ރ. އަލިފުށީ ރޯޑް ޑިވެލޮޕްމަންޓު ކޯޕަރޭޝަން (އާރުޑީސީ) ސައިޓުގައި މަސައްކަތް ކުރަމުންދާ ގިނަ އަދަދެއްގެ މުވައްޒަފުން ވަޒީފާއިން ވަކިކުރަމުންދާތީ އަލިފުށީ އެމްޑީޕީ ދާއިރާއިން އެކަން ހަރުކަށި އިބާރާތުން ކުށްވެރިކޮށްފި އެވެ.

އެމްޑީޕީގެ ރ އަލިފުށީ ދާއިރާއިން މިކަން ކުށްވެރިކޮށް ނެރެފައިވާ ބަޔާނުގައި ބުނެފައިވަނީ އަލިފުށީ އާރްޑީސީގައި މަސައްކަތްކުރާ 22 މުވައްޒަފުން އެއްފަހަރާ ވަޒީފާއިން ވަކިކޮށް، އިތުރު 7 މުވައްޒަފުންނަށް މަސައްކަތު ސައިޓު ބަދަލު ކުރުމަށް އަންގާފައިވާ ކަމަށެވެ.

މިފަދައިން މިކަން ސަރުކާރުން ކޮށްފައިމިވަނީ ރައީސް ޑރ މުއިއްޒު ރިޔާސީ އިންތިޚާބުގެ ކެމްޕެއިންގައި ސަރުކާރުކާރު ހިއްސާވާ ކުންފުނި ތަކުގައި އުޅޭ އެއްވެސް މުވައްޒަފަކު ވަޒީފާއިން ވަކި ނުކުރާނެ ކަމަށް ބުނި ވައުދާ ޚިލާފަށް ކަމަށް ވެސްް ބަޔާނުގައި ބުނެފައިވެއެވެ.

މީގެ އިތުރުން، އިގުތިސޯދީ ގޮތުން ދަތި ދަނޑިވަޅެއްގައި އެތައް އާއިލާތަކެއް އާމްދަނީ ހުއްޓާލައި އެ މީހުން ހާލުގައި ޖެއްސުމަކީ ބަލައިގަނެވޭނެ ކަމެއް ނޫން ކަމަށާއި، އާންމުން މުވައްޒަފުންނަށް "އަނިޔާ ދެމުން" ދާއިރު އަލިފުށީ އާރުޑީސީ ސައިޓުގައި ކުރިން ނުތިބޭވަރަށް އިސް މަޤާމުތައް އުފައްދާފައިވާކަން ވެސް ފާހަގަކޮށްފައިވެ އެވެ.

ސަރުކާރުން ވީ ވައުދާ ޚިލާފްނުވެ، މުވައްޒަފުން ވަކިކުރުން ހުއްޓާލުމަށް އެމްޑީޕީން ގޮވާލާފައިވެއެވެ.