ލުނިން، ރެއާލްގެ އެއްބަސްވުން އައު ކޮށްފި

ސްޕެއިންގެ ރެއާލް މެޑްރިޑަށް ކުޅެމުން އަންނަ ޔޫކްރެއިންގެ ގޯލު ކީޕަރު އަންދްރޭ ލުނިން އެ ކުލަބުގެ އެއްބަސްވުން އައު ކޮށްފި އެވެ.

އުމުރުން 25 އަހަރުގެ ކުޅުންތެރިޔާ އެންމެ ފުރަތަމަ ރެއާލަށް ބަދަލުވީ 2018 ވަނަ އަހަރު އެވެ. އެ ކުލަބާ އެކު އެންމެ ފަހުން ލުނިން ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ 2025 ވަނަ އަހަރުގެ ޖޫން މަހުގެ ނިޔަލަށެވެ. ނަމަވެސް އެއްބަސްވުމުގައި ބާކީ އެއް އަހަރު އޮއްވައި، ރެއާލުން ބޭނުންވީ އޭނާގެ އެއްބަސްވުން އައު ކުރުމަށެވެ. އެކަމުގެ މަޝްވަރާތަކުން ދެ ފަރާތް އެއްބަސްވުމަކަށް އައިސްފައިވާއިރު، މިހާރު ލުނިން ވަނީ ރެއާލްގެ އައު އެއްބަސްވުމުގައި ސޮއި ކޮށްފަ އެވެ.

ރެއާލްގެ އެއްބަސްވުން ލުނިން އައު ކޮށްފައި ވަނީ އިތުރު ފަސް އަހަރު ދުވަހުގެ މުއްދަތަކަށެވެ. އެހެންކަމުން، މިހާރު އެ ކުލަބާ އެކު އޭނާ ސޮއި ކޮށްފައިވާ ދިގު މުއްދަތުގެ އެއްބަސްވުން ހަމަވާނީ 2030 ވަނަ އަހަރުގެ ޖޫން މަހުގެ ނިޔަލަށެވެ. އައު އެއްބަސްވުމުގައި ސޮއި ކުރުމަށްފަހު ލުނިން ބުނީ، ރެއާލް އަކީ ދުނިޔޭގައި އޮތް އެންމެ މޮޅު ކުލަބު ކަމަށާއި، އެ ކުލަބުގައި އިތުރު އަހަރުތަކެއް ހޭދަ ކުރުމުގެ ފުރުސަތު ލިބުމުން އުފާވާ ކަމަށެވެ. ޚާއްސަކޮށް ފުޓުބޯޅަ ކެރިއަރަށް ބަލާއިރު، ހުރިހާ ގޮތަކުން ވެސް ކުރިއަށް ދާން އެންމެ އެކަށީގެންވާ މަންޒިލަކީ ރެއާލް ކަމަށް ވެސް ލުނިން ބުންޏެވެ.

ލުނިން އަކީ ރެއާލަށް ކުޅޭ ޔޫކްރެއިންގެ އެންމެ ފުރަތަމަ ކުޅުންތެރިޔާ އެވެ. އޭނާ ވަނީ ރެއާލަށް 48 މެޗުގައި ގޯލު ބަލަހައްޓައިދީފަ އެވެ. ރެއާލަށް ބަދަލުވި ފަހުން ލުނިން ވަނީ ލޯނު އެއްބަސްވުމެއްގެ ދަށުން ތިން ކުލަބަކަށް ކުޅެފަ އެވެ. އޭނާ އަކީ ޔޫކްރެއިން ޤައުމީ ޓީމުގެ ގޯލު ބަލަހައްޓަމުން އަންނަ ކުޅުންތެރިޔާ އެވެ.