މުޅި ރާއްޖެއިން އެންމެ ރަނގަޅު 10 ނަތީޖާ ހޯދި ދަރިވަރުންގެ ތެރޭގައި 376 ދަރިވަރަކު
17 ދަރިވަރަކު ގައުމީ ގަދަ 10 ގެ 1 ވަނައިގައި ހިމެނިފައިވޭ
"މަތީ އަރުތަވެރިންގެ އިނާމު" ދިނުމުގެ ރަސްމިއްޔާތުގައި ދަރިވަރަކާއި ޓްރޮފީ ހަވާލުކޮށްދެއްވަނީ
2022-2023 ވަނަ ދިރާސީ އަހަރު މުޅި ރާއްޖެއިން އެންމެ ރަނގަޅު 10 ނަތީޖާ ހޯދި ދަރިވަރުންގެ ތެރޭގައި 376 ދަރިވަރަކު ހިމެނިއްޖެއެވެ.
2022-2023 ވަނަ ދިރާސީ އަހަރު ދިވެހިރާއްޖޭގެ 3،268 ދަރިވަރުން މަތީ ސާނަވީ އިމްތިހާން ފުރިހަމަކޮށްފައިވެއެވެ. އޭގެ ތެރެއިން 376 ދަރިވަރަކު ވަނީ މުޅި ރާއްޖެއިން އެންމެ ރަނގަޅު 10 ނަތީޖާ ހޯދި ދަރިވަރުންގެ ތެރޭގައި ހިމެނިފައެވެ. އަދި 17 ދަރިވަރަކު ގައުމީ ގަދަ 10 ގެ 1 ވަނައިގައި ހިމެނިފައިވާއިރު، ވަކި ވަކި މާއްދާތަކުން 9 ދަރިވަރަކު ވަނީ ދުނިޔެއިން 1 ވަނަ ހޯދާފައެވެ. މިއަހަރު ތިން އޭ ސްޓަރ ހޯދައިގެން "އޭލެވެލް ސެޓްފިކެޓް އޮފް އެކްސެލެންސް" 27 ދަރިވަރުން ވަނީ ހާސިލުކޮށްފައެވެ.
މި ޖަލްސާގެ ފުރަތަމަ ދަންފަޅީގައި އިނާމު ހަވާލުކޮށްފައިވަނީ މަތީ ސާނަވީ ނިންމާ އިމްތިހާނުތަކުގެ ގައުމީ ގަދަ 10ގެ 10 ވަނަ، 9 ވަނަ އަދި 8 ވަނައިގައި ހިމެނުނު ދަރިވަރުންނަށާއި އެންމެ މަތީ ނަތީޖާ ހޯދި ބައެއް ދަރިވަރުން ހިމެނޭހެން ޖުމްލަ 131 ދަރިވަރުންނަށެވެ.
3 ދަންފަޅިއަކަށް ބަހާލައިގެން ކުރިއަށްގެންދިޔަ މި ޖަލްސާގައި ޖުމްލަ 441 ދަރިވަރަކު ވަނީ "މަތީ އަރުތަވެރީންގެ އިނާމު" ހާސިލުކޮށްފައެވެ. އޭގެ ތެރޭގައި ހިމެނެނީ މިދިޔަ އަހަރު މަތީ ޘާނަވީ ނިންމި އިމްތިޙާނުތަކުން އެންމެ ރަނގަޅު ނަތީޖާ ހޯދައިގެން، ޤައުމީ ގަދަ 10 ގައި ހިމެނުނު 376 ދަރިވަރުންނާއި، ސާނަވީ އާއި މަތީ ސާނަވީ ނިންމާ އިމްތިހާނުތަކުން ދުނިޔޭގެ ފެންވަރުގައި މަތީ ވަނަތައް ހޯދި 65 ދަރިވަރުންނެވެ.
މި ރަސްމިއްޔާތުގައި، މަތީ ސާނަވީ ތައުލީމު ނިންމާ އިމްތިހާނުތަކުން މުޅި ދުނިޔެއިން 1 ވަނަ އަދި ގައުމީ ގަދަ 10ގެ 1 ވަނަ ނަތީޖާ ހޯދި ދަރިވަރުންނަށް ޓްރޮފީ އާއި ހަނދާނީ ލިޔުން ހަވާލުކޮށްދެއްވީ ރައީސުލްޖުމްހޫރިއްޔާއެވެ.
