ރަސްދޫއަށް މަސްތުވާތަކެތި އެތެރެކުރަން އުޅުނު މީހާގެ ބަންދުގެ މުއްދަތު ޖަހައިފި
14 ސެޕްޓެމްބަރު 2024 | ހޮނިހިރު 07:03އޭނާގެ ހަށިގަނޑުން ނެގި މަސްތުވާތަކެތީގެ ވަގުތީ ބަރުދަނަކީ 70 ގްރާމް
މި މައްސަލާގައި ހައްޔަރުކުރި އަޙްމަދު އިކުލީލް | ޕޮލިސް
އއ. ރަސްދޫއަށް މަސްތުވާތަކެތި އެތެރެކުރަން އުޅުނު މީހާގެ ބަންދުގެ މުއްދަތު ޖަހައިފިއެވެ.
ފުލުހުން ބުނީ ރަސްދޫއަށް މަސްތުވާތަކެތި އެތެރެކުރަންއުޅޭ ކަމަަށް ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން ހިންގި އޮޕަރޭޝަނުގައި، އއ. ރަސްދޫ / ފެހިވިނަ، 35 އަހަރުގެ އަޙްމަދު އިކުލީލް ހައްޔަރުކޮށްފައިވާ ކަމަށެވެ.
މި ސެޕްޓެންބަރު މަހުގެ 12 ވަނަ ދުވަހު، ރަސްދޫ ފުލުހުންނާއި އިންޓެލިޖެންސް ގުޅިގެން ހިންގި އެ އޮޕަރޭޝަނުގައި އޭނާ ހައްޔަރުކޮށް، އޭނާގެ ހަށިގަނޑު އެތެރޭގައި ފޮރުވާފައިހުރި މަސްތުވާތަކެތި ނެގުމަށް ޑޮކްޓަރަށް ދައްކައި އެތަކެތި ނަގާފައިވާ ކަމަށް ފުލުހުން ބުނެއެވެ.
އޭނާގެ ހަށިގަނޑުން ނެގި މަސްތުވާތަކެތީގެ ވަގުތީ ބަރުދަނަކީ 70 ގްރާމް ކަމަށް ފުލުހުން ބުނެއެވެ.
މި މައްސަލައާ ގުޅިގެން އޭނާގެ ބަންދާމެދު ގޮތެއް ނިންމަށް ކޯޓަށް ހާޒިރުކުރުމުން 10 ދުވަހަަށް ބަންދުކުރުމަށް އަމުރުކޮށްފައިވެއެވެ.
ރާއްޖެއެމްވީއަށް ފުލުހުން ބުނީ ލިބޭ މައުލޫމާތުގެ އަލީގައި ކުރިއަށް ގެންދިޔަ އޮޕަރޭޝަނެއް ކަމަށާއި، މި މައްސަލަ އިތުރަށް ތަހުގީގު ކުރަމުންދާ ކަމަށެވެ.
