އެމްޕޮކްސް ބައްޔަށް ރާއްޖޭގައި ޓެސްޓް ކުރެވޭ ގޮތް ދުނިޔޭގެ ސިއްހަތު ޖަމްއިއްޔާ (ޑަބްލިޔުއެޗްއޯ) އިން ހަދައިދީފިއެވެ.
ޑަބްލިޔު އެޗްއޯ އިން ބުރާސްފަތި ދުވަހު ވަނީ އެމްޕޮކްސް އަށް ޓެސްޓް ކުރުމަށް ބޭނުންވާ ޓެސްޓް ކިޓްތައް މިނިސްޓްރީ އޮފް ހެލްތް އަށް ހަދިޔާކޮށްފައެވެ.
މި ތަކެއްޗާއި މިނިސްޓްރީގެ ފަރާތުން ޙަވާލުވެވަޑައިގެންނެވީ ސްޓޭޓް މިނިސްޓަރ އިސްމާއިލް ޝަރީފް އެވެ. ޑަބްލިޔުއެޗްއޯ ގެ ފަރާތުން މި ޓެސްޓް ކިޓްތައް ޙަވާލުކޮށްދެއްވީ މެޑިކަލް އޮފިސަރ ޑރ.ޕަޑްމަލް ޑި ސިލްވަރ އެވެ.
ސަރުކާރުން ބުނެފައިވާ ގޮތުން އެމްޕޮކްސް އަށް ޓެސްޓް ކުރާނީ އިންދިރާގާނދީ މެމޯރިއަލް ހޮސްޕިޓަލުންނެވެ. އެހެން ނަމަވެސް ރާއްޖޭގެ ކޮންމެ ރަށަކުން ވެސް އެމްޕޮކްސް އަށް ސާމްޕަލްނެގޭނެ ކަމަށްވެސް ބުނެފައިވެއެވެ.
ދުނިޔޭގެ ސިއްހަތު ޖަމްޢިއްޔާއިން ވަނީ 14 އޮގަސްޓް 2024 ގައި މި ބައްޔަށް ސިއްޙީނުރައްކަލުގެ ހާލަތު އިޢުލާން ކޮށްފައެވެ.
