އިޒްރޭލަށް ވާގިވެރިވާ ހުރިހާ ގައުމުތަކެއް ބޮއިކޮޓް ކުރަންޖެހޭ: ޔޫތް ފޯ ޔުނިޓީ
14 ސެޕްޓެމްބަރު 2024 | ހޮނިހިރު 08:46އިޒްރޭލް ޕާސްޕޯޓު މަނާކުރުމުގެ ބިލުގެ މަސައްކަތް އަވަސް ކުރަންޖެހޭ
އިޒްރޭލާ ދެކޮޅަށް އަޑު އުފުލަނީ
ރައްޔިތުންގެ މަޖިލީހަށް ހުށަހަޅާފައިވާ ޕެޓިޝަންއާ އެއްގޮތަށް އިޒްރޭލް ޕާސްޕޯޓު މަނާކުރަންޖެހޭ ކަމަށާއި، އިޒްރޭލަށް ވާގިވެރިވާ ހުރިހާ ގައުމުތަކެއް ބައިކޮޓް ކުރަންޖެހޭ ކަމަށް ބުނެ މާލޭގައި އަޑު އުފުލައިފިއެވެ.
ޔޫތް ފޯ ޔުނިޓީއިން އިސްނަގައިގެން ހުކުރު ދުވަހުގެ ރޭ 8:30 ހާއިރު މާލޭގެ އަމީނީ މަގުގައި ހުންނަ ކޭއެފްސީ އަދި ޕިއްޒާ ހަޓް ކުރިމައްޗަށް ގިނަ ޒުވާނުންތަކެއް އެއްވެ އިޒްރޭލުން ހިންގަމުންދާ އުދުވާންތަކާ ދެކޮޅަށް އަޑު އުފުލާފައެވެ.
ރާއްޖެއެމްވީއަށް ޔޫތް ފޯ ޔުނިޓީގައި އިސްކޮށް ހަރަކާތްތެރިވާ ޒުވާނެއް ބުނީ އިޒްރޭލް ދައުލަތެއްގެ ގޮތުގައި އެއްވެސް ގޮތަކަށް ބަލައިގަނެގެން ނުވާނެ ކަމަށާއި، އެގައުމަށް ވާގިވެރިވާ ގައުމުތަކާ ދުރުވާންޖެހޭ ކަމަށެވެ. އެގޮތުން ވިޔަފާރީގެ ގޮތުންނާއި، ޓޫރިސްޓުންގެ ގޮތުގައި ވެސް ބަލައިނުގަތުމަށް ވަނީ ގޮވާލާފައެވެ.
އިޒްރޭލް ޕާސްޕޯޓު މަނާކުރުމުގެ ބިލާ ގުޅޭގޮތުން އެމީހުން ބުނީ އެބިލުގެ މަސައްކަތް އަވަހަށް ނިންމަންޖެހޭ ކަމަށާއި، ލަސްވެގެން ދިއުމަކީ ވަރަށް ބޮޑު ކަންބޮޑުވުމެއް ކަމަށެވެ. އަދި މަޖިލީހަށް ހުށަހަޅާފައިވާ ޕެޓިޝަންއާ އެއްގޮތަށް އެ ޕާސްޕޯޓު މަނާކުރަންޖެހޭ ކަމަށް އެމީހުން ބުނެއެވެ. އެގޮތުން ޑްއަލް ސިޓިޝަންޝިޕް ގެންގުޅޭ އިޒްރޭލްގެ ރައްޔިތުންނަށް ވެސް ރާއްޖެއަށް އެތެރެވެވިގެން ނުވާނެ ކަމަށް އެމީހުން ބުނެއެވެ.
ޔޫތް ފޯ ޔުނިޓީއިން ވަނީ އިޒްރާލާ ދެކޮޅަށް ކުރިއަށް ގެންދާ ހަރަކާތްތަކުގައި ވީހާ ވެސް ގިނަ ރައްޔިތުން ބައިވެރިވުމަށް ގޮވާލާފައެވެ. ބާރު އޮތީ ރައްޔިތުންގެ އަތުގައި ކަމަށާއި، ހުރިހާ ރައްޔިތުން އެއްތަންވެ ފަލަސްތީނުގެ ހައްގުގައި މަސައްކަތް ކުރުމަށް ވަނީ އެދިފައެވެ.
