މި ސަރުކާރުގައި ބައެއް އެމްބަސީތަކުގައި ތިއްބެވީ "އަ ލޮޓް އޮފް ޓްރޭޝް": ޔާމީން

މި ސަރުކާރުގެ އެކިއެކި މަގާމުތަކުގައި ތިއްބަވާނީ އިލްމީ ގާބިލް ބޭފުޅުން ކަމަށް ރައީސް ޑރ.މުހައްމަދު މުއިއްޒު ވިދާޅުވި ނަމަވެސް ބައެއް އެމްބަސީތަކުގައި ތިއްބެވީ "އަ ލޮޓް އޮފް ޓްރޭޝް" ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.

ބުރާސްފަތި ދުވަހުގެ ރޭ ޕީއެންއެފްއިން ކުރިއަށް ގެންދިޔަ ޖަލްސާގެ އޯޑިއަންސްގައި އިންނަވައި ޔާމީން ވިދާޅުވީ ކޮންމެ ގައުމެއްގައި ހިއުމަން ރިސޯސް ޑިވަލޮޕްކުރުމަކީ އެންމެ މުހިންމު މަސައްކަތް ކަމަށެވެ. އެމީހުންނަކީ ފިލާވަޅު ދިނުމުގެ އިތުރުން ތައުބިއްޔަތު ކުރުމުގެ ޒިންމާ ވަރަށް ބޮޑަށް އުފުލާ ބައެއް ކަމަށް ޔާމީން ވިދާޅުވިއެވެ. އެ މަސައްކަތް ކުރާ ބަޔަކަަށް ނިސްބަތުން ލިބޭ އެއްޗެއް ބޮޑުވާންޖެހޭކަން ފާހަގަކުރައްވައި ޔާމީން ވިދާޅުވީ ޓީޗަރުންގެ މުސާރަ ބޮޑުވުމުގެ އިތުރުން ޓީޗަރުންނާ އިލްމީ ބޭފުޅުންނަށް އިހުތިރާމް ލިބެންޖެހޭ ކަމަށެވެ. ނަމަވެސް މި އިއްޒަތާއި އިހުތިރާމް ލިބޭކަމާމެދު އަދި ދައުލަތުން އެބޭފުޅުންގެ އަގު ވަޒަންކުރަނީ ކިހައި މިންވަރަކަށްތޯ ޔާމީން ވަނީ ސުވާލު އުފައްދަވާފައެވެ.

މިސަރުކާރަށް އިޝާރާތް ކުރައްވައި ޔާމީން ވިދާޅުވީ ރައީސް މުއިއްޒު ވެރިކަމަށް ވަޑައިގެންނެވީ މިސަރުކާރުގެ އެކިއެކި މަގާމުތަކުގައި އަދި ކެމިނެޓްގައި ތިއްބަވާނީ އިލްމީ ގާބިލް ބޭފުޅުން ކަމަށް ވިދާޅުވުމަށްފަހު ކަމަށެވެ. ނަމަވެސް ފެނިގެންދަނީ އެހެން މަންޒަރެއް ކަމަށް ޔާމީން ވިދާޅުވިއެވެ. އަދި ވިދާޅުވީ އެމްބަސީ ތަންތަނަށް ދާއިރު ތިއްބެވީ "އަ ލޮޓް އޮފް ޓްރޭޝް" ކަމަށެވެ.

ޔާމީން ވިދާޅުވީ ގައުމު ކުރިއަށް ގެންދިއުމުގައި ހިއުމަން ރިސޯސް އިތުރަށް ޑިވަލޮޕްކޮށް ފުރުސަތުތައް ފަހިކުރަންޖެހޭ ކަމަށެވެ. ނަމަވެސް މިސަރުކާރުގައި ފެނިގެންދަނީ ތަފާތު އަދި ދެއްކި ވާހަކަތަކާއި އިދިކޮޅު މަންޒަރެއް ކަމަށް ޔާމީން ވިދާޅުވިއެވެ. އަދި ވިދާޅުވީ ރައީސް މުއިއްޒު ދައްކަވާާ ވާހަކަފުޅުތަކާ އެއްގޮތަށް އަމަލުުކުރަންޖެހޭ ކަމަށެވެ.