ތަސްލީމް ހޯދުމަށް އިންޓަރޕޯލް ޔެލޯ ނޯޓިސްއަށް އެދިފައިވަނީ އޭނާ ރާއްޖެއިން ބޭރަށް ގޮސްފައި ވާތީއެއް ނޫން: ފުލުހުން
43 އަހަރުގެ ތަސްލީމް ގެއްލިގެން ރިޕޯޓުކޮށްފައިވަނީ 30 އޯގަސްޓް 2024 ގައި
ތަސްލީމް މުޙައްމަދު އަދި އޭނާ ދަތުރުދިޔަ ފިނޮޅު
މާލެ އަތޮޅު ފިނޮޅަކަށް ދަތުރު ގޮސް އުޅެނިކޮށް ގެއްލުނު މއ. އަސަރީ ހަނދާން، މުހައްމަދު ތަސްލީމް ހޯދުމަށް އިންޓަޕޯލް ޔެލޯ ނޯޓިސްއަށް އެދިފައިވަނީ އޭނާ ރާއްޖެއިން ބޭރަށް ގޮސްފައިވާތީ ނޫން ކަމަށް ފުލުހުން ބުނެފިއެވެ.
43 އަހަރުގެ ތަސްލީމް ގެއްލިގެން ރިޕޯޓުކޮށްފައިވަނީ 30 އޯގަސްޓް 2024 ގައެވެ.
މިހާދިސާއާ ގުޅޭގޮތުން ބުދަ ދުވަހު ފުލުހުން ބޭއްވި ނޫސްވެރިންގެ ބައްދަލުވުމުގައި ޗީފް ސުޕްރިޓެންޑެންޓް އޮފް ޕޮލިސް ހަސަން ޝިފާއު ވިދާޅުވީ ތަސްލީމް ހޯދުމުގެ މަސައްކަތް އަދިވެސް ކުރަމުންދާ ކަމަށާއި، އޮޕަރޭޝަން ފުޅާ ކޮށްފައިވާ ކަމަށެވެ. އެގޮތުން ދަތުރު ގޮސްފައިވާ ފިނޮޅުގެ ސަރަހައްދުތައް ހޯދަމުންދާ ކަމަށް ޝިފާއު ވިދާޅުވިއެވެ.
ޝިފާއު ވިދާޅުވީ މިހާތަނަށް ބެލިބެލުމުން ތަސްލީމް އެންމެފަހުން ވެސް ހުރީ ފިނޮޅުގައި ކަމަށް އެނގޭ ކަމަށެވެ. އަދި އިންޓަޕޯލް ޔެލޯ ނޯޓިސްއަށް އެދިފައިވަނީ ގެއްލިފައިވާ މީހަކަށް ވާތީ ކަމަށް އޭނާ ވިދާޅުވިއެވެ.
މި ހާދިސާއާ ގުޅިގެން ފުލުހުން އެންމެފަހުން ނެރުނު ބަޔާނުގައި ބުނެފައިވަނީ ތަސްލީމް ދަތުރުދިޔަ ފަސްގަނޑުން ފެނިފައިވަނީ 30 އޯގަސްޓް 2024 ވަނަ ދުވަހުގެ ހެނދުނު 7:45 އާއި 9:00 އާ ދޭތެރޭގައި ކަމަށާއި، އޭނާ މާލެ ދާން ބޭނުންވާ ވާހަކަ ބުނުމުން އެދުވަހުގެ 10:00 އާ 11:00 އާ ދޭތެރޭ މާލެ ފުރި ލޯންޗުގައި އޭނާ މާލެ ފޮނުވާލުމަށް ދަތުރުގެ ބައިވެރިން ހޯދުމުން ފެނިފައިނުވާތީ އޭނާ އެހެން ލޯންޗެއްގައި މާލެ ގޮސްފައިވޭތޯ ބެލުމަށް ދަތުރުގެ ބައިވެރިން އޭނާގެ އާއިލާއަށް ގުޅައި މައުލޫމާތު ސާފުކޮށްފައިވާކަމަށެވެ. އަދި އާއިލާއިން އޭނާ މާލެ ނާންނަކަމަށް ބުނުމުން އޭނާ ހޯދުމުގެ މަސައްކަތް ދަތުރުގެ ބައިވެރިން ފެށި ކަމަށް ފުލުހުންގެ ތަހުގީގަށް އެނގިފައިވާ ކަމަށް ފުލުހުން ނެރުނު ބަޔާނުގައި ބުނެފައިވެއެވެ.
ބަޔާނުގައި އިތުރަށް ބުނެފައިވަނީ، މި މައްސަލައާ ގުޅިގެން ތަސްލީމްއާއެކު ދަތުރުދިޔަ މީހުންނާއި، އެފަސްގަނޑުގައި ދަތުރުގޮސްފައި ތިބި އިތުރު 12 މީހުންނާވެސް ތަހުގީގަށް ސުވާލުކޮށްފައިވާ ކަމަށެވެ.
މި މައްސަލަ އަދިވެސް ފުލުހުން ދަނީ ތަހުގީގު ކުރަމުންނެވެ.
