ހަފްތާ ތެރޭގައި ހެކިބަސް ނެގުމުގެ އަޑުއެހުމެއް ތާވަލު ކުރައްވާނެ ކަމަށާއި، އޭގެ ކުރިން ހެކިންގެ މައުލޫމާތު ކޯޓަށް ހިއްސާ ކުރަންވާނެ ކަމަށެވެ.

ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އިބްރާހިމް އިޙްސާންއެވެ.