ކަނޑުއޮތްގިރީގެ މަސައްކަތް ފެލިވަރަށް ބަދަލުކުރަނީ

މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން ކަނޑުއޮތްގިރީގައި ކުރަމުން އައި މަސައްކަތް ފެލިވަރަށް ބަދަލުކުރުމުގެ މަސައްކަތް ކުރިއަށްދާ ކަމަށް އެ ކުންފުނިން ބުދަ ދުވަހު ހާމަކޮށްފިއެވެ.

މިފްކޯގެ އިސްވެރިއެއް ވިދާޅުވީ، ފެލިވަރުގައި މަސައްކަތް ފެށުމަށް ގިނަވެގެން ނަގާނީ ދެ ހަފުތާއެއްހާ ދުވަސް ކަމަށާއި، މި މަހުގެ ފަހުކޮޅު، މަސައްކަތް ފެށޭނެ ކަމަށެވެ. ކަނޑުއޮތްގިރި ހުސްކުރުމުގެ މަސައްކަތުގެ 90 އިންސައްތަ މިހާރު ނިމިފައިވާ ކަމަށް އޭނާ ވިދާޅުވިއެވެ. އޭނާ ވިދާޅުވީ މިހާރު ކުރަމުންދަނީ ބާކީ ހުރި އުފެއްދުންތެރިކަމަށް ބޭނުންވާ ސާމާނު އެ ރަށުން ބޭލުމުގެ މަސައްކަތް ކަމަށާއި، މީގެ ތެރޭގައި ބަރު މެޝިނަރީ ހިމެނޭތީ، ލޭންޑިންގ ކްރާފްޓާއި ކްރޭން ބޭނުންކޮށްގެން ކުރިއަށް ގެންދަންޖެހޭ މަސައްކަތްތަކަށް ލަސްކަމެއް އަތުވެދާނެ ކަމަށެވެ.

މި މަހުގެ 15 ގެ ކުރިން ކަނޑުއޮތްގިރި ހުސްކުރަން ޖެހޭތީ، އިތުރު މުއްދަތެއް ހޯދުމަށް މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) އާ މަޝްވަރާކުރަމުންދާ ކަމަށް ވެސް އޭނާ ވިދާޅުވިއެވެ.

ކަނޑުއޮތްގިރީގެ ބަދަލުގައި ހުޅުމާލެއިން ބިން ހޯދުމުގެ މަސައްކަތް ކުރިއަށްދާ ގޮތާ ގުޅޭގޮތުން އޭނާ ވިދާޅުވީ، އަދި ވަކި ބިމެއް ހަމަނުޖެހޭ ކަމަށާއި، އެކަމުގައި ފިޝަރީޒް މިނިސްޓްރީ ހިމެނޭ ގޮތަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އާއެކު މަޝްވަރާތައް ކުރިއަށްދާ ކަމަށެވެ.