ސައިކަލެއްގެ މަޑި ދަށުން ހަތަރު ލައްކައަށް ވުރެ ގިނަ ރުފިޔާ ވަގަށް ނެގި ބިދޭސީއަކު ފުލުހުން ހައްޔަރުކޮށްފި
14 ސެޕްޓެމްބަރު 2024 | ހޮނިހިރު 11:15މައްސަލައިގައި ތުހުމަތު ކުރެވޭ ފަރާތް ކަމުގައިވާ ޖަހަންގިރު އާލަމްގެ އަތުން 442،750 ރުފިޔާ ފެނިފައިވޭ
މަގުމަތީގެ ރައްކާތެރިކަން ކަށަވަރު ކުރުމަށް ފުލުހުން ކުރަމުންދާ މަސައްކަތްތަކުގެ ތެރެއިން މާލެ އާއި ހުޅުމާލޭގެ އެކި ސަރަހައްދުތަކުގައި އުޅަނދުފަހަރު ބަލައި ފާސްކުރުމުގެ ތެރެއިން
ސައިކަލެއްގެ މަޑި ދަށުން 442،750 ރުފިޔާ ވަގަށް ނެގި ބިދޭސީއަކު ހައްޔަރުކޮށްފިއެވެ.
މި މައްސަލައިގައި ފުލުހުންގެ ބެލުމުގެ ދަށަށް ގެނެސްފައިވަނީ، ބަންގްލަދޭޝްއަށް ނިސްބަތްވާ އުމުރުން 45 އަހަރުގެ ޖަހަންގިރު އާލަމް ކަމަށް މޯލްޑިވްސް ޕޮލިސް ސާވިސް އިން ބުނެފައިވެއެވެ.
އޭނާ ހައްޔަރުކޮށްފައިވަނީ ކޯޓު އަމުރެއްގެ ދަށުންނެވެ. އަދި ކޯޓު އަމުރުގައި ވާގޮތުން، އޭނާއަށް ތުހުމަތު ކުރެވޭ މިންވަރަށް ހެއްކާއި ޤަރީނާ ފުލުހުން ހުށަހަޅާފައިވެއެވެ. އެގޮތުން، އަނިޔާ ލިބުނު ފަރާތުގެ ބަޔާނާއި، ސީސީޓީވީ ފުޓޭޖް އަދި އެއާ ގުޅޭ ސްނެޕްޝޮޓް ހުށަހަޅާފައިވާ ކަމަށް ކޯޓުއަމުރުގައި ބަޔާންކޮށްފައިވެއެވެ.
އެ މައްސަލައާ ގުޅިގެން ކްރިމިނަލް ކޯޓުން ވަނީ އޭނާގެ ބަންދަށް 15 ދުވަސް ޖަހައިފައެވެ.
މި މައްސަލަ ފުލުހުން ގެންދަނީ އިތުރަށް ތަހުގީގު ކުރަމުންނެވެ.
