ލައިބާ، ޖޯޖިއާ މުބާރާތުން ރަނގަޅު ކާމިޔާބެއް ހޯދުމުގެ އުންމީދުގައި

ޖޯޖިއާ ގައި ކުރިއަށްދާ ބެޑްމިންޓަން މުބާރާތެއްގައި ވާދަކުރުމަށް، ރާއްޖޭގެ ޒުވާން ބެޑްމިންޓަން ކުޅުންތެރިޔާ ލައިބާ އަޙުމަދު މަޚްލޫފް (އެލީ) ފުރައިފި އެވެ.

ޖޯޖިއާގެ ބަޓުމީގައި ކުރިއަށްދާ، ބަޓުމީ ކަޕް - ޔޫތު އިންޓަނޭޝަނަލް މުބާރާތުގެ ތިން އިވެންޓެއް ގައި ލައިބާ ވާދަކުރާނެ އެވެ. އެއީ 13 އަހަރުން ދަށުގެ ސިންގަލްސް ބައިގެ އިތުރުން، ޑަބަލްސް އިވެންޓު އަދި މިކްސް ޑަބަލްސް އިވެންޓުގަ އެވެ. ޑަބަލްސް އިވެންޓުގައި ލައިބާގެ ޕެއާ ޕާޓްނަރަކީ އަރްމޭނިއާގެ އަނިތާ އާޒުމަންޔަން އެވެ. މީގެ އިތުރުން މިކްސް ޑަބަލްސް އިވެންޓުގައި ލައިބާގެ ޕެއާ ޕާޓްރަނަކީ، އަރްމޭނިއާގެ އެރިކް އެލޯޔަން އެވެ.

ޖޯޖިއާގައި މި މުބާރާތް ކުރިއަށް ދާނީ ސެޕްޓެމްބަރު މަހުގެ 20 ވަނަ ދުވަހުން ފެށިގެން 22 ވަނަ ދުވަހުގެ ނިޔަލަށެވެ. މި މުބާރާތުގައި އަރްމޭނިއާ، އަޒަރްބައިޖާން، ތުރުކީ، ކަޒަކިސްތާންގެ އިތުރުން ޖޯޖިއާގެ ޓޮޕް ރޭންކިންގެ ކުޅުންތެރިން ވާދަ ކުރާނެ އެވެ.

މުބާރާތާ ގުޅޭ ގޮތުން ލައިބާ ބުނީ އުންމީދަކީ މުބާރާތުގައި ރަނގަޅު ކާމިޔާބެއް ހޯދުން ކަމަށާއި، މެޑައްޔެއް ހޯދުމަށް އުންމީދު ކުރާ ކަމަށެވެ.

ސެޕްޓެމްބަރު މަހުގެ ކުރީ ކޮޅު ލައިބާ ވަނީ ސްލޮވޭނިއާ ގައި ކުރިއަށް ދިޔަ މިރްނާ އިންޓަނޭޝަނަލް ޔޫތު މުބާރާތުގައި ވާދަކޮށް ލޯ މެޑަލް ހޯދައިފަ އެވެ. އެ މުބާރާތުން ލައިބާ ލޯ މެޑަލް ހޯދާފައި ވަނީ 13 އަހަރުން ދެށުގެ ޑަބަލްސް ބައިންނެވެ.

ބެޑްމިންޓަންގެ ގިނަ މުބާރާތްތަކެއްގައި ވާދަކޮށް ލައިބާ ވަނީ މިހާތަނަށް ބައިނަލްއަޤުވާމީ 11 މެޑަލް ހޯދައިފަ އެވެ. މިއަހަރުގެ މިހާތަނަށް ލައިބާ ވަނީ ހަތަރު މެޑަލް ހޯދައިފަ އެވެ. މީގެ އިތުރުން ސައުދީ އަރަބިޔާގައި އޮތް ސައުދީ އޯޕަންގައި ވާދަކޮށް ވެސް ލައިބާ ވަނީ މެޑަލް ހޯދައިފަ އެވެ.